Siŋki n'edi 4 - Ɗû na sɗik na wiini Alaw

Paramai zi pai na wiini Alaw gaini siiwa na war hlai n'amai

¹ Asakal hanɗa mu tala min hlai ktai gai mili mal amai war hlai n'amai, wule n'avut na mu ɵinaŋ a muɗaŋasi seŋ ɗa, a wa maini faana nɵa, a muɗa: Niyasi amai na, kapai mu suŋkuku wazagai n'a ga a za avut sek ɗa.

² Tizaw tar, Seze a niya sa, mu tiliti Paramai zi pai ktai amai war hlai n'amai. Paramai hanɗa, ɗif gaini simni midiɗi dam.

³ Ni n'a sumna midiɗi ɗa, sini a sɗa maini ahi-fuŋ yaspis nɵa, maini ahi-fuŋ sardoine nɵa lai, Paramai zi pai ɗa gai guni azumai gaini kraŋ gun, kraŋ hanɗa a tala maini emerode nɵa.

⁴ Paramai zi pai hanɗa, paramakai zi pai zamai caaɓa pi puɗu a gûniti amlai gun. Midini paramakai zi pai hanɗa n'abakai n'e ɵi wuze caaɓa pi puɗu gai simni ca ca. Sapa na siɗi muɗukwi, bogorai zi or gaini pi midiɗi tiɓ tiɓ lai.

⁵ Wilɗi gaini wule, gaini Alaw zi ɓarai lai a niyasi edi siɗi Paramai zi pai ɗa par, lampa n'afuni a yima gdaŋ muguzak a na fu wuzaɗi Paramai zi pai hanɗa, hanɗa a Seze na muguzak na wiini Alaw.

⁶ Wuzaɗi Paramai zi pai hanɗa, wala ktai a tala maini yem-ra-n'abai na ziŋya nɵa, maini kristal nɵa, Amlai arbaɗi Paramai zi pai ɗa lai, edi par ɵimaɗi ɗawwa lai ɗa, wazagai zi rgi na karni a na fu puɗu, sini paŋ a arai paŋ, wuzani par lai duɓani par lai.

⁷ Wala zi rgi na karni n'avut ɗa a sɗa maini gurnai ɵa, n'ag'aŋ sulu ɗa a sɗa maini ahi ɵe ɵa, n'ag'aŋ hu ɗa arni maini ɗif ɵa, n'ag'aŋ puɗu a na maiɗi muka na te n'a ɗufla nɵa.

⁸ Wazagai zi rgi na karni na puɗu hanɗa paŋ baadani ɵaara-ɵaara, sini paŋ ɗa a arai paŋ, haa amlai warni. Duvuk kai, girvudi kai, e miɗi maini nɵa: Sɗik, sɗik, sɗik, a Epiɗ-ɗai Alaw, Alaw zi spak paŋ, ni n'a na ka, n'a na, n'a na halasi lai.

⁹ Hlai paŋ na wazagai zi rgi na karni a faka li aŋ sa kol gaini hormo gaini zini tese lai sin ni n'a sumna midiɗi Paramai zi pai, sini ni n'a na karni haa hlai n'a vada kai, n'a vada kai lai ɗa,

¹⁰ n'abakai zi ɵi wuze na caaɓa pi puɗu e yiki siɗi azumai wuzani ni n'a sumna midiɗi Paramai zi pai ɗa. E siiwi tin ni n'a na karni haa hlai n'a vada kai, n'a vada kai ɗa, e mili bogorai na midiɗi azumai wuzaɗi Paramai zi pai, e miɗi:

¹¹ Epiɗ-ɗai Alaw na wiyi, tuku ku kiɗa, aŋ nava kol gaini hormo gaini spak, buri tuku ku rga wazagai paŋ ku tuku, pin diri na wiiku ɗa, wazagai paŋ a zasi, a rgasi lai.