Seŋ joro 27 - Ɗû na sɗik na wiini Alaw

¹ Ku kola suku buri dawai kai, buri ku sɗa n'aga a za girna ɗa kai.

² Hina ɗif zamai a kuluku gaini yama, amma tuku dama ku kola suku kai, hina ɗif n'edi par a za hanɗa, amma tuku ku zaŋ kai.

³ Ahi-fuŋ ɗa guma, kai kai ɗa ɵa lai, amma hiy na wiini ɗif zi dûûli ɗa gumani a suwa pra.

⁴ Hiy n'abai ɗa a wala na sabab gara, hiy ɗa a na maini ra n'a huŋva edi nɵa, amma sile ɗa, n'a kiɗa a ɗiya mini ɗa asiya ɗa?

⁵ Ɗif n'a suŋkuku meefeŋku edi gaglai ɗa pɗem, a suwa marmai na kus kus ɗa.

⁶ Wuruk na marmaiku a zuŋku ɗa a siŋka dirini edi, amma gûbi na gawku ɗa a gubuku ɗa, a rhai meere.

⁷ Ɗif na gaini vi ta ɗa a kirpa emelni ami ɗa azumai pini ezini, ɗif na wiyamai blaŋ ɗa, a wala na ɗewek maa a sɗaŋ mini nem.

⁸ Ɗif n'a na giliŋa edi gaigai sini aftini par ɗa, a na maini wala ɗufli na gutni a wula arni ɗa nɵa.

⁹ Emel gaini wazagai zi ɗûgûdi zi lûgûzi ɗa a sa firiyi wiiɗi agul, pɗemni marmai ɗa a suwa arai-zi-pi na ku saŋ suku kiiku ɗa.

¹⁰ Marmakaiku gaiɗi marmakaini apuku ɗa ku hiniɗi edi kai, Won hlai na k'aŋ war gir ɗa, ku hala ahani tawalku kai, ɗif n'aŋ ɵimaku gobi ɗa, a suwa tawal n'aŋsi gaigai ɗa.

¹¹ Ahiya, za aŋ ɗif zi yel, agula aga te firiya lai, na ɓa ɗif a tirkaŋa kaw ɗi ɗa, mu kiɗa mu wiyini seŋ.

¹² Ɗif zi yel ɗa won hlai n'a tala gir a na halasi a ŋoya cok, amma nagai na gaini niyi kai ɗa e hili arni sek, e hini e siɗi gir lai.

¹³ Na ɓa ɗif a yima sini li mini tumuŋ na wiini ɗif na morkoi ɗa ku militi kaputni, na ɓa a ɗiya li eziɗi muni na morkoi ɗa, a suku kaa wala ktai ta haw.

¹⁴ Ɗif n'a halasi a ɵiɓa wuti wiini maini gorof gaini wule na gdaŋ lai ɗa, wuti hanɗa a tala maini tirki ɵa.

¹⁵ Muni zi hiy ɗa te na maini baŋa na midini dalam na faŋ a ɵa li ɗa tiɗûwini a ɗiya kai ɗa nɵa.

¹⁶ Ɗif n'a firiya a cikiti ɓa te za hiy kai ɗa, a maini ɗif n'a firiya a caka smer ɓa a ka kai, zaw n'a yima emel n'a na ka gaini tini.

¹⁷ Kawai a zaŋ edi hiniɗ ɗa a maini, ɗif ɗe a zizinaŋ ɗa a maini lai.

¹⁸ Ɗif n'a tika hangalni siɗi luwuŋini aga a suma aliɗi, ni n'a tika hangalni sini epin-gezani ɗa, aga a nafa kol lai.

¹⁹ Arni yem ɗa, arni ɗif a tala maini n'a na ɗa ɵa, war hinini, ɗif a sɗa sini maini n'a na ɗa ɵa lai.

²⁰ Hlaiɗi ɗai zi mri gaini waŋ na hulum na wiiɗi ɗai zi mri ɗa a va kai, suuna na wiini ɗif murɗek ɗa a va kaalai.

²¹ Or gaini arzaŋ a siŋka pɗemni edi ɗa a afu, amma pɗemni ɗif murɗek a siŋka edi warku yikini n'a wa ɗa.

²² Ɗif zi dûûli ɗa, koo ɓa ku gɵaŋ warɗi adini arni seyem gaini aruwadiŋ tekeɗeɗi ɗa gɵibini a tika edi sini par kai.

Yel na wiini der na basga par

²³ Sɗa faraiku ktai ktai paŋ, tikini hangal wiini faraku lai.

²⁴ Buri ɓa farai a hina kureɗ kai, abai ɗa ɗe te hina war pinziba ɵa kureɗ kaalai.

²⁵ ɵiɓa evek azumai, kuzum na hahakai a diyasi li ɗa, ku mulasi kuzum na huleŋ na amai sini huwuŋ par ɗa,

²⁶ wula adumai kapai ku za sapa suku gaini ayirni, wula afukasai, ku cikilaŋ edi ku wura vowai zamai pra,

²⁷ ku wula haakai viya kapai a za fiyaw viya, fiyaw ni ɗa, tuku gaini dalamku gaiɗi bagakaiku na falakai paŋ aga ki simi warni.