Titus 2 - Ɗû na sɗik na wiini Alaw

Hitrai na wiiɗi ɗai na walakai

¹ Amma tuku ɗa, ku muɗa ɗa a wala n'a kata pin hitri na jre.

² A juva ɓa, ɗai na walakai ɗa, e simni gaini hangal e si hormo wiini siɗi, e kûli siɗi kai, pɗamai war yimi, war diri war siiki lai.

³ A juva ɓa falakai na walakai lai e piyi payai n'a kata siɗi na sɗik ɗa, aga e gini marɗi kai, e bindi aŋ bagakaini sul kaalai, aga e hitri edi a sɗa na pɗamai,

⁴ kapai e hitriɗi wiiɗi falakai na drakai ɗa, aŋ diriɗi maɵagaiɗi gaiɗi aliɗi.

⁵ aŋ kûli siɗi kai, aŋ simni hilu, aŋ zi sɗa n'aha gai futini, aŋ zi pɗem, aŋ gidi piɗi maɵagaiɗi, kapai ɗif a muɗa meefeŋ sin seŋ n'Alaw kai.

Hitrai na wiiɗi gawlakai

⁶ Nɵa lai, ku hitriɗi gawlakai ɗa aŋ kûli siɗi kai.

⁷ War wazagai paŋ tuku dama aga ku za suku aŋ ɗif na ɗai e tili sini war sɗa na pɗamai lai. Ku hitra hitri na hilu, na ɗif a sɗa aŋ miisaŋ kai.

⁸ Ku muɗa seŋ na jre, na ɗif a kiɗa aŋ nava wala na meefeŋ warni kai, kapai gawmu a tika siyer, a nava wala ktai na meefeŋ aŋ muɗa muudumu kaalai.

Hitrai na wiiɗi ɗai zi sda

⁹ Ɗai zi sɗa aga e ɵini piɗi epin-gezakaiɗi ɗa war wazagai paŋ, e zi siɗi arɗi pɗamai, e sispi gaiɗi kai.

¹⁰ Aga e tiki walaɗi ktai kai; amma aga e zi siɗi kureɗ aŋ ɗai na jreɗi a na, kapai e sini hormo wiini hitri na wiini Alaw, Ɗif-zi-kûri na wiimu war wazagai paŋ.

Ɗai na wiini Yesu Kristu

¹¹ Burini yum na wiini Alaw, n'a sa kûri wiiɗi ɗai paŋ ɗa, a siŋkasi edi ya.

¹² A hitrumu aŋ bula edi sini meefeŋ, gaini wazagai na pɗamai na wiiɗi yai hanɗa, aŋ piyumu tiyana gaini hangal war jre, war hunai na pin Alaw lai,

¹³ won hlai na mu ɗumu aŋ biyumu mefeŋ n'abai n'aga a halasi, gaiɗi abai na wiini Alaw na wiimu n'abai, Ɗif zi kûri na wiimu Yesu Kristu, n'aga a siŋkasi edi gaglai.

¹⁴ A sa sini dama edi burimu, kapai a wurumusi edi war meefeŋ paŋ par, kapai a zumu edi aŋ ɗai na hilu na wiini, gaini midini dama, n'e si siɗi edi min sɗa na pɗamai.

¹⁵ Aga ku muɗa ɗa maini hanɗa nɵa, ku sa arai zi pi ɗa maini hanɗa nɵa, ku gada maini hanɗa nɵa, gaini gdaŋ, ku hina ɗif a miisuku kai.