Siŋki n'edi 2 - Ɗû na sɗik na wiini Alaw

Letre sin Tipi na war Efesus

¹ Ɗo sin n'abai zi giɗimi Tipi na war Efesus maini nɵa: Ni n'a yima meeɵek na muguzak war tini na wus, n'a na paya arbani wazagai n'e higi lampa amai sini na muguzak zi or, a na muɗa maini nɵa:

² Mu sɗa sdaku na ku na zaŋ, gaini was na ku na fuɗaŋ ɗa lai, gaini kurfukku lai; mu sɗa edi gaglai ɓa tuku ɗa ku kiɗa ku yimiɗi na maafanai suku kai, ku tetemiɗi nagai n'e yiki siɗi ɓa e ɗi apostel, kapai e ɗi apostel kaalai, ku niviɗi ɓa e ɗi z'alasakai.

³ Ku na kurfuk, ku sɗa gir burini ykiŋa, ku kaya kai.

⁴ Amma wala na fuɗaŋa sa suku ɗa a hanɗa: Ku hina diriku n'avut edi ta.

⁵ Buri nɵa, hina muduku a kɵa gaini hlai na ku kɵasi woni par, bunda gamai, wayasi sini sdaku n'avut ɗa, ɵa kai ɗa, na ɓa ku bunda gamai kai ɗa, aga mu halaɗi muduku, aga mu tika wala n'e higi lampa amai sini edi war balamni par.

⁶ Amma sdaku na pɗem n'a na ɗa ɓa: Ku bula gaw sin sdaɗi Nikolayitekai gaini sɗa na ta gaini mada dama mu firiyaŋ kai ɗa lai.

⁷ Ni na ɵimaɗi a na, a pɗem ɓa a ɵina wazagai na Seze a muɗaŋ siɗi Tipi. Sin ni n'a rɗa amai li, aga mu sini luwuŋ zi suŋfa n'aŋ war Paradis na wiini Alaw aŋ simi.

Letre na sin Tipi na war Smirna

⁸ Ɗo sin abai zi giɗimi tipi na war Smirna ɓa: N'avut gaini n'asakal, ni n'a mra su amma a bunda karni pra a na muɗa maini nɵa:

⁹ Mu sɗa girku gaini murgaku, - paŋ ktai ku zi farai, - gaini miisi na wiiɗi nagai n'e yiki siɗi ɓa Yudiyakai. Amma e ɗi Yudiyakai kai, e ɗi vok na wiini Satan.

¹⁰ Ku huna burini gir n'aga a za suku ɗa kai. Mat aga a pukiɗi zamai n'arbaki par warɗi daŋgai kapai a tetemiki gai futini tam, aga ki siɗi gir haa mefeŋ doogo, ɗiya war jre, koo ɓa e fuɗuku edi ɗi. Aga mu suku suŋfa ɗa aŋ bogorai.

¹¹ Ni na ɵimaɗi a na, a pɗem ɓa a ɵina wazagai na Seze a muɗaŋ siɗi tipi. N'a rɗa amai li ɗa, aga a huna wuzani mri n'ag'aŋ sulu ɗa kai. Aga a za wala agwi sini kai zaŋ.

Letre na sin Tipi na war Pergamum

¹² Ɗo sin n'abai zi giɗimi tipi na war Pergamum, ni na kaɵkar n'a suma war gal sulu paŋ aŋ tini ɗa, a na muɗa maini nɵa:

¹³ Mu sɗa hlai na ku sumna warni ɗa edi gaglai, a hlai na Paramai zi pai na wiini Satan t'aŋ warni. Yima yikiŋa tuku gdaŋ, ku pa muku miɗini yimi na wara ɗa kai, koo war mefeŋ na Antipas zaidaŋa na jre a nava fiɗi n'edi ahaki, war hlai na Satan a sumna warni ɗa.

¹⁴ Amma wazagai zamai a na, na mu firiyaŋ suku par kai ɗa. Ɗai zamai e ɗa ahaku, n'e yimi hitrai na wiini Balaam gdaŋ, Balaam n'a hitra Balak miɗini yel n'a kiɗi aliɗi Izrayel gaini war tanai. A ziɗi piɗi aŋ simi neŋ n'e zi ɓaka gaini wiini alawai zi rgi, aŋ zi maɵara lai.

¹⁵ Pra, ɗai zamai e ɗa ahaku, n'e yimi hitrai na wiiɗi Nikolayitekai tiɗi gdaŋ lai.

¹⁶ Buri nɵa, bunda gamai, ɵa kai ɗa aga mu halaɗi muduku gobi, aga mu hitimiɗi gaini kaɵkar na ma ɗa.

¹⁷ Ni na ɵimaɗi a na ɗa, a pɗem ɓa a ɵina wazagai na Seze a muɗaŋ siɗi tipi. Sin ni n'a rɗa amai li ɗa, aga mu sini manna n'aŋ gaini ŋûyi cok, gaini gorhoyo na muɗukwi ɗaw lai, miɗini gorhoyo hanɗa, yiki na hehe aŋ gai ɗû sini ɗo, na ɗif zamai a siɗaŋ kai, sai a ni n'a navaŋ.

Letre na sin Tipi na war Tiyatira

¹⁸ Ɗo sin n'abai zi giɗimi Tipi na war Tiyatira ɓa: Ahini Alaw n'arni maini afu n'a ya nɵa, n'ezini maini kiya nɵa lai, a na muɗa maini nɵa:

¹⁹ Mu sɗa sdaku na ku na zaŋ, gaini diriku gaini yimiku, gaini zinaiku na ku na zina piɗi ɗai, gaini kurfukku lai, mu sɗa edi gaglai ɓa sdaku n'asakal ɗa viya, a suwa n'avut.

²⁰ Amma wala n'a fuɗaŋa wara suku ɗa, ku hiniti Yezabel, na te yika siɗi ɓa te muni na min Alaw, te wûliɗi ɗaiŋa zi sɗa ɗa edi, te hitriɗi buri e simi neŋ n'e zi ɓaka gaini wiini alawai zi rgi, aŋ zi maɵara lai.

²¹ Mu siɗi hlai buri te bunda gamai, amma te firiya te hina maɵara na wiiɗi edi kai.

²² Tala, aga mu finiti azumai midini wala zi feŋ war gir n'abai, na gaiɗi nagai n'e zi maɵara gaiɗi lai, sai na ɓa e hinisi sɗa na maafanai na wiiɗi na li edi.

²³ Aga mu fiɗiɗi aliɗi edi, kapai a yima midiɗi tipi paŋ ɓa n'aŋ warni hinini ɗif gaini n'aŋ warɗi agulni lai ɗa, mu sɗaŋ ɗa mu ta. Aga mu sa sini asiya asiya paŋ n'arbaki pin sdani sdani.

²⁴ Amma siki tiki, gaiɗi ɗai zamai na war Tiyatira paŋ, n'e yimi hitri hanɗa kai, n'e siɗi hiini na hulum na wiini Satan ɗa duk kai, mu muɗa maini n'e ɗa miɗiŋ ɗa ɵa: Aga mu tika guma zamai midiki kai.

²⁵ Amma wala n'aŋ tiki ɗa, ki yimiŋ tiki pɗem haa mu halaɗi.

²⁶ Sin ni n'a rɗa amai li, n'a giɗima sdaŋa li haa sin vidini ɗa, aga mu sini spak midiɗi pinziba na zamai,

²⁷ aga a ŋa midiɗi gaiɗi amaraŋai zi pai zi kawwai, aga e gɵiɗi edi maini grak z’ afti nɵa.

²⁸ Maini na ta dama, mu nava spak tini Apa par nɵa, aga mu sitini maaɵiki na gorof-par.

²⁹ Ni na ɵimaɗi a na ɗa, a pɗem ɓa a ɵina wazagai na Seze a muɗaŋ siɗi Tipi.