Yeremiyas 10 - Ɗû na sɗik na wiini Alaw

Alaw na karni gaini alawai zi rgi

¹ Ɗai na Izrayel, ɵini seŋ n'EPIƊ-ƊAI a na muɗaŋ siki ɗa:

² EPIƊ-ƊAI a na muɗa maini nɵa: Ki tiɓi pini sdaɗi pinziba na zamai ɗa kai, ki hini hunai a yimiki burini wazagai zi siŋki n'arbani hlai n'amai maini pinziba na zamai ɗa ɵa kai.

³ Buri ɓa gadai zi ɗû na wiiɗi ɗai hanɗa a wala kadai. E bilsi luwuŋ edi arni jur par daf, ɗif a kilɗaŋ gaini domgo lai,

⁴ e zi arzaŋ gaini or sini kapai a bunda juv, e ɓiliŋ azumai gaini marto gaini ɓere lai kapai a muguza kai.

⁵ A na maini wala na maini ɗif ɵa, n'e piŋ edi war vowai aŋ giɗimi hlai gaini nɵa, a muɗa seŋ kai, e libiŋ gaini libi, buri ɓa a kiɗa a hala kai. Ki hûniŋ kai, a kiɗa a za wala ktai na meefeŋ kai, a kiɗa a za wala ktai na pɗem kaalai.

⁶ EPIƊ-ƊAI, ɗif na maiku ɵa aŋ kai, tuku ku na abai, yikuku a wa gara burini spakku.

⁷ Ɗif n'aga a suku hormo kai ɗa asiya ɗa, pay na midini pinziba paŋ. A wala n'a juva suku tuku, buri ɓa arbaɗi ɗai na yalakai na midini afti paŋ, midini afti na wiiɗi paakai paŋ lai, ɗif na maiku nɵa aŋ kai.

⁸ Nagai gaini hlaiɗi paŋ, e ɗi ɗai na tatalakai, na yel midiɗi kai, alawai na wiiɗi a kiɗa a hitriɗi wala ktai kai buri ɓa a luwuŋ kadai.

⁹ E piyisi arzaŋ ɗa a Tarsis par, or ɗa a Ufaz par lai. Ɗif n'a sɗa sdani ɗa a zizinaŋ, ɗif zi hiliyi or ɗa a ɗûhini sini, e wiini sapa na gaini futini na mekele cih cih gaini na mekele keŋ sini: Hanɗa paŋ a sda n'a za gaini tini ɗif.

¹⁰ Amma EPIƊ-ƊAI ɗa a Alaw jre, a Alaw na karni, a pai n'a na haa kureɗ, a za hiyli ɗa afti a ziriya, a sawa li ɗa, tiɗi ɗai a ɵa mini kaalai.

¹¹ Ki miɗiɗi ɓa: Alawai n'a za hlai n'amai gaiɗi yai ɗa kai ɗa, aga a vada edi midiɗi yai ɗa par.

¹² Alaw a ziti yai gaini spakni, a tikiti duniya azumai gaini yelni, a gaŋa hlai n'amai edi gaini siɗi na wiini.

¹³ A faka li aŋ ɓara ɗa, yem na war hlai n'amai a tapa war hlai ktai, edi war koŋɗi yai na puɗu par a hinasi ɗugul a rga amai, a hina wilɗi a wulɗa won hlai na faŋ a na ɵa, a yimasi smer edi war hlai zi gɗam par.

¹⁴ E sûwi tatalakai gara, a kiɗa a yima midiɗi kai, ɗif zi hiliyi or paŋ siyer aga a yimaŋ burini wala zi rgi n'a zaŋ ɗa, buri ɓa alawai zi rgi na wiiɗi ɗa a eles meere, suŋfa warni kai.

¹⁵ A wala na nafani aŋ kai, na ɗai aga e riyi pini, aga a vada edi, war sarti n'aga mu zilbiɗi miɗi ɗa.

¹⁶ Amma Alaw na a bri na wiini Yakob ɗa, a na maini ni nɵa kai, buri ɓa a za wazagai paŋ ɗa a ni, Izrayel te pinziba zi bulum na wiini, yikini ɗa ɓa, EPIƊ-ƊAI zi spak paŋ.

Gir n'a sɗa aŋ caka kai

¹⁷ Yeruzalem, mula wazagaiku azumai, tuku na k'aŋ gaini ciki cak,

¹⁸ buri EPIƊ-ƊAI a na muɗa maini nɵa: tiyana ɗa aga mu biliɗi ɗai na midini afti ɗa edi gai gai maini viluw nɵa, aga mu hiɵiɗi amai haɵ kapai e pri edi ta kai.

¹⁹ Haw buriya, gdaŋ wara kir kai, wurukŋa ɗa a zi zûûli kai, mu hiina wara ɓa: hanɗa a meefeŋ na wiya, aga mu yimaŋ sa.

²⁰ A gumuŋa ɗa a tuura edi kok, sogomni gaini rûwi kafa, aliya e ɗi sa kir kai, e hili ɗaw, ɗif n'a pitiŋa gumuŋa amai katawai aŋ kir kai, n'a paŋa balak mada tiɓ aŋ kaalai.

²¹ Buri ɓa ɗai zi giɗimi ɗa yel midiɗi kai, e ɗa piyi EPIƊ-ƊAI kai, yelɗi aŋ kai na ɗa burini hanɗa, fara na wiiɗi a ɵara edi na ɗa buri hanɗa lai.

²² Suura a na wa, aŋsi gobi, ziriyini afti n'abai a na halasi midini afti na war gal n'azumai par, aŋ tuura fuŋ n'abakai na Yuda, a bundaŋ aŋ hlai na kadai su su, aŋ hlai zi simni na wiini barka ceŋ ceŋ.

Sda na wiini Yeremiyas buriɗi ɗaini

²³ EPIƊ-ƊAI, mu sɗa ya ɓa, ɗif murɗek ɗa, payaini ɗa a ŋa miɗini ɗa a ni kai, ɗif n'a na hala blaŋ ɗa a koto sini kiini kai;

²⁴ EPIƊ-ƊAI, gadaŋa maini n'a na ɗa ɵa, gadaŋa warni hiyku kai, kapai ku hosaŋa edi marwai kai.

²⁵ Hina suwarku ɗa miɗini pinziba n'a suɗuku kai ɗa, midiɗi ɗai n'e suɗuku kai ɗa, n'e ɗa yukuku war miɗi kai, buri ɓa e ɗa virmi pinzibani Yakob ɗa, e ɗa vidiŋ edi marwai, e ɗa tûûri aftini lai.