Siŋki n'edi 8 - Ɗû na sɗik na wiini Alaw

Tampoŋ n'ag'aŋ muguzak gaini wala zi yi wazagai zi ɗûgûdi zi lûgûzi zi or

¹ Won hlai n'Ahiɗi adumi a haza tampoŋ n'ag'aŋ muguzak edi ɗa, hlai n'amai ɗa a bunda liyik haa gobi galni ler ɗaw ɗi.

² Mu tiliɗi ɗai zi ɵeŋ na war fuŋ-n'Alaw muguzak n'e ɗiyi wuzani Alaw, e siɗi faana tiɗi muguzak.

³ Ɗif zi ɵeŋ zamai ktai a halasi, a ɗiya midini gûwiŋ zi ɓaka, wala zi yi wazagai zi ɗûgûdi zi lûgûzi zi or tini ɗaw. E sini wazagai zi ɗûgûdi zi lûgûzi viya kapai a tapaŋ gaini siiwa na wiiɗi na sɗik paŋ miɗini gûwiŋ zi ɓaka zi or n'a na wuzaɗi paramai zi pai ɗa.

⁴ Agiyiŋ na wiini wazagai zi ɗûgûdi zi lûgûzi gaini siiwa na wiiɗi na sɗik a hala amai wuzani Alaw, war tini ɗif zi ɵeŋ na war fuŋ-n'Alaw par.

⁵ Ɗif zi ɵeŋ na war fuŋ-n'Alaw a tikasi wala n'e yi wazagai zi ɗûgûdi zi luguguzi gaini ɗa, a vaŋ gaini afu na war gûwiŋ zi ɓaka par, a ɵiŋkaŋ azumai midini afti. Alaw zi ɓarai a ɓara, wule a wa, wilɗi a wulɗa, afti a jiriya lai.

Faana na ɵaara n'avut

⁶ Nɵa ɗai zi ɵeŋ na war fuŋ-n'Alaw na muguzak, na gaini faana na muguzak tiɗi, e zizini siɗi aŋ biyiŋ.

⁷ Ɗif zi ɵeŋ n'avut a biyiti na wiini. Wutiŋ gaini afu na gaini ɵihiɗi gaini fel a yakasi azumai midini afti, gal n'ag'aŋ hu na wiini afti a ya edi, gal n'ag'aŋ hu na wiini luwaŋai a ya edi lai.

⁸ Ɗif zi ɵeŋ na war fuŋ-n'Alaw n'ag'aŋ sulu a biyiti faanai na wiini. Huwuŋi ktai n'amai, n'afu a na yiti te kɵasi azumai arni yem-ra n'abai, gal n'ag'aŋ hu na wiini yem-ra-n'abai ɗa a bunda aŋ fel.

⁹ Gal n'ag'aŋ hu na wiini wazagai zi rgi n'arni yem, na gaini suŋfa paŋ ɗa a mra edi, gal n'ag'aŋ hu na wiini hulamai a ɓilka edi lai.

¹⁰ Ɗif zi ɵeŋ na war fuŋ-n'Alaw n'ag'aŋ hu a biyiti faanai na wiini, maaɵiki n'amai te kɵasi azumai amai war hlai n'amai par, te ya maini kalu z'afu nɵa, te kɵa miɗini gal n'ag'aŋ hu na wiini ra, gaini hlai zi liiwi yem.

¹¹ Yikiɗi maaɵiki hanɗa ɓa Absinte; gal n'ag'aŋ hu na wiini yem a bunda aŋ absinte, ɗai viya e mri burini yem, n'a bunda ɗewek hanɗa.

¹² Ɗif zi ɵeŋ na war fuŋ-n'Alaw n'ag'aŋ puɗu a biyiti faanai na wiini, gal n'ag'aŋ hu na wiiɗi futi a dugo gal n'ag'aŋ hu na wiini tile, gaini na wiini meeɵek nɵa lai. Kapai gal n'ag'aŋ hu a bunda gegeŋ, girvudi ɗa te ba gal n'ag'aŋ hu na wiini gaglaiɗi edi, duvuk ɗa nɵa lai.

¹³ Mu tala, mu ɵina muka ktai n'a na ɗufla amai arbani hlai n'amai a muɗa gaini wulani amai maini nɵa: Haw gara, haw gara buriɗi ɗai na midiɗi yai, haw gara buriɗi, burini wulani faana na hu n'aga a wa, na ɗai zi ɵeŋ na war fuŋ n'Alaw na hu aga e biyiŋ ɗa.