Seŋ joro 3 - Ɗû na sɗik na wiini Alaw

Yel gaini Hormo na sini Alaw

¹ Ahiya, ku wula muduku gaini hitraiŋa kai, giɗima gadaiŋa warɗi agulku.

² Na ɓa ku yimaŋ li, aga ku nafa suŋfa na mogo, aga ku nafa simni na muluk lai.

³ Pɗem gaini jre ɗa ku hinaŋ edi kai, ku ɵaŋ wulaku su maiɗi aiduwi nɵa, ɗon warɗi agulku ɗo lai.

⁴ Nɵa Alaw aga a duruku, ɗai aga e duruku lai. aga ku nafa warni wazagai paŋ lai.

⁵ Hina suku war tini EPIƊ-ƊAI gaiɗi agulku paŋ, ku pɵa midini sɗiku kai.

⁶ War payaiku paŋ, ku sɗa ɓa Ni a na, Ni aga a ɵa wuzaku.

⁷ Ku tala suku aŋ ɗif zi yel arku tuku dama kai, amma zini hormo wiini EPIƊ-ƊAI, ku yima suku edi sini meefeŋ par.

⁸ Hanɗa a kurgum n'a zuuluku, a wala n'a sa gdaŋ wiini ali tini-suku lai.

⁹ Sini kol wiini EPIƊ-ƊAI gaini derku paŋ, gaini merfeŋni seyem na wiini wazagaiku paŋ lai.

¹⁰ Vrakaiku aga a va gaini algama, wala na ku ma vin warni maa aga a va haa vin ɗa a masi edi mini par.

¹¹ Ahiya, ku bula hitrai na wiini EPIƊ-ƊAI edi kai, gadai na wiini ɗa, ku talaŋ aŋ wala na meefeŋ kai.

¹² Buri ɓa EPIƊ-ƊAI a gada ɗa a ni n'a daraŋ, maini api n'a gada ahini n'a daraŋ gara ɗa nɵa.

Yel a luwuŋ zi suŋfa

¹³ ɵeɗ aŋ miɗini ni n'a nafa yel, n'a nafa siɗi lai!

¹⁴ buri ɓa nivini ɗa, pɗemni a suwa arzaŋ, buri ɓa ribani na pini ɗa a suwa or ɗa lai.

¹⁵ Yel ɗa, pɗemni ɗa a suwa ali-fuŋ na pɗamai, wala zamai na ɗif a firiyaŋ n'a kata gaini aŋ kai.

¹⁶ Suŋfa na mogo aŋ war tini na wus, farai gaiɗi abai aŋ war tini na muni lai.

¹⁷ Futini n'abakai ɗa a futi na pɗamai, na agogoi a futi zi ɵeɗ lai.

¹⁸ Yel a luwuŋ zi suŋfa buriɗi nagai n'e yimiŋ tiɗi ɗa, ɵeɗ midiɗi nagai n'e niviŋ.

¹⁹ EPIƊ-ƊAI a tora eziɗi yai azumai gaini yel, a za hlai n'amai ɗa gaini siɗi lai.

²⁰ Gaini siɗini ɗa, yem na azumai par pini afti ɗa a luɓasi amai, ɗugul n'amai par a ɵaasi faŋ azumai lai.

EPIƊ-ƊAI a giɗima ɗif zi yel

²¹ Ahiya, siɗi gaini yel ɗa, ku ɓurwa gaini kai, ku yimaŋ tuku pɗem.

²² Aga a zina puku war payaiku, a suku simni na pɗem na gaini futini lai.

²³ Nɵa aga ku hala warɗi futi hunai puku kai, wala a ɵuɓuku aŋ tukum kaalai.

²⁴ ku fana azumai sek ɗa hunai puku kai, miɗini liyku, ku kala weseŋ gaini hangalku.

²⁵ Ku huna wala n'aga luɓasi muduku tizaw ɗa kai, ku huna ɓa na maafanai aga e cukuku kaalai.

²⁶ Buri EPIƊ-ƊAI aga a za gaiku, a hina azuku a mula warni azaw kai.

EPIƊ-ƊAI a ɓaka ni n'a dara maini

²⁷ Na ɓa ku kiɗa ɗa, ku bula edi sini ni n'a na paya zinai tuku war jre ɗa kai.

²⁸ Na ɓa wala ni ɗa aŋ tuku ɗa, ku miɗini wiini maiku ɓa: hala wiiku, kapai dawai ku wayasi ɗa kai.

²⁹ ku hiina wala na meefeŋ sini maiku, n'a na ɵimaku gaini hangalni dam ɗa kai.

³⁰ Na ɓa ɗif a zuku wala na meefeŋ kai ɗa, ku za hiy gaini aŋ blaŋ kai.

³¹ Ku za sile sini ɗif n'a kaara ɗai kai, ku tika futi n'a na za gaini kaalai.

³² Buri ɓa, ɗai na jrekai kai ɗa, e tili haharai arni EPIƊ-ƊAI, amma a marmaiɗi nagai na jrekai.

³³ Tusa na wiini EPIƊ-ƊAI a sumna miɗini pakataini ɗif na meefeŋ, amma a hina ɓiki miɗini pakatai na wiiɗi na jrekai.

³⁴ EPIƊ-ƊAI a ziɗi yewere wiiɗi nagai n'e zi yewere, amma a za yum siɗi nagai n'e hûsi siɗi

³⁵ Na a na biyiɗi na hangalai ɗa, a hormo, na tatalakai ɗa, aga a dûgû gaini siyer.