Siŋki n'edi 6 - Ɗû na sɗik na wiini Alaw

Hizini tampoŋ na ɵaara n'avut

¹ Won hlai n'Ahiɗi-adumi a mala wala zi diɓiki ktai arbani na muguzak edi ɗa, mu na fu aŋ talaŋ, mu ɵina ktai arbani wazagai zi rgi na karni na puɗu a muɗa gaini wule na wiini Alaw zi ɓarai: Halasi.

² Nɵa, mu tala tili plis na muɗukwi, ni n'a sumna miɗini gaini taŋ tini ɗaw, bogorai te sa sini, a hala sek ɗa aŋ gaini rɗi amai, aŋ rɗa amai pra.

³ Hlai n'a haza tampoŋ n'ag'aŋ sulu edi ɗa, mu ɵina wala zi rgi na karni n'ag'aŋ sulu a muɗa: Halasi.

⁴ Mu tala plis zamai na mekele maini afu nɵa, a niyasi edi, ni n'a sumna miɗini ɗa spak a sa sini buri a tika ɵeɗ edi midini afti par, kapai ɗai e fiɗi marɗi edi, kaɵkar n'abai a sa war tini.

⁵ Hlai n'a haza tampoŋ n'ag'aŋ hu edi ɗa, mu ɵina wala zi rgi na karni n'ag'aŋ hu a muɗa: Halasi. Nɵa mu tala, plis ktai mirɗek, a niyasi edi. Ni n'a sumna miɗini ɗa, wala n'e tiki kilo gaini a na fu tini.

⁶ Mu ɵina wala ktai maini wule nɵa, a niyasi edi arbani wazagai zi rgi na karni na puɗu par, a muɗa maini nɵa: Vrakni sɗa na war yivai dam ɗa a wura algama kilo ɗaw, a wura orge kilo hu lai. Amma emel gaini vin ɗa, ku za wala na meefeŋ sini kai.

⁷ Hlai n'a haza tampoŋ n'ag'aŋ puɗu edi, mu ɵina wulani wala zi rgi n'ag'aŋ puɗu a muɗa: Halasi.

⁸ Mu tala, plis na bogoro maini ɵimaɗi luwŋ na hirnaŋ nɵa, ni n'a sumna miɗini yikini ɓa Mri, hlai zi simni na wiini mri pini su lai. spak a sasi sini buri a vada gal n'ag'aŋ puɗu na wiini afti edi, a sa sini buri a fiɗiɗi ɗai edi gaini kaɵkar, gaiɗi wiyamai, gaini vlak gaini wazagai n'edi buza na midini afti lai.

⁹ Hlai n'a haza tampoŋ n'ag'aŋ ɵim edi ɗa, mu tala suŋfaɗi nagai n'e fiɗiɗi edi burini seŋ n'Alaw gaini zaida n'e ziŋ ɗa lai ɗa, azumai pin gûwiŋ zi ɓaka.

¹⁰ E ɗûûli e miɗi: Haa kaswata ɗa, Epin-gezayi, na sɗik, na jre, aga ku yima azuku aŋ ziti sariya, aŋ zilba felyi tiɗi ɗai na midini afti ɗa?

¹¹ Ɗif paŋ aŋ gaiɗi rob na na muɗukwi yaw yaw, miɗi a muɗa siɗi buri e simni gaini hangalɗi, buri hlai n'agwi, haa pɵiɗi marɗi zi sɗa gaiɗi tawalakaiɗi n'aga e fiɗiɗi edi maiɗi nagai nɵa a va amai.

¹² Hlai n'a haza tampoŋ n'ag'aŋ ɵaara edi ɗa, mu tala wala ktai maini nɵa: Ziriyini afti n'abai a za, futi te bunda murɗiki maini sapa zi tuwi na mirɗek nɵa, tile a bunda maini fel nɵa,

¹³ meeɵek n'arbani hlai n'amai a yakasi azumai midini afti maini alini luwuŋ Fige n'a yaka won hlai na smer na gdaŋ a vuvuwa nɵa.

¹⁴ hlai n'amai a faɗa amai agwiya agwiya maiɗi genai n'e fiɗiti amai nɵa. Huwaŋai gaini wudi paŋ aga a jogo edi war balamni par.

¹⁵ Paakai na midini afti gaiɗi n'abakai zi ɵi wuze, gaiɗi abakai na wiiɗi askarai gaiɗi ɗai zi farai gaiɗi zi spak, ɗai kafa, bagakai gaiɗi kempekai lai e hili e ŋûyi siɗi warni waŋ na sini huwaŋai, amai arbani ali-fuŋ lai.

¹⁶ E miɗi sin huwaŋai gaini ali-fuŋ maini nɵa: Yikisi azumai midiyi, ŋuyiyi cok, wuzani arni ni n'a sumna midiɗi Paramai zi pai, gaini hiy na wiini Ahiɗi-adumi ɗa lai.

¹⁷ Buri ɓa mefeŋ n'abai na wiini hiy na wiiɗi a cosi li, n'a kiɗa a ɗiya mini ɗa asiya ɗa?