Seŋ joro 12 - Ɗû na sɗik na wiini Alaw

¹ Na a paya hitrai ɗa a paya ɗa a siɗi, n'a bla edi sini gadai ɗa a ɗif zi dûûli.

² Ɗif n'a za pɗem ɗa a nafa yum arni EPIƊ-ƊAI, amma ni n'a sɗa futini zini meefeŋ gara ɗa, EPIƊ-ƊAI aga a kûti sariya miɗini.

³ Ɗif a bunda gdaŋ ɗa gaini zini meefeŋ kai, sirdaini ni na jre ɗa aga a gigi ɗa kai.

⁴ Muni zi hormo ɗa te bogorai na wiini mofaɗi, muni zi tiki siyer wiini mofaɗi ɗa te dadalai na sini keɵkeni.

⁵ Ɗai na jrekai ɗa e hiini midini zi n'e zi pini gadai, amma na maafanai e hiini ɗa a rhai n'e rhi marɗi.

⁶ Miɗi na wiiɗi ɗai na maafanai ɗa a azaw zi fiɗi ɗai, amma na wiiɗi na jrekai ɗa a kûrɗiɗi edi mini mri par.

⁷ Won hlai na ɗai na maafanai e kɵi li ɗa, wala a hina piɗi kir kai, amma pinzibaɗi ɗai na jrekai wala a muguzaŋ kai.

⁸ Ɗif ɗa a nafa kol pini hangalni na pɗem, amma ni na hinini meefeŋ ɗa a hina mini tirki ɵa.

⁹ Ɗif na ɗai e tûûriŋ kai, amma aŋ gaini begeni aha su ɗa a suwa, ɗif n'a kola sini amma wala zi simi ahani kai ɗa.

¹⁰ Ɗif na jre ɗa a sɗa hajani farani ya, amma ɗai na maafanai ɗa hiinini haw warɗi kai.

¹¹ Ɗif n'a hirma vowaini ɗa aga a va gaini wala zi simi viya, amma ni n'a tika futi pini wazagai na jreni aŋ kai ɗa, a ɗif na hangalni a kiɗa kai.

¹² Ɗai na maafanai e zi suuna sini der na wiiɗi ɗai na jrekai kai, amma nagai n'e zi pɗem ɗa e ɗa gdaŋai e nivi der na pɗem lai.

¹³ Miɗi na ɗewek na wiini ɗif na meefeŋ ɗa azaw na tuwur aŋ warni, amma ɗif na jre ɗa a mula mini gir par.

¹⁴ Seŋ na mini ɗif par, a kiɗa a kinisi der viya, maini n'a navaŋ gaini sdani nɵa.

¹⁵ Ɗai na duulakai e siɗi ɓa e zi na ɗa a meefeŋ nɵa kai. Amma ɗai na yalakai ɗa e yimi gadai.

¹⁶ Ɗif zi dûûli ɗa a siŋka hiyni ɗa edi tizaw, amma ɗif na yel ɗa a yima tirki sini.

¹⁷ Ni n'a muɗa jre ɗa a zina pini jre ɗikat, amma zaida z'eles ɗa a zina pini seŋ na jre kai.

¹⁸ Ɗif na mini taf taf ɗa a za wuruk maini kaɵkar ɵa, amma alsiɗi ɗai na yalakai ɗa te kurgum.

¹⁹ Seŋ na jre ɗa a fana viya, amma eles ɗa, a na burini hlai n'agwi kadai.

²⁰ Amlai warɗi agulni ɗif n'a rga warni aŋ zi meefeŋ ɗa, a rhai. Amma amlai warɗi nagai n'e piyi ɵeɗ ɗa, a firiyi.

²¹ Gir ktai maa a za sini ɗif na jre ɗa kai, amma nagai na maafanai ɗa gir siɗi viya.

²² Ɗai na alasakai ɗa EPIƊ-ƊAI a diriɗi kai, a diriɗi ɗa e ɗi nagai n'e zi jre ɗa.

²³ Ɗif na yel ɗa a ŋoya siɗini warni, amma na tatala ɗa, a siŋka dûûlini edi.

²⁴ Ɗif n'a za sda gdaŋ ɗa aga a ŋa, amma na malam ɗa aga a hina ɗa aŋ bege.

²⁵ Hûwyi ɗa a vada gdaŋni ɗif edi, amma labar na pɗem ɗa a sa firiyi.

²⁶ Ɗif na jre ɗa, a ɗikita maini, amma futiɗi ɗai na maafanai ɗa te kiɗi war bi.

²⁷ Ɗif na liŋ liŋ ɗa a kiɗa a fuɗa salak kai, jak jak ɗa, a der na pɗem.

²⁸ Suŋfa aŋ warɗi futi na wiini jre-ɗikat, futi na sini mri sek ɗa t'aŋ gaini ɓisi gaiɗi futiɗi lai.