Sofoniyas 3 - Ɗû na sɗik na wiini Alaw

Yeruzalem te ɵina wulani Alaw kai

¹ Haw gara burini fuŋ n'abai n'a ɵina seŋ kai, na hihir, n'a za gir wiiɗi ɗai.

² A ɵina wule n'a sa siɗi kai, a ɵina Gat kai, a hina sini war tini EPIƊ-ƊAI kai, a torosi sini Alaw na wiini kaalai.

³ N'abakai n'arbaɗi e ɗa kal kal, maini gurnai n'a nuuma nɵa, ɗaiɗi zi ɗûkûli sariya e ɗi belemke n'a paya simini koskoi, amma a giɗima wala amai buri dawai kai.

⁴ Ɗai ɗi na mini Alaw e ɗi ɗai n'e nifi kai, e siɗi wala kai, paakai zi ɓaka e si hormo wiini wala n'a sa sini Alaw kai. E hi amai midini seŋ zi gadai.

⁵ EPIƊ-ƊAI a na arbaɗi dam, a jre, a za wala na meefeŋ kai, gorof par paŋ a ziti sariya na wiini edi war gaglai, a wula kai sam, amma ɗif na meefeŋ siyer pini arni kai.

⁶ Mu vada pinzibaɗi ɗai na zamai edi, ɵagaɗi na mogo kai mu tuuraŋ edi, futiɗi mu ɓulkaŋ edi, ɗif ktai maa a vuga warni kai, fuŋɗi n'abakai, mu tuuraŋ edi kaca kaca, ɗif n'a vuga arbani fuŋ aŋ kai, ɗif a hina warni kir kai.

⁷ Mu muɗa gaini wara dama ɓa aga ku hunaŋa ɗi! Aga ku ɵina gadaiŋa ɗi! Dalamɗi aga a vada edi kai, hlai paŋ na mu faka amai siɗi, nagai e pirmi tar war zini meefeŋ paŋ.

⁸ Buri nɵa, biyiŋa! - a muɗaŋ a EPIƊ-ƊAI. Biyi mefeŋ n'aga mu faka amai aŋ pa seŋ midiki ɗa, buri a rga wara buri mu tipiɗi ɗai amai, mu diŋgiɗi paakai amai, mu vada hiyŋa siɗi, abaini hiyŋa paŋ, buri duniya gaini hlaiɗi paŋ aga te ya edi gaini suwarni hiyŋa.

Alaw aga a bindiɗi arɗi ɗai sini

⁹ Buri aga mu siɗi seŋ zi miɗi na hilu war miɗi, kapai nagai paŋ e yiki yikini EPIƊ-ƊAI. Kapai e hûrgû azumai wuzani, miɗi gaini tipi ktai.

¹⁰ Koo ɓa edi gaigai duɓani arakai na wiiɗi Nubiya par ɗi, nagai n'e hûrgû azumai wuza, nagai na mu ɵiriɗi edi, aga e kiŋasi like.

Piɗi Izrayel n'a hina

¹¹ War mefeŋ ni ɗa, aga ku za siyer burini sdaku na meefeŋ na ku zaŋ ɗa kai, gaini ɵinini gat-kai na ɓa ɗa kai, buri war mefeŋ ni, aga mu yimiɗi edi arbaki par, nagai n'e kûli siɗi, tuku aga ku hina kûlûni-si na wiiku n'amai midiɗi huwuŋ na sɗik na wiya ɗa edi.

¹² Arbaki par aga mu hiniɗi ɗai n'e hûsi siɗi gaiɗi na murgakai, n'aga e piyi zinai ta par.

¹³ Piɗi Izrayel n'a hina aga e zi meefeŋ kir kai, aga e miɗi eles kir kai, miɗi z'eles aga a niyasi war miɗi par kir kai. Amma aga e simi, e nivi hlai zi feŋ lai, ɗif n'aga a huwyiɗi aŋ kai.

Yeruzalem te rga amai li pra

¹⁴ Ɗuula gaini firiyi, ahiɗi Siyon, ɵiɓa liŋleŋi Izrayel, firiya, riya gaiɗi agulku paŋ, ahiɗi Yeruzalem.

¹⁵ EPIƊ-ƊAI a tika gir na muduku par edi ɗaw, a sini mini gawku edi ta. Paiɗi Izrayel, EPIƊ-ƊAI gaini midini dama a na arbaki dam. aga ku huna meefeŋ kir kai.

¹⁶ War mefeŋ ni, aga e miɗi war Yeruzalem ɓa: Ku huna kai, ahiɗi Siyon, ku mula tuku azumai puku kai.

¹⁷ EPIƊ-ƊAI, Alaw na wiiki a na arbaki dam a gaŋgalaŋ n'a kuku aŋ rɗa amai. A na firiya gara buriku, war agulni ku bunda na hehe sek sek, a na ɗuula ɗuwal zi firiyi gara buriku.

¹⁸ Maini yivai na wiini fet nɵa, gir ɗa aga mu vadaŋ edi buriɗi nagai n'e ɗi ka war kwimi, arbaku gaiɗi a na ka gaigai, a wala zi siyer n'a na ka midiɗi Yeruzalem.

¹⁹ War mefeŋ ni ɗa, aga mu faka amai siɗi nagai paŋ n'e ɗi ka e zuku gir, adumai na daŋlaŋai aga mu kurɗaŋ, na ɓa a na gaini ɵiri edi, aga mu tapaŋ amai. Miisi na ki ɗa ki niviŋ, aga mu bundaŋ aŋ kol war yai paŋ na ki ɗi ka warni.

²⁰ War mefeŋ ni aga mu wiyikisi aha, hanɗa war mefeŋ n'aga mu tipiki amai. Arbaɗi ɗai na midini afti paŋ, yikiki aga a wa, aga ki nivi kol lai, won hlai n'aga mu wiyiɗisi nagai n'e yimiɗi edi mini gaw. Hanɗa a miɗi na sini EPIƊ-ƊAI par.