Yakob 5 - Ɗû na sɗik na wiini Alaw

Gadai siɗi ɗai zi farai

¹ Tiyana, tiki zi farai ɗa, tuwi, ɗûûli lai, burini gir n'a na halasi buriki.

² faraiki ɗa aŋ gaini hûfi ta, sapa na siki ɗa bumi a lumaŋ ta ta lai.

³ Or gaini arzaŋ na wiiki ɗa, aŋ gain cûri cor, cûrini ɗa aga a za aŋ wala zi zaida buriki, aga a luma neŋ siki maini afu nɵa, sini mefeŋ n'asakal ta ɗa, tiki ki tipi der amai viya.

⁴ Vrakɗi ɗai zi sɗa n'e zi sdani hiɗi war vowaiki ɗa a na ɗuula, suuraɗi ɗai zi hiɗi ɗa a co haa ɵimani Epiɗ-ɗai zi spak paŋ ta.

⁵ Tiki ki ɗi ka warɗi yai ɗa war muluk, ki simi ɗa a wazagai na maakai ki simni warni hlai na pɗem, ki liki siki war mefeŋ n'e ɗa fiɗi ɗai edi.

⁶ Tiki ki kûti sariya midiɗi ɗai, ki fiɗi na jre ɗa edi lai, a bla edi arki kaalai.

Ziyi seŋ gaini hangal, Epiɗ-ɗai a ŋasi gobi

⁷ Buri nɵa tawalakaya, ki ziyi seŋ gaini hangal, haa sini gizini Epiɗ-ɗai. Ɗif zi hirim a baiya alini seyem na pɗamai n'arni afti par gaini hangal, haa a rɗa alini seyem n'a naiya avut, gaini n'asakal ɗa lai.

⁸ Tiki nɵa lai, ki ziyi seŋ gaini hangal, ki ɗiyi gdaŋ buri gizini Epiɗ-ɗai a ŋasi gobi.

⁹ Tawalakaya, ki nuumi wuzaɗi marki kai, kapai sariya te ɗukla midikki kai, ɗif zi ɗûklûti sariya ɗa aŋ min hlai zaw.

¹⁰ Tawalakaya, burini gir gaini ziyini-seŋ na gaini hangal ɗa, ki mili arki siɗi ɗai na min Alaw, n'e miɗi edi war yikini Epiɗ-ɗai ɗa.

¹¹ ɵeɗ midiɗi nagai n'e libi gir ɗa, tiki ki ɵini seŋ midini gir na wiini Yob, ki tili dibini n'EPIƊ-ƊAI a siŋni ya lai; buri Epiɗ-ɗai hiinini haw warni gara, pɗem gara lai.

¹² Tawalakaya, a suwa paŋ ɗa, ki hi miki gaini hlai n'amai kai, gaiɗi yai kaalai, gaini wala zi hi mi ktai kaalai, Kam na wiiki a ɗiya nkam ɵa, zaw kai na wiiki a ɗiya zaw kai ɵa lai, kapai ki kɵi warni sariya kai.

Pɗem gaini gir na wiiɗi na zamai

¹³ Arbaki ɗa, na ɓa ɗif aŋ war gir ɗa, a pɗem ɓa a siiwa, na ɓa ktai aŋ war fiiriyi ɗa, a pɗem ɓa a zina yama.

¹⁴ Na ɓa ktai a na veglek ɗa, a pɗem ɓa a yikiɗi n'abakai na war tipi sini, nagai aga e siiwi burini, e girdini emel sini lai, war yikini Epiɗ-ɗai.

¹⁵ Siiwa n'e siiwiŋ gaini yimi hanɗa aga a kurɗa ɗif zi veglek ɗa, Epiɗ-ɗai aga a tikaŋ amai, na ɓa a za ɗa a tuwur ɗa, aga a nava ni burini lai.

¹⁶ Buri nɵa ki hi-miy tuwurki wuzaɗi marki arbaɗi marki, ki piyi pɗem na wiiɗi marki arbaɗi marki lai, kapai ki nivi zûûli. Siiwa na wiini ɗif na jre ɗa, gdaŋni abai gara war sdani.

¹⁷ Eliyas a ɗif mirɗek mai mu tumu nɵa, a siiwa gaini kurfuk kapai faŋ a ɵa kai, faŋ a ɵa midiɗi yai kai, haa buza hu gaini tile ɵaara.

¹⁸ Asakal par a waya a siiwa pra, hlai n'amai a sasi faŋ, afti a sa seyem lai.

¹⁹ Tawalakaya, na ɓa ktai arbaki a wula li edi sini jre par, na ɓa ɗif zamai a wayaŋsi li warni ɗa,

²⁰ aga a yima miɗini ɓa, ɗif n'a wayasi li ɗif na tuwur, edi warɗi futi n'a wula edi warɗi par ɗa, aga a kurɗa suŋfani mini mri par, a dogo tuwur viya lai.