Yakob 1 - Ɗû na sɗik na wiini Alaw

Ɵiɓini ni wuti

¹ Yakob, ɗif zi sɗa na wiini Alaw, gaini Epiɗ-ɗai Yesu Kristu, sini pinziba na doogo pi sulu n'a ɵara midini afti zamai zamai.

Titimi, libini gir gaini vini n'amai

² Tawalakai, ki yimi titimi na kiini kiini n'a za siki paŋ ɗa maini wala zi firiyi nɵa,

³ Buri tiki ki siɗi ɓa, titimi na wiini yimiki a bindiki aŋ ɗai n'e kiɗi e libi gir.

⁴ Nɵa a juva ɓa libini gir na wiiki ɗa a va sdani amai, kapai tiki ki bindi aŋ ɗai na gaini vi amai, na jrekai lai, war wazagai paŋ, kapai wala ktai a hina piki kai.

Siiwa burini Yel

⁵ Na ɓa ktai arbaki yelni a kiɗa kai ɗa, a zilba Alaw burini hanɗa, ni n'a sa siɗi ɗai paŋ gaini seŋ kai, a muɗa seŋ pini kaalai ɗa aga a sini hanɗa.

⁶ Amma aga a zilbaŋ ɗa gaini yimi, gaini giriŋi agwi kai zaŋ, buri ni n'a giriŋa ɗa, a na maini mayaw na war yem-ra-n'abai, na smer a fakaŋ amai, a ɵiɓaŋ na zaw lai, na zaw lai nɵa.

⁷ Ɗif na mai hanɗa ɵa ɗa, aga a hiina kai ɓa, aga a nava wala tin Epiɗ-ɗai par ɗi ɗa, a na ɵa kai.

⁸ A ɗif na hinini gaini ɓûrwi, n'a ɗiya midini hiini ktai kai.

Ɗif zi farai gaini na murga

⁹ A juva ɓa tawal na haw ɗa, a kola sini buriɗi abai n'Alaw a sitini ɗa,

¹⁰ na zi farai ɗa, burini wiyi n'Alaw a wayaŋ azumai ɗa lai, buri aga a vada edi maini cifiyini evek nɵa,

¹¹ buri won hlai na futi te yimasi li amai, te na yuvuga lai ɗa, te ya evek ɗa edi, cifiyini ɗa a kɵa azumai, juvni ɗa aŋ kir kai, ɗif zi farai aga a vada edi war sdani maini nɵa lai.

Titimi gaini tanai

¹² ɵeɗ midini ɗif n'a ɗiya gdaŋ war titimi, buri ɓa asakal na titimi na wiini a vada li ɗa, ɗif hanɗa aga a niviti bogorai zi suŋfa, n'Alaw a muɗa ɓa aga a sitiɗi wiiɗi nagai n'e diriŋ ɗa.

¹³ Ɗif, won hlai n'aŋ war titimi, aga a muɗa kai ɓa: “a titimaŋ ɗa a Alaw”, buri ɓa meefeŋ ɗa a kiɗa a tetema Alaw kai, Alaw gaini midini dama a tetema ɗif kaalai.

¹⁴ Amma asiya asiya paŋ a kaŋ war tanai na ɗa a suuna na wiini dama, diri na wiini neŋ-sini a sapaŋ, a kaŋ war tuwur.

¹⁵ Diri hanɗa, won hlai n'a tika fel li, a wa tuwur, tuwur won hlai n'a za li abai ɗa, a wa mri.

¹⁶ Tawalakai zi diri gara, aga ki wili war hanɗa kai.

¹⁷ Like zi yiki paŋ, gaini katu na pɗamai paŋ ɗa, a halasi ɗa amai par, a halasi sin epini gaglai par, ni n'a bunda kai, n'a jogo blaŋ blaŋ kai, sezeni aŋ kaalai.

¹⁸ Pin n'a rgaŋ warni ɗa, a wuumu gaini seŋ na jre, kapai mu bundumu aŋ merfeŋni seyem n'a naiya avut arbani wazagai n'a rgaŋ.

Ɵinini seŋ gaini zi na pini

¹⁹ ɵini pɗem, tiki tawalakaya zi diri gara, a juva ɓa ɗif paŋ ɗa a ɵina witaw, amma a muɗa seŋ witaw kai, a za hiy witaw kaalai.

²⁰ Buri ɓa hiy na wiini ɗif, a va jre -ɗikat na wiini Alaw amai kai.

²¹ Nɵa lai, ki hini wazagai na haharai paŋ edi, gaini wazagai na maafanai paŋ, n'a sirɓa edi tiki par, ki yimi seŋ n'Alaw a paŋ warɗi agulki, n'a kiɗa aŋ kûriki lai gaini hangal.

²² Ki tiɓi pin ɵeŋni kadai kai, ki zi rhai wiini siki dama kai.

²³ Buri ɓa ɗif n'a ɵina seŋ, amma a za pini kai ɗa, a na mainiɗif n'a tala arni n'a wa gaini su ɗa war kotrom nɵa,

²⁴ n'asakal n'a tala sini li, a hala wiini, gaini yafai kai, miɗini a wula gaini sini n'a talaŋ ɗa.

²⁵ Amma ɗif n'a hitra gadai na gai futini, gadai n'a sa pli n'edi, n'a sumna warni lai, n'a hitraŋ, asakal par miɗini a wula gaini kai, amma buri a za pini, - a za sda gaini lai ɗa, - ɗif hanɗa aga a nava ɓiki war sdani lai.

²⁶ Na ɓa ɗif a tala sini ba a ɗif zi hûni Alaw, amma a wa aleŋze miɗi alsini kai, amma a rha sini dama ɗa, yimini na war Alaw ɗa a bunda aŋ wala kadai.

²⁷ Yimi na war Alaw na jre, na hilu, na gaini didiɓi kai, na wuzani arni Alaw n'Api lai ɗa, a na ɗa ɓa: Ku tika hangalku siɗi na huyokai, gaiɗi falakai na war greŋ, war girɗi, aŋ giɗima suku burini bli na ɓlok na wiiɗi yai ɗa lai.