Siŋki n'edi 10 - Ɗû na sɗik na wiini Alaw

Ɗif zi ɵeŋ na war fuŋ n'Alaw gaini maktuɓ n'agwi na gaini mili edi

¹ Mu tala ɗif zi ɵeŋ na war fuŋ-n'Alaw na zamai ktai, zi spak, a niyasi azumai amai war fuŋ-n'Alaw par, ɗugul gaini wi sini maini sapa nɵa, kraŋ gaini yimi amai midini kaai, arni a ŋala maiɗi futi nɵa, ezini maini gaarai z'afu nɵa.

² Maktuɓ n'agwi gaini mili mal aŋ tini kaai. A tikiti ezini na wus ɗa miɗini yem-ra-n'abai ɗa ta, na muni ɗa midini afti ta lai.

³ A ɗuula maini gurnai n'a nuuma nɵa. Won hlai n'a ɗuula ya, alawai zi ɓarai na muguzak ɗa wulani a wa.

⁴ Won hlai n'alawai zi ɓarai na muguzak a muɗa seŋ ya ɗa, mu firiya mu tika pa aŋ ɗo. Amma mu ɵina wule ktai amai war fuŋ-n'Alaw par a muɗa sa maini nɵa: Seŋ n'alawai zi ɓarai na muguzak e miɗiŋ ɗa ku ɗoŋ kai. Ku ŋoyaŋ ɗa warku.

⁵ Nɵa ɗif zi ɵeŋ na war fuŋ-n'Alaw na mu talaŋ gai ɗiyi zaw, ezini na ktai miɗini yem-ra-n'abai ta, na ktai midini afti ta lai ɗa a yimiti tini na wus amai,

⁶ a ha wala mini gaini ni n'a na karni haa hlai n'a vada kai, n'a vada kai, n'a za hlai n'amai gaini wazagai na warni paŋ, a ziti yai gaini wazagai na warɗi paŋ, yem-ra-n'abai gaini wazagai na warni paŋ lai maini nɵa: Hlai zi si zamai aŋ kir kai.

⁷ Amma mefeŋ na ɗif zi ɵeŋ na war fuŋ-n'Alaw n'ag'aŋ muguzak a biyiti faanai na wiini li ɗa, wazagai zi ŋoyai na wiini Alaw aga a va amai, maini na labar na pɗem a muɗaŋ siɗi ɗaini zi sda, ɗai na min Alaw ɗa nɵa.

⁸ Wule na mu ɵinaŋ a halasi amai war fuŋ-n'Alaw par a muɗa sa pra, a muɗaŋa maini nɵa: Hala, ku tika maktuɓ n'agwi n'aŋ gaini mili edi mal, edi war tin ɗif zi ɵeŋ na war fuŋ-n'Alaw, n'aŋ gai ɗiyi ezini ktai miɗini yem-ra-n'abai lai, na ktai midini afti lai ɗa.

⁹ Mu hala sin ɗif zi ɵeŋ na war fuŋ-n'Alaw, mu miɗini buri a saŋa maktuɓ n'agwi ɗa. A muɗaŋa: tikaŋ ɗi, rɓaŋ, war muku ɗa aga a tala nem maini emel n'ami nɵa, amma a niyali warku ɗa, aga a bunda ɗewek.

¹⁰ Mu tika maktuɓ n'agwi tin ɗif zi ɵeŋ na war fuŋ-n'Alaw par ɗaw, mu rɓaŋ, war ma par nem maini emel n'ami nɵa, amma won hlai na mu lumaŋ ta ɗa, a niya wara pɗem kai.

¹¹ Nɵa e miɗiŋa: aga ku muɗa seŋ na wuze pra, midiɗi ɗai viya, miɗini pinziba viya, miɗini meme viya, midiɗi paakai viya lai.