Seŋ joro 24 - Ɗû na sɗik na wiini Alaw

Ɗif na yel gaini ɗif na meefeŋ

¹ Ku za sile siɗi ɗai na maafanai kai, ku paya aŋ diŋga payaiku gaiɗi kai.

² Buri ɓa hiiniɗi a tika ɗa miɗini karai, miɗi a muɗa ɗa sai gaini meefeŋ n'aga e ziŋ ɗa.

³ Gaini yel ɗa dilimi te kiɗa te rga amai, gaini siɗi ɗa te kiɗa te ɗiya gdeŋi.

⁴ Gaini siɗi ɗa, dalamai n'amlai warɗi a va, gaini wazagai na juva, na pɗamai lai.

⁵ Ɗif zi yel ɗa spak gara, zi siɗi ɗa a riya gdaŋni amai.

⁶ Na ɓa ku ɗif na ku sɗa yelni hatam ɗa, ku kiɗa ku hitima, rɗi n'amai ɗa a za sini vokɗi ɗai n'e si gadai ɗa.

⁷ Burini ɗif na tatala ɗa, yel ɗa a na amai gaigai maiɗi huwuŋ nɵa, a kiɗa a muɗa seŋ war faada kai ɗa buri hanɗa.

⁸ Ni n'a hiina warni aŋ zi meefeŋ ɗa, aga e yikiŋ ɓa: “Epini sda na meefeŋ”.

⁹ Hiini na wiini gɵibi ɗa, a tuwur tar, ɗif n'a ɵina seŋni ɗif kai ɗa a tala arɗi ɗai aŋ wala na hihir.

¹⁰ Na ɓa, war mefeŋ zi gir ku ba arai zi pi na wiiku edi ɗa, gdaŋku ɗa a n'a kiɗa wala kai.

¹¹ Ɗif n'e rgiŋ daŋgai aŋ fiɗiŋ edi ɗa, ɵaŋ, nagai n'e ɵûri war kiɗi n'edi aŋ fiɗi ɗa, kûrɗiɗi edi.

¹² Aga ku muɗa kai ɓa: Tiyi mi siɗiŋ ɓa a na ɵa kai, ni n'a guɵura agul paŋ ɗa ni a sɗaŋ kai ɗi? Ni n'a tika hangalni suku ɗa, ni a sɗa kai ɗi? Aga a sa sini asiya asiya ɗi paŋ vrak na pini sdani sdani!

¹³ Ahiya, suma emelni ami ɗa, buri ɓa a wala na pɗem buriku, aga ku sɗa pɗemni war muku.

¹⁴ Yimaŋ muduku pɗem ɓa, yel ɗa a na buriku maini hanɗa nɵa lai, na ɓa ku navaŋ li ɗa, dawai sek ɗa aga ku nafa. Biyi na pini ɵeɗ na wiiku aga a ba edi kadai kai.

¹⁵ Tuku ɗif na meefeŋ, ku ruɓta mini magalani ɗif na jre ɗa kai, ku tuura dalamni kaalai.

¹⁶ Buri ɓa ɗif na jre ɗa, koo ɓa a kɵa azi muguzak ɗi, aga a faka amai ɗaai, amma ɗai na maafanai ɗa, eziɗi a wula ɗa war gir.

¹⁷ Ku firiya pini kɵi na wiini gawku ɗa kai, na ɓa ezini a wula li ɗa, ku pra amai gaini firiyi kaalai.

¹⁸ ɵa kai ɗa, won hlai n'EPIƊ-ƊAI a tala hanɗa li ɗa, aga a sini firiyi kai, a tika hiyni edi midini par lai.

¹⁹ Ku za hiy siɗi nagai n'e zi meefeŋ kai, ku za sile siɗi na maafanai ɗa kaalai.

²⁰ Buri ɓa ɗif n'a za meefeŋ ɗa, dawaini t'aŋ kai, suŋfaɗi ɗai na maafanai ɗa, a na maini lampa n'a mra nɵa.

²¹ Ahiya, zini hormo wiini EPIƊ-ƊAI gaini pai, ku tapa gaiɗi nagai n'e firiyi ɓa wazagai paŋ a bunda hahakai ɗa kai.

²² Buri ɓa, gir na wiiɗi a kiɗa a luɓasi midiɗi tizaw tar, gir n'EPIƊ-ƊAI zaw pai a kiɗa a ɵinaŋsi midiɗi ɗa, a sɗaŋ ɗa asiya ɗa?

Gadai zamai na ɗai na yalakai e siŋ

²³ Gadai hanɗa, e siŋ ɗa e ɗi ɗai na yalakai ɗaai: Won hlai na ku ziti sariya ɗa, ku ɵa puku pini ɗif ktai par kai, pɗem kai.

²⁴ Ni n'a miɗini wiini ɗif na meefeŋ: ku na jre ɗa, firiɗi ɗai aga e miɗi seŋ na maafanai sini, ɗai aga e bili gaw sini.

²⁵ Amma nagai n'e kûti sariya midini ɗif na meefeŋ ɗa, e zi ɗa a sda na pɗem, ɓiki n'abai aga a sumna midiɗi.

²⁶ Ɗif n'a wuyuku seŋ war jreni ɗa, a ɗif n'a duruku.

²⁷ Za sdaku n'edi par gaini futini, zizina vowaiku gaini futini lai, asakal hanɗa, ku kiɗa ku mula fuŋku.

²⁸ Ku muɗa zaida z'eles miɗini maiku aŋ blaŋ kai, ku dara ku za eles ɗi?

²⁹ Aga ku muɗa kai ɓa, zi n'a zaŋa na ɗa, ta aga mu ziŋni ɵa lai. Aga mu za sini asiya ɗi paŋ pini sdani, ku muɗa ɵa kai.

Sdani ɗif na malam

³⁰ Mefeŋ ktai mu vuga ɵimani vowai na wiini ɗif na malam ɗaw, ɵimani vowai zi luwuŋ zi vin na wiini ɗif na yel midini kai ɗaw.

³¹ Duvuɗvuɗ a tika hlai ɗaw, hlai paŋ ɗa a vek na maafanai kiini, ɵagai na sini ɗe gaini hiɗi azumai ɓaw lai.

³² Ta, mu mula ara sini, mu tika pa mu hiina, mu talaŋ haa a yima mada ɗa ɓa:

³³ Na ɓa, ku kala weseŋ burini hlai n'agwi, ku duŋra burini hlai n'agwi, ku maɗa suku azumai burini hlai n'agwi, ku ɵawa tuku burini hlai n'agwi lai ɗa,

³⁴ war hlai hanɗa murga aga te nuvukusi aha maini ɗif zi sipili nɵa, haw ɗe a luɓasi muduku maini ɗif zi virmi wazagai nɵa lai.