Seŋ joro 13 - Ɗû na sɗik na wiini Alaw

¹ Ahi na yel ɗa a yima gadai na wiini epini, amma ahi na hiriŋ ɗa a ɵina gadai kai.

² Miɗi na pɗamai na mini ɗif par ɗa a kiɗa a navaŋ amma ɗai zi rhai ɗa saiɗi ɗa aŋ miɗini zini karai.

³ Ɗif n'a giɗima mini ɗa a goda na ɗaa sini, amma ɗif n'a muɗa kla kadai ɗa a ɓulka ɗaa sini.

⁴ Ɗif na malam ɗa a za suuna pini wala amma a kiɗa a navaŋ kai. Amma ɗif n'a za sda gara ɗa, wala na suunani miɗini ɗa a navaŋ.

⁵ Ɗif na jre ɗa a dara seŋ z'eles kai, amma ɗif zi meefeŋ ɗa a tirka marni, a kiɗisi siyer midiɗi lai.

⁶ Jire-ɗikat ɗa a godo ɗif na payaini pɗem, ɗikat ɗa, amma meefeŋ ɗa a ɓilkiɗi ɗai na maafanai lai.

⁷ Ɗif zamai a za sini aŋ ɗif zi farai kapai walani kaalai, na zamai ɗa a za sini murga, paŋ ktai wazagaini viya.

⁸ Ɗif zi farai ɗa a sumna karni barkani faraini, amma ɗif na murga ɗa wala ktai n'a huwyaŋ aŋ kai.

⁹ Gaglai na wiiɗi ɗai na jrekai a ŋala gaini firiyi, amma lampa na wiiɗi ɗai na maafanai aga a mra.

¹⁰ Kûlûni-si ɗa a glasi sispai, amma n'e yimi gadai ɗa e ɗi ɗai na yalakai.

¹¹ Farai na ɗif a navaŋ hub ɗa a ba maini smer nɵa, amma farai na ɗif a navaŋ agwi agwi ɗa a riya amai sek.

¹² Ɗif n'a baiya wala amma a navaŋ war sartini kai ɗa hinini a bunda huruf, amma dirini ɗif n'a va amai li ɗa, a na maini luwuŋ zi suŋfa nɵa.

¹³ Ni n'a yima seŋni ɗif kai ɗa a ba ɗa sini, amma ni n'a za pini gadai ɗa a ba.

¹⁴ Hitrai na wiini ɗif zi yel ɗa te kiliŋi zi suŋfa, a kota ɗif mini azaw na wiini mri par.

¹⁵ Hangal na gaini tiki azumai ta ɗa a sa firiyi wiiɗi ɗai gara, amma futi na wiiɗi ɗai na maafanai ɗa a daba sini hlai ktai kai.

¹⁶ Ɗif zi yel ɗa a za wala paŋ gaini hiini, amma zi dûûli ɗa a siŋka edi ɗa a giɵibini.

¹⁷ Ɵeŋ na meefeŋ ɗa a kasi tûrli arbaɗi ɗai, amma ɵeŋ na jre ɗa a zizina hlai lai.

¹⁸ Nagai n'e bili edi sini gadai ɗa aga e hini war haw, ɗai e miisiɗi lai, amma nagai n'e yimi gadai aga e nivi kol.

¹⁹ Won hlai na dirini ɗif a va li amai ɗa a sini firiyi gara, ɗai na tatalakai e diri e bili edi sini meefeŋ kai na ɗa buri hanɗa.

²⁰ Ɗif n'a paya gaiɗi ɗai na yalakai ɗa a bunda yel, amma ni n'a paya gaiɗi ɗai na tatalakai ɗa aga a nafa huwyi.

²¹ Gir ɗa aŋ piɗi ɗai na maafanai su, amma pɗemi te na buriɗi nagai na jrekai lai.

²² Ɗif n'a za pɗem ɗa bulumni a hina haa siɗi tiyakaini, amma der na wiini ɗif na tuwur ɗa aga a sa sini ɗif na jre ɗa pra.

²³ Vowaiɗi ɗai na murgakai ɗa wala zi simi warni viya gara, amma ɗif na meefeŋ ɗa, agwiya agwiya haa gdaŋni a vada edi.

²⁴ Api n'a ɵiɓa ahini kai ɗa a daraŋ kai, amma ni n'a dara ahini ɗa a ɵeɓaŋ.

²⁵ Ɗif na jre ɗa a suma haa warni a va, amma ɗif na meefeŋ ɗa warni a suura tiɗi wiyamai.