Yakob 3 - Ɗû na sɗik na wiini Alaw

Alsi

¹ Tawalakaya, ki bindi aŋ ɗai zi hitri paŋ kai, buri tiki ki siɗi ɓa sariya na wiyi aga te za gdaŋ a suwa.

² Tumu paŋ mu ɵiɓumu tukum war wazagai viya. Na ɓa ɗif a na n'a ɵiɓa tukum war seŋ zi miɗi kai, ni a ɗif na jre, n'a giɗima sini paŋ maini gaini eleŋje nɵa.

³ Won hlai na mu wumu li eleŋje war mini plasai ɗa, a gada pumu, mu bundumu sini paŋ maini na mu durumu ɵa lai.

⁴ Tili sini hulamai n'abakai pra, ni ɗa abakai, a hogoŋ ɗa a smer na gdaŋ lai, amma a ɗopoŋ ɗa a fele fele n'agwi kadai pin dirini ni n'a na ka hulum ɗa lai.

⁵ Nɵa lai, alsi te wala n'agwi kadai arbani ali-tini-si, amma te za ɗa a wazagai n'abakai. Tili, afu n'agwi kadai ɗa a kiɗa a ya jur n'abai.

⁶ Alsi lai t'afu, te yai na wiini jre-ɗikat-kai, alsi t'aŋ war sumu, te duguɗa meefeŋ war si paŋ, te ya simnimu na warɗi yai ɗa, sini wiimu par haa sin mrimu, na mal ɗa, afu na wiiɗi na ɗa a na warɗi avai z'afu par.

⁷ Pinzibani wazagai n'ezini puɗu puɗu na buza paŋ, pinzibani wala zi ɗufli paŋ, pinzibani wazagai zi hidili paŋ, pinzibani wazagai n'arni yem par paŋ lai, ɗif a kiɗa buri a gdaŋ, ɗai e bindiŋ a gada piɗi lai.

⁸ Amma alsi ɗa, ɗif ktai n'a kiɗa aŋ giditi aŋ kai, te meefeŋ na ɗif a kiɗa buri a cakaŋ kai, t'aŋ gaini vi gaini masnaw zi fiɗi ɗai.

⁹ Gaiɗi alsi hanɗa, mu sumu kol sin Ni n'a Epiɗ-ɗai, n'a Api lai, gaiɗi na lai, mu muɗumu meefeŋ siɗi ɗai, n'Alaw a rgiɗi maini sini nɵa.

¹⁰ War mi na ktai hanɗa par, kol gaini miɗi na maafanai a niyasi edi, tawalakaya a juva ɓa a za maini nɵa kai.

¹¹ Yem na pɗem gaini yem na ɗewek a kiɗa a niyasi edi war hlai zi liiwi yem ktai par ɗi?

¹² Tawalakai, luwuŋ Fige ɗa a kiɗa a wa ali luwuŋ olive ɗi? Zaw luwuŋ zi vin a wa ali luwuŋ Fige ɗi? Hlai zi liiwi yem na liŋ liŋ ɗa a kiɗa a liiwasi yem na pɗem kai.

Yel n'azumai midini afti gaini yel n'amai par

¹³ Arbaki ɗa ɗif zi yel na zi siɗi lai ɗa asiya ɗa? A pɗem ɓa ɗif ni ɗa a siŋka sdani edi war payai na pɗem gaini hangal gaini yel lai.

¹⁴ Amma na ɓa aŋ warki ɗa a sile, gaini miɗi na ɗewek, zaw hiini zi sûwiɗi marki ɗa, ki kûli siki burini hanɗa kai, ki zi eles sini jre kaalai.

¹⁵ Yel na maini hanɗa ɵa ɗa a na amai par kai, a na wiiɗi yai, a na wiini neŋ-si na wiini mat.

¹⁶ Buri ɓa hlai na sile gaini hiini zi sûwi marki aŋ warni ɗa, dûrgûzi gaini wazagai na maafanai viya aŋ warni lai.

¹⁷ Yel n'amai par ɗa a na avut dai hilu, asakal par a firiya ɵeɗ, a toya arba, a hangal, hiinini haw warni gara, a wa ali na pɗamai gara, a za ɓraw kai, rhai war mini kaalai.

¹⁸ Nagai n'e piyi ɵeɗ ɗa, e sûûɗi ɵeɗ won hlai n'e ɗa woni maini alini seyem nɵa, hiɗini seyem na wiiɗi ɗa, a sɗa na jre lai.