Yakob 2 - Ɗû na sɗik na wiini Alaw

Zini ɓraw n'arɗi ɗai ɗa a hi n'amai midini gadai

¹ Tawalakaya, ki hini yimi na war Epiɗ-ɗaimu n'abai Yesu Kristu ɗa a tapa gaini zini ɓraw n'arɗi ɗai kai.

² Na ɓa ɗif na gaini adoŋo zi or tini na gaini sapa n'a ŋala gara sini, a niyasi amlai arbaki war tipi, ɗif na murga a niyasi amlai lai gaini sapa zi selte sini,

³ na ɓa ki tiki hangalki sini ni na gaini sapa na ŋala gara ɗa, ki miɗini ɓa: Tuku ɗa sumnasi war hlai na pɗem hanɗa, amma ku miɗini wiini na murga ɓa: Tuku ɗa, ɗiya ka tuku na zaw, zaw sumnasi azumai ezini wala na mu mula aza miɗini na ɗa,

⁴ ki zi na ɗa a ɓraw arɗi ɗai arbaki tiki dama kai ɗi? Hiini na ki hiiniŋ ɵa na ɗa, a na meefeŋ kadai kai ɗi?

⁵ ɵini haw ɗa, tawalakaya zi diri gara: Alaw a viriɗi na murgakai arɗi ɗai na yai ɗa, kapai e zi aŋ ɗai zi farai war yimi, aŋ ɗai zi mili bulum na wiiɗi pai-n'Alaw, n'a muɗa ɓa aga a sitiɗi wiiɗi nagai n'e diriŋ ɗa kai ɗi?

⁶ Amma tiki ɗa, ki tikini siyer wiini ɗif na murga ɗa, paŋ ktai e ziki gir arki na ɗa e ɗi zi farai ɗa, e kiki wuzaɗi sariya lai, a na ɵa kai ɗi?

⁷ E ɗi nagai n'e ɗa miisi yiki na pɗem n'e ɗa yikiki gaini, e ɗi nagai kai ɗi?

⁸ A jre, na ɓa tiki ki vi gadai na wiiɗi pai amai, maini ɗû n'a muɗa ɓa: Aga ku dara maiku maini suku dama nɵa ɗa, ki zi pɗem.

⁹ Amma na ɓa ki zi ɓraw arɗi ɗai ɗa, ki zi tuwur, gadai a pa seŋ miɗiki ɓa ki ɗi ɗai n'e hi amai midini gadai.

¹⁰ Asiya ɗi paŋ n'a za pin gadai na gaini abaini, amma a ha amai midini gadai ktai kadai, a bunda aŋ ɗif n'a za pin gadai kai.

¹¹ Buri ni n'a muɗa ɓa: Ku za maɵara kai ɗa, a muɗa lai ɓa, ku ɵiɓa belek kai. Nɵa na ɓa ku za maɵara kai, amma ku ɵiɓa belek ɗa, ku bunda aŋ ɗif n'a ha amai midini gadai.

¹² Ki miɗi, ki zi lai maiɗi ɗai n'aga e niviti sariya pin gadai na wiini pli n'edi nɵa.

¹³ Buri ɓa sariya ɗa aga te za gaini hiinini haw kai, burini ni na hiinini haw warni kai ɗa, hiinini haw a sa rɗi n'amai midiɗi sariya.

Yimi gaini sɗa kai ɗa aŋ gaini mri

¹⁴ Tawalakaya, na ɓa ɗif a muɗa ɓa yimini a na, na ɓa sdani aŋ kai ɗa a nafa tiɓ ɗa a ma ɗa? Yimi hanɗa a sɗa aŋ koraŋ ɗi?

¹⁵ Na ɓa tawal na wus zaw na muni, sapa n'a waŋ sini aŋ kai, a na ganala, simini na war yivai aŋ kaalai,

¹⁶ na ɓa ktai n'arbaki a miɗiɗi ɓa: “Ki hili jam, ki kupi siki, ki vi warki lai”, ki siɗi wazagai zi giɗimi siɗi na jaɗi aŋ sini kaalai, miɗi hanɗa a nafa tiɓ ɗa a maɗa?

¹⁷ Yimi ɗa a na nɵa lai. Na ɓa sdani aŋ kai ɗa, yimi hanɗa a na gaini mri su.

¹⁸ Ɗif zamai a kiɗa a muɗa ɓa: Tuku ɗa yimiku a na, ta ɗa sdaŋa a na lai. Siŋkaŋa yimiku na gaini sɗa kai ɗa haw, ta gaini sdaŋa aga mu suŋkuku yimiŋa lai.

¹⁹ Tuku ku yima ɓa Alaw a na ktai, a futini, matai e yimi ɵa lai, e ɗa jiriyi.

²⁰ Tuku ɗif na tatala, ku firiya ɓa mu suŋkuku ɓa yimi gaini sɗa kai ɗa, a wala na muɗaŋ kadai ɗi?

²¹ Abraham, na tiymu, a za edi aŋ jre-ɗikat ɗa pin sɗa kai ɗi? Buri a za ɓaka gaini Isaak n'ahini miɗini gûwiŋ zi ɓaka kai ɗi?

²² Ku sɗa ɓa, yimi ɗa a za wala gaini sdani. Pin sɗa hanɗa, yimi ɗa a nava vi n'amai lai.

²³ Nɵa ɗû n'a muɗa ɓa: “Abraham a tika yimini midini Alaw, hanɗa a pɵa burini aŋ jre-ɗikat” ɗa a va amai. Ni a nava yiki lai ɓa “marmaini Alaw”.

²⁴ Ki tili kai ɗi, ɗif mirɗek ɗa a za edi aŋ jre-ɗikat ɗa gaini sda, a na burini yimi kiini kai.

²⁵ Rahab, muni zi zawar ɗa, na lai te za edi aŋ jre-ɗikat gaini sda, buri ɓa te yimiɗi ɗai n'e ɵiniɗi aŋ tili hlai ɗa siɗi, te tikiɗi piɗi warɗi futi zamai ɗaw lai kai ɗi?

²⁶ Maini na si gaini suŋfa warni kai ɗa aŋ gaini mri, nɵa lai, yimi gaini sɗa kai ɗa aŋ gaini mri.