Seŋ joro 30 - Ɗû na sɗik na wiini Alaw

Miɗi na wiini Agur

¹ Miɗi na wiini Agur n'ahini Yake: Seŋ na ɗif hanɗa a muɗaŋ sini Etiyel gaini Ukal.

² Nkam, giɵibi na wiya a suwa na wiiɗi ɗai paŋ, yel na wiini ɗif murɗek aŋ mada kai.

³ Mu hitra yel kai, mu sɗa siɗi na wiiɗi ɗai na sɗik kaalai.

⁴ Ɗif n'a niya ka amai ahani Alaw na kapai a wayasi azumai gaini wiyi ɗa asiya ɗa? N'a yima ka smer amlai war tini ɗa asiya ɗa? N'a bla ka yem war sapani ɗa asiya ɗa? N'a ɗiyasi hlai na mini afti a daba woni ta ta ɗa asiya ɗa? Yikini maɵa ɗa? Ahini e yikiŋ maɵa ɗa? Siŋkaŋa haw ɗa na ɓa ku sɗaŋ ya ɗa?

⁵ Miɗi n'a niyasi mini Alaw par paŋ ɗa eles warni kai, Alaw ɗa a gamar na wiiɗi nagai n'e ŋûyi sini.

⁶ Ku tika wala mini seŋni kai, ɵa kai ɗa aga a ɓuruku, a yumuku aŋ ɗif z'eles.

⁷ Mu dara mu zilba wazagai tuku sulu, ku bula edi sa kai, ku saŋa wuzani mriŋa ca:

⁸ Ɗala meefeŋ gaini eles edi sa par ɗal, ku sitiŋa murga kaalai, farai kaalai, ku saŋa ɗa a simiŋa ta suwi,

⁹ buri ɓa, mu za li aŋ ɗif zi farai ɗa aga mada a wula gaiku, aga mu muɗa lai ɓa: EPIƊ-ƊAI ni ɗa asiya ktai ɗa? Na ɓa mu hina li war haw ɗa, mu kiɗa mu hala wala, gaini hanɗa aga mu kasi miisi sini yikini Alaw na wiya ɗa lai.

¹⁰ Ku muɗa meefeŋ sini bege wuzani epin-gezani kai, ɵa kai ɗa, aga a muɗuku seŋ na meefeŋ n'aga a fuɗuku suku.

¹¹ Ɗai zamai e ɗa e miɗi seŋ na maafanai siɗi tamaiɗi na maɵagai, e miɗi wala na pɗem siɗi tamaiɗi na falakai kaalai!

¹² Ɗai zamai e ɗa e tili siɗi hilu, paŋ ktai e mi hihir n'aŋ siɗi ɗa edi kai!

¹³ Zamai kûlûni-si a sûwiɗi su, e tili siɗi amai par midiɗi ɗai paŋ!

¹⁴ zamai e ɗa sesiyeŋɗi ɗa a kaɵkar, papalaŋɗi ɗa a muguɗ, e limiɗi ɗai na murgakai na midini afti, kapai e vidiɗi edi, kapai e vidiɗi na haw edi arbaɗi ɗai par lai!

Seŋ joro zi pɵi

^15-16 Enerek alini na falakai sulu, n'e miɗi ɓa: Sasi! Sasi! Wazagai n'a va kai ɗa a na hu, puɗu maa: Hlai zi simni na wiiɗi ɗai zi mri, muni na te wa duk kai, afti n'a va gaini yem kai, n'ag'aŋ puɗu ɗa: A afu, a muɗa ɓa ɵa ta kai.

¹⁷ Na ɓa ɗif a zini yewere wiini epini, a dara a ɵina piɗi emini kaalai ɗa, zeleke n'agoɗom wulani ra aga a co arni, bagasakai aga a sumaŋ lai.

^18-19 Wazagai a na hu, puɗu maa n'a suwaŋa suwai, mu ɵina ezini edi kai: Balamni muka n'a vuga arbani hlai n'amai, balamni wala meefeŋ n'a vuga miɗini ahi-fuŋ, balamni hulum n'abai n'a vuga war yem-ra n'abai. N'ag'aŋ puɗu ɗa, a balamni wus n'a hala siɗi muni sek ɗa.

²⁰ Muni zi maɵara na te duula mofaɗi ɗa, te za maini nɵa: Te suma ta, te girda miɗi edi sek, te muɗa ɓa: Mu za wala ktai na meefeŋ kai.

^21-23 Wazagai a na hu, puɗu maa, n'afti paŋ a turla amai burini: bege n'a bunda aŋ pai, ɗif zi dûûli n'a suma a va kai, muni na subupi na te tika wus, n'ag'aŋ puɗu ɗa, bagai na te mula bulumɗi emini gezaɗi ɗa.

²⁴ Midini afti ɗa, wazagai na karni na agogoi a na puɗu, amma yelni ɗa a yel kai.

²⁵ Teler, a vok na gdaŋni kai, amma a paya simini amlai pini war sarti na wiini hiɗi.

²⁶ Meneve na sini huwuŋ, a vok na spakni kai, amma a zizina hlaini zi simni amai sini huwaŋai.

²⁷ Ayuwi, paini aŋ kai, a hala miɗini marni waŋ.

²⁸ Agalgaɓa, ɗif a kiɗa a yimaŋ gaini tini, paŋ ktai a niya haa aha ahani pai.

^29-31 Wazagai na karni a na hu, puɗu maa na hilini a juva gara n'a tala juv lai; gurnai n'a agulni a huna kai arbani wazagai na buza, a waya duɓani wuzani wala kai, yugur n'a skira yogorai na falakai zaw yek n'a jufna haakai, n'ag'aŋ puɗu ɗa, a pai n'a hala edi mini hatam wuzani vokɗi ɗaini su.

³² Pini gɵibiku ku paya aŋ kola suku amai, amma asakal par ku talaŋ haa ɗa a juva kai ɗa, ku muɗa seŋ kir kai.

³³ Ku goja fiyaw li ɗa, a za emel, ku daba merfeŋku li ɗa, a ka fel, ku ka ɗif li warni hiy ɗa, ku glasi ɗa a sispai.