Seŋ joro 18 - Ɗû na sɗik na wiini Alaw

¹ Ɗif n'a tapa gaiɗi marni kai ɗa a paya ɗa a pɗem na wiini, Won hlai na ɗif a sini gadai li ɗa, a za ɗa a hiy.

² Ɗif na tatala a firiya ɗa a siɗi ɗa kai, amma a firiya ɓa a siŋka hinini edi wuzani arɗi ɗai.

³ Meefeŋ ɗa a kasi miisi, tirki a kasi siyer lai.

⁴ Seŋ na mini ɗif par ɗa a na maini yem-ra na hulum nɵa, maiɗi arai zi ki yem na te huŋva edi nɵa, maiɗi kiliŋi zi yel nɵa.

⁵ Zinai na pini ɗif na meefeŋ war sariya, kapai ku wula ezini ɗif na jre ɗa a futini kai.

⁶ Mini ɗif na tatala ɗa a glasi hiy, n'a niyasi mini par ɗa a glasi ɵiɓi.

⁷ Mini ɗif na tatala ɗa a ɓilki n'edi na wiini, n'a niyasi mini par ɗa a azaw n'a yimaŋ ɗa lai.

⁸ Seŋ zi miɗi na mini ɗif zi gini ɗai a na maini simi na pɗem nɵa, a niya haa edi war aru paŋ.

⁹ Ɗif n'a bunda malam war sdani, gaini ni n'a tuura sda edi ɗa, e ɗi ɗai ktai.

¹⁰ EPIƊ-ƊAI a hlai zi ŋoyai na gdaŋ, ɗif na jre ɗa a ŋoya sini, wala na meefeŋ a tetemaŋ kaalai.

¹¹ Farai na wiini ɗif zi farai ɗa, a fuŋ n'abai zi ɵaga na wiini, war hiinini a ɵaga na ɗif a kiɗa a pra amai midini ɗaw kai.

¹² Won hlai na kûlûni-si a cosi li ɗa, ɓilki n'edi aŋsi pini lai, amma abai ɗa te halasi asakalni hûsini-si par.

¹³ Ɗif n'a waya seŋ a zuɓura kai ɗa, a siŋka edi ɗa a gɵibini, a za ɗa a yewere wiini sini lai.

¹⁴ Hiini na wiini ɗif ɗa a kiɗa a sini gdaŋ won hlai n'a na veglek, amma na ɓa hiini hanɗa a bunda li huruf ɗa, n'aga a sini gdaŋ ɗa asiya ɗa?

¹⁵ Ɗif na hangal ɗa a nafa siɗi ɗif zi yel ɗa a paya hitrai n'a zina pini.

¹⁶ Ɗif n'a sa tini edi ɗa, mini hlai paŋ a mala edi burini, a kiɗa a niya haa amlai siɗi ɗai n'abakai.

¹⁷ Ɗif n'a vurna seŋ avut war sariya ɗa seŋni ɗa a tala gaini futini, amma gawni a tika seŋ li ɗa a mulaŋ edi pini.

¹⁸ Wala zi vili ɗa a ɗiya hiy, a vada seŋ arbaɗi ɗai zi spak.

¹⁹ Tawal na agulni a tuura li suku ɗa, hili na sini sek a bunda gir a suwa fuŋ n'abai zi ɵaga ɗa, hiy ɗa a dûgûti agul maini kawakai na gdaŋai n'e ɵi mini fuŋ n'abai gaini nɵa.

²⁰ Ɗif a kiɗa a suma pini seŋ na mini par, a ka sini gaini seŋ n'a muɗaŋ ɗa lai.

²¹ Seŋ zi miɗi ɗa a kiɗa a sa suŋfa zaw a kasi mri, n'a firiya a muɗa ɗa a yima seŋ n'aŋ pini ɗa sini.

²² Ɗif n'a niviti li muni ɗa, a nafa na ɗa a der n'abai, a nafa ɗa a katu tini EPIƊ-ƊAI par.

²³ Ɗif na murga ɗa a siiwa ɗif gaini siiwi won hlai n'a muɗa seŋ ɗa, amma zi farai ɗa, a waya seŋ sai gaini wule na gdaŋ.

²⁴ Marmakai na viya ɗa e kiɗi e tûûri ɗif, amma marmai zamai ɗa, jreni a suwa tawal.