Seŋ joro 16 - Ɗû na sɗik na wiini Alaw

EPIƊ-ƊAI war wala paŋ

¹ Ɗif murɗek a hiina wala, amma vini n'amai ɗa a za gaini EPIƊ-ƊAI.

² Ɗif paŋ a hiina ɓa n'a zaŋ na ɗa a pɗem, amma n'a siɗa n'a na amlai warɗi agul ɗa a EPIƊ-ƊAI.

³ Hina sdaku war tini EPIƊ-ƊAI, na ku firiya ku zaŋ ɗa aga a va amai.

⁴ EPIƊ-ƊAI a za wala paŋ burini wala ktai ta, koo ɗif na meefeŋ maa a na burini mefeŋ zi gir.

⁵ Ɗif paŋ n'a kola sini ɗa, a na hihir arni EPIƊ-ƊAI, koo kaswata ɗi aga a niviti emini-seŋ.

⁶ Pɗemi gaini jre ɗa a haza meefeŋ edi, gaini hormo na wiini EPIƊ-ƊAI, ɗif a kiɗa a yima sini edi sini meefeŋ par.

⁷ Na ɓa EPIƊ-ƊAI a firiya payaini ɗif li ta ɗa, a hûgûɗisi gawni maa aŋ tûyi gaini.

⁸ Der n'agwi na war jre ɗa pɗem, a suwa der na viya na war jre kai ɗa.

⁹ Ɗif a hiiniti futini warɗi agulni, amma a sini gdaŋ war hilini ɗa a EPIƊ-ƊAI.

Miɗi na burini pai

¹⁰ Won hlai na pai a faka li aŋ muɗa ɗa, a muɗa maini Alaw ɵa, Won hlai n'a na ziti sariya ɗa aga a wula kai.

¹¹ Kilo gaini tiɗi na sulu n'e tiki wala warni na gaini futini paŋ ɗa a wiini EPIƊ-ƊAI, gumani wala ɗa paŋ ɗa a kataŋ ɗa a ni.

¹² Zini meefeŋ ɗa a wala na hihir arɗi paakai, buri ɓa pai te ɗiya gdaŋ gaini jre ɗikat.

¹³ Paakai e firyiɗi ɗai n'e miɗiɗi jre, e diriɗi nagai n'e gûni edi sini seŋ ɗa kai.

¹⁴ Pai a za hiy li ɗa a kiɗa a sa ɗif edi mini mri, amma ɗif zi yel ɗa a kiɗa a tikini hangalni azumai.

¹⁵ Won hlai na pai aŋ war firiyi ɗa, hlai paŋ ɵeɗ. Pɗemi na wiini te na maini faŋ n'a ɵaɗa hlai nɵa.

¹⁶ Nivini yel ɗa a suwa or na gaini futini ɗa, nivini siɗi ɗa pɗem a suwa arzaŋ ɗa lai.

¹⁷ Ɗai na jre ɗikat ɗa e gûni sini meefeŋ kai, n'a dara a goda suŋfani, a tika hangalni sini payaini.

¹⁸ Kûlûni-si a glasi gir n'abai, zilini-si n'amai a kasi kɵi n'azumai lai.

¹⁹ Wiyini-si n'azumai gaiɗi na murgakai ɗa pɗem, a suwa ɓrawni der na pini hatam na gaiɗi ɗai n'e kûli siɗi.

²⁰ Ɗif n'a sɗa futini wala n'a zaŋ ɗa ya ɗa, aga a nafa wala pɗem jek, nagai n'e hini siɗi war tini EPIƊ-ƊAI ɗa aga e nivi ɓiki.

²¹ Ɗif n'a wa li yel ɗa, e yikiŋ ɓa ɗif zi siɗi. Seŋ zi miɗi na pɗamai ɗa, a yima hiiniɗi ɗai gara.

²² Hangal na gaini tiki azumai ta ɗa, a sa suŋfa, amma nagai na tatalakai, a kasi gir midiɗi ɗa a dûûli na wiiɗi dama.

²³ Ɗif zi yel ɗa a muɗa seŋ paŋ gaini hiini, nɵa seŋ na mini par ɗa a yima hiiniɗi ɗai gara.

²⁴ Seŋ zi miɗi na pɗamai ɗa, a na maini emelni ami nɵa, amlai muku ɗa nem, a za pɗem wiini amur-si lai.

²⁵ Ɗif paŋ a hiina ɓa futi na wiini te na ɗikat, paŋktai sini dibiɗi, te kaŋ sini mri.

²⁶ Wiyamai te ka ɗif aŋ za sda, warni a hogoŋ aŋ za hanɗa lai.

²⁷ Ɗif n'a nafa kai ɗa a rga warni ɗa a zini meefeŋ, seŋ na mini ɗa a yuvuga maini afu n'a ya nɵa.

²⁸ Ɗif zi viiɗi seŋ ɗa a glasi sispai, n'a muɗa meefeŋ siɗi ɗai ɗa a ɓurwa arbaɗi marmakai.

²⁹ Ɗif zi karai ɗa a duula maini, haa a kaŋ warɗi futi na mafuni su.

³⁰ Ɗif n'a dogo arni aŋ za meefeŋ, n'a luma mini sini lai ɗa, a za meefeŋ ya.

³¹ Ayir na muɗukwi ɗa te bogorai na juvi gara, e niviti e ɗi nagai n'e piyi war jre ɗikat.

³² Ɗif n'a luba seŋ ɗa a suwa gaŋgalaŋ, ni n'a ŋa miɗini sini ɗa, a suwa ni n'a tikasi afti gaini gdaŋ min hatam par ɗa.

³³ Ɗif a kiɗa a za wala zi vili, amma wiyini seŋ paŋ ɗa aŋ war tini EPIƊ-ƊAI.