Seŋ joro 6 - Ɗû na sɗik na wiini Alaw

Ɗiya suku mini tumuŋ na wiini maiku kai

¹ Ahiya, na ɓa ku yima suku li mini tumuŋ ezini maiku, na ɓa ku ɵiɓa tuku li war tini epin-gezani wala, ezini ɗif ɗa,

² na ɓa ku yima suku li war azaw gaini seŋ na muku par, ku rga suku li gaini ɵinini-ha na wiiku lai ɗa,

³ ahiya, kapai ku pla suku edi ɗa, za maini nɵa: Hala siiwa epin-gezani wala ɗa, siika mini, buri ɓa ku kɵa war tini su.

⁴ Ku nafa futini kai ɗa, ku sumna azumai kai, ku dogo arku kai, ku kala weseŋ kaalai.

⁵ Pla suku edi tini par maiɗi wudrai na te pla siɗi mini azaw par ɵa, maini wala zi ɗufli n'a prasi edi war gurbuduk par ɵa. Ɗif na malam

Ɗif na malam gaiɗi teler

⁶ Tuku ɗif na malam, tala sini teler ɗa, tala sdani ɗa, bunda aŋ ɗif zi yel,

⁷ Teler ɗa paini aŋ kai, ɗif n'a tala sda tini aŋ kai, abaini aŋ kaalai.

⁸ Gaini hanɗa paŋ ɗa, afat ɗa a paya walani zi simi ɵimani, sarti na wiini hiɗi ɗa a tapa simi n'a kiɗa a zina pini war mefeŋ zi gir ɗa.

⁹ Tuku na malam, suku azumai ɵa waŋ haa kaswa ta ɗa? Kapai ku ɵiya amai ɗa kaswa ta ɗa?

¹⁰ Na ɓa ku kala weseŋ burini hlai n'agwi, ku duŋra burini hlai n'agwi, ku maɗa suku azumai agwi, ku ɵawa tuku burini hlai n'agwi lai ɗa,

¹¹ war hlai hanɗa, murga aga te nuvukusi aha maini ɗif zi sipili nɵa, haw ɗe a luɓasi muduku maini ɗif zi virmi wazagai nɵa lai.

Ɗif zi rhai

¹² Ɗif n'a hala gaini eles mini kaai ɗa, a ɗif n'a nafa kai, ɗif na meefeŋ.

¹³ Ɗif a muɗa gaini arni lai, gaini ezini lai, gaini ali tini lai.

¹⁴ Agulni te va gaini rhai, sai a hiina ɗa a sda na maafanai, a digiɵa humokɗi ɗai siɗi marɗi lai.

¹⁵ Ni lai, ɓilki n'edi aga a cosi miɗini tizaw, aga a tuura edi ti dama, kurgumni aŋ kai,

^16-19 Wazagai n'EPIƊ-ƊAI a daraŋ kai ɗa a na ɵaara: Tili zi miisi, alsi na te viiɗa seŋ, ti na te fuɗa ɗai na tiɗi war seŋ kai. Agul na te hiina ɗa a wazagai na maafanai, azi n'a purma mini zini meefeŋ. Zaida na jre kai n'a muɗa eles, n'ag'aŋ muguzak a na lai, a hanɗa: Ɗif n'a digiɵiɗi tawalakai siɗi marɗi.

Ɗili na sini zini maɵara

²⁰ Ahiya, yima gadai na wiini apuku muduku, hitrai na amuku te suŋku ku hinaŋ edi kai.

²¹ Ku duɓukaŋ sini hohotku pɗem, ku rgaŋ wulaku maini aidaw nɵa.

²² War hiliku gaini wiyikusi ɗa aga a ɵa wuzaku, war feŋku n'azumai aga a giɗimuku, war fikuku n'amai ɗa aga a haɗa kalaŋ gaiku.

²³ Buri ɓa gadai ɗa a lampa, hitrai ɗa a gaglai, gadai na war hitrai ɗa, a futi n'a ka sini suŋfa,

²⁴ a kutuku miɗi muni na payaiɗi meefeŋ ɗa par, mini miɗi na zubet n'aŋ miɗi muni na ku siɗiti kai ɗa par lai.

²⁵ Ku za suuna pini juf na wiiɗi muni kai, hina arɗi na te duguŋku a tunuku kaalai.

²⁶ Muni na zawar ɗa, te paya ɗa a wala n'agwi kadai, amma muni na gaini tiki ɗaw ɗa, te ba derku ɗa kap.

²⁷ Na ɓa ɗif a wa afu war ɵubuni ɗik ɗa, sapani ɗa a ya kai ɗi?

²⁸ zaw na ɓa ɗif a hala miɗini morjo gaini ezini ɗa, afu a yaŋ ezini kai ɗi?

²⁹ Ɗif n'a piyiti munini maini a na maini nɵa lai, a titimiti li ɗa aga a nafa seŋ lai.

³⁰ Ɗif n'a hala wala kapai a va warni gaini buri ɓa wiyamai te na zaŋ ɗa, ku zini yewere kai.

³¹ Amma gaini hanɗa paŋ, na ɓa e niviŋsi li ɗa a vurga wala ni ɗa azi muguzak, a ba wazagai n'ahani ɗa paŋ.

³² Ɗif n'a za maɵara gaiɗi munini ɗif ɗa, a ɗif na yel miɗini kai, ɗif n'a za maini hanɗa nɵa ɗa a ɓulka ɗa a sini.

³³ Aga e ɵiɓiŋ lai, a ba hormoni edi lai, siyerni ɗa a vada edi duk kai.

³⁴ Buri ɓa sile aga a bunda mofaɗi muni maswar, yuvai n'a firiya a vurga meefeŋ ni ɗa, aga a zaŋ gaini hiinini haw kai.

³⁵ Wala ktai n'aga a hiinaŋ aŋ vrak burini meefeŋ hanɗa aŋ kai, koo ku sini ɗa a maɗi, aga a ɗiya sini kai.