Siŋki n'edi 7 - Ɗû na sɗik na wiini Alaw

Alaw a tika tampoŋ na wiini midiɗi ɗai 144.000

¹ Asakal hanɗa, mu tala ɗai zi ɵeŋ na war fuŋ-n'Alaw puɗu, gaini ɗiyi edi war koŋɗi yai na na puɗu zaw zaw. E ɗili smer na puɗu na midini afti, kapai smer a vuvuwa midini afti kai, midini yem-ra n'abai kai, miɗini luwuŋ ktai kaalai.

² Mu tala ɗif zi ɵeŋ na war fuŋ-n'Alaw na zamai ktai, a halasi piɗi futi na dawai par par, gaini tampoŋ na wiini Alaw na karni tini. A ɗuula gaini wulani amai siɗi ɗai zi ɵeŋ na war fuŋ-n'Alaw na puɗu na spak a sa siɗi buri e zi meefeŋ sin afti gaini yem-ra-n'abai, a muɗa:

³ ki zi meefeŋ sin afti gaini yem-ra-n'abai gaini luwaŋai kai haw, haa mu tukumu tampoŋ miɗini arɗi ɗai zi sɗa na wiini Alaw na wiimu kafa.

⁴ Mu ɵina piɵiɗi vokɗi nagai na tampoŋ a tika miɗini arɗi ɗa, ɗai dubu miya ktai gaini doogo doogo puɗu pi puɗu war pinzibaɗi aliɗi Izrayel paŋ par.

⁵ War pinziba na wiini Yuda, ɗai dubu doogo pi sulu, na tampoŋ a tika midiɗi, war pinziba na wiini Ruben, ɗai dubu doogo pi sulu, war pinziba na wiini Gad, ɗai dubu doogo pi sulu,

⁶ war pinziba na wiini Aser, ɗai dubu doogo pi sulu, war pinziba na wiini Neftali, ɗai dubu doogo pi sulu, war pinziba na wiini Manasse, ɗai dubu doogo pi sulu,

⁷ war pinziba na wiini Simeyon, ɗai dubu doogo pi sulu, war pinziba na wiini Levi, ɗai dubu doogo pi sulu, war pinziba na wiini Isakar, ɗai dubu doogo pi sulu,

⁸ war pinziba na wiini Zabulon, ɗai dubu doogo pi sulu, war pinziba na wiini Yosef, ɗai dubu doogo pi sulu, war pinziba na wiini Benyamin, ɗai dubu doogo pi sulu lai.

Firiɗi ɗai n'abai na midini afti paŋ par a tapasi wuzaɗi Paramai zi pai

⁹ Asakal hanɗa, mu tala firiɗi ɗai n'abai, na ɗif a kiɗa aŋ pɵiɗi kai, midini afti paŋ par, war pinziba paŋ par, arbaɗi ɗai paŋ par, war meme meme paŋ par lai. E ɗiyi wuzaɗi Paramai zi pai, gaini Ahiɗi-adumi lai, gaini rob na muɗukwi siɗi, gaini goyorni huura war tiɗi lai.

¹⁰ E ɗûûli gaini wulaɗi amai e miɗi: kûri a wiini Alaw na wiyi, n'a sumna midiɗi Paramai zi pai, a wiini Ahiɗi-adumi ɗa lai.

¹¹ Ɗai zi ɵeŋ na war fuŋ-n'Alaw paŋ e ɗiyi ɵimaɗi Paramai zi pai gaiɗi n'abakai zi ɵi wuze, gaini wazagai zi rgi na karni na puɗu lai, e gûniɗi azumai, e yiki siɗi azumai arɗi gaini pi azumai wuzaɗi Paramai zi pai, e siiwi tin Alaw.

¹² E miɗi, Amen! Ɓiki, kol, yel, zini tese, hormo, spak, gaini gdaŋ lai sini Alaw na wiyi, haa hlai n'a vada kai, n'a vada kai. Amen.

¹³ Nɵa ktai arbaɗi n'abakai zi ɵi wuze a zilbaŋa: Nagai na gaini rob na muɗukokai hanɗa, e ɗi miɗi asiya ɗa? E hilisi wata par ɗa?

¹⁴ Mu wiyini seŋ Epin-geza, ku sɗaŋ ɗa ku tuku! Nɵa a muɗaŋa: Hanɗa e ɗi nagai n'e vigisi arni gir n'abai ɗa par, nagai e mi rob na wiiɗi edi, e ziŋ edi muɗukwi tal war fel na wiini Ahiɗi-adumi.

¹⁵ E ɗiyi wuzaɗi Paramai zi pai na wiini Alaw na ɗa buri hanɗa, nagai e ɗa siiwi tini girvudi gaini duvuk paŋ, amlai war hlai na sɗik na wiini, ni n'a sumna midiɗi Paramai zi pai ɗa aga a miliɗi aha war dalamni;

¹⁶ Wiyamai aga te ziɗi kir kai, sai aga te ziɗi kir kaalai, futi aga te yiɗi kir kai, hlai z'afu aga a ziɗi kaalai.

¹⁷ Buri ɓa Ahiɗi-adumi n'a na arbaɗi Paramai zi pai ɗa, aga a za aŋ ɗif zi giɗimi na wiiɗi, aga a ɵa wuzaɗi aŋ kiɗi sin hlai zi liwi yem zi suŋfa, Alaw aga a ɵata tuwi n'arɗi paŋ edi lai.