Sofoniyas 1 - Ɗû na sɗik na wiini Alaw

¹ Seŋ n'EPIƊ-ƊAI a miɗiŋni wiini Sofoniyas, ahini Kusi, Kusi ahini Gedaliya, Gedalyia ahini Amariya, Amariya ahini Ezekiyas war mefeŋ na wiini Yoziyas ahini Ammon pai na Yuda.

Alaw aga a za hiy siɗi ɗai na war duniya paŋ

² Aga mu vada wazagai na midini afti edi paŋ: Hanɗa a miɗi na wiini EPIƊ-ƊAI.

³ Aga mu vidiɗi ɗai gaini wazagai n'ezini puɗu puɗu, wala zi ɗufli n'arbani hlai n'amai gaini hilif na warni yem-ra edi, aga mu vada edi wala na ka ɗif warni tuwur, aga mu vidiɗi ɗai edi warɗi yai par hanɗa a miɗi na wiini EPIƊ-ƊAI.

Alaw aga a za hiy siɗi Yuda gaiɗi Yeruzalem

⁴ Aga mu za hiy siɗi Yuda, siɗi ɗai na Yeruzalem paŋ, wala n'a hina pini Baal, yikiɗi nagai n'e zi ɓakani gaiɗi paakai zi ɓaka na wiini lai.

⁵ Nagai n'e hûrgû azumai amai midini dalam, wuzani vok zi gaw n'arbani hlai n'amai, nagai n'e hûrgû azumai wuzani, EPIƊ-ƊAI, amma e hi wala miɗi war yikini Milkom n'Alaw na wiiɗi lai.

⁶ Nagai e sini duɓaɗi wiini EPIƊ-ƊAI e piyiŋ kaalai, e zilbiŋ burini wala kaalai.

⁷ Simni hiyak wuzani Epiɗ-ɗai ALAW buri mefeŋ na wiini EPIƊ-ƊAI a na gobi. EPIƊ-ƊAI a zizina ɓaka ya, nagai n'e yikisi e ziɗi edi aŋ hilu ya.

⁸ War mefeŋ na wiini ɓaka na wiini EPIƊ-ƊAI aga mu za hiy siɗi ŋarakai gaiɗi yerimakai, siɗi nagai paŋ n'e wi sapa siɗi maiɗi morkokoi nɵa ɗa.

⁹ War mefeŋ hanɗa aga mu za hiy, siɗi nagai n'e pri miɗini min hlai buri e vi dalam na wiini epiɗi, gaini wazagai zi karai gaini rhai zi yel.

¹⁰ ɵini pɗem war mefeŋ ni: A miɗi na wiini EPIƊ-ƊAI. Ɗuwal aga a wasi war min hlai n'e yikiŋ ɓa: Magala na wiini Hilif par, ciriyi aga a ɵinasi war kartiye na hehe par, bagawa n'abai amai midini huwaŋai n'agogoi.

¹¹ Ɗûûli tiki ɗai na war Maktes, buri ɗai zi sakala paŋ aga e bi, ɗai zi farai paŋ aga e mri.

¹² ɵini pɗem war sarti ni ɗa, aga mu fifikiti Yeruzalem gaini badri aga mu za gaw siɗi nagai n'e simni warni muluk n'e hiini ɓa: EPIƊ-ƊAI a za wala na pɗem kai, na meefeŋ kaalai.

¹³ ɵini pɗem, faraiɗi aga e virmiŋ, fuŋɗi aga a tuura edi. Aga e rgi dalam amma aga e simni warni kai, aga e pi luwuŋ zi vin amma aga e ci vinni kai.

Mefeŋ na wiini EPIƊ-ƊAI a na gobi

¹⁴ A na gobi, mefeŋ n'abai na wiini EPIƊ-ƊAI, a na gobi, a na purmasi. Ɗai aga e ɵi hama war mefeŋ na wiini EPIƊ-ƊAI ɗif na kurfuk tekeɗe ɗi kaw aga a paya zinai.

¹⁵ Mefeŋ hanɗa a mefeŋ zi hiy n'abai, a mefeŋ zi gir, zi mili hunai, a mefeŋ zi ɓilki n'edi, a mefeŋ na gegeŋ, a mefeŋ zi ɗugul gaini hlai zi digi,

¹⁶ a mefeŋ na faana aga a tuwa gaini ɗuwal zi gaw sini fuŋ n'abai na gaini ɵaga, gaini fuŋ n'amai mogo kai.

¹⁷ Aga mu wiiɗi ɗai war gir n'abai, aga e titimi hlai maiɗi ɗai na malvanai nɵa, buri ɓa e zi tuwur sini EPIƊ-ƊAI. Felɗi aga a ka azumai maini yem nɵa, kopoŋɗi aga a hofa maini wala na nafani kai nɵa.

¹⁸ Arzaŋ gaini or na wiiɗi aga a kûrɗiɗi kai, war mefeŋ zi hiy na wiini EPIƊ-ƊAI. Afu na wiini hiyni aga, a yiti duniya gaini hlaiɗi paŋ; aga a vidiɗi ɗai na midiɗi duniya paŋ, buri hanɗa a gir n'abai.