Seŋ joro 1 - Ɗû na sɗik na wiini Alaw

Wala na maktuɓ na wiini seŋ joro a ɗo burini

¹ Seŋ joro na wiini Salmun n'ahini David, pai na Izrayel.

² Seŋ joro hanɗa a na buri ɓa a hitriɗi yel wiiɗi ɗai, a siɗi siɗi, a zina piɗi aŋ siɗi hulumni seŋ,

³ a hitra ɗif aŋ paya payai zi yel, aŋ paya war jre, aŋ ɗiya war jre, war ɗikat lai,

⁴ aŋ sa yel wiiɗi nagai na gaini niiyi war seŋ kai, aŋ sa siɗi gaini hiini na hulum wiiɗi na agogoi lai,

⁵ ɗif zi yel n'a na talaŋ ɗa a nafa wala warni par. Zi siɗi ɗa kaw a nafa yel warni par lai,

⁶ a na buri a siŋka ezini seŋ joro zamai zamai edi gaini seŋ zamai n'a ɵina gir na war hitri na wiiɗi ɗai na yalakai lai.

⁷ Hormo na wiini EPIƊ-ƊAI a pi zi tiki na wiini siɗi, yel gaini siɗi, e piyiŋ kai ɗa e ɗi ɗai zi duulakai.

Gadai burini payai na gaiɗi aliyagoi na payaiɗi meefeŋ

⁸ Ahiya, yima gadai na wiini apuku, ku miisa wazagai na amuku te hutruku miɗini ɗa kai,

⁹ buri ɓa a na maiɗi bogorai na juvi na muduku nɵa, maiɗi aiduwi na wulaku nɵa.

¹⁰ Ahiya, na ɓa marku na payaiɗi meefeŋ e diri e wuluku azuku ɗa, ku ɗiya siɗi kai.

¹¹ Na ɓa e muɗuku ɓa halasi gaiyi, ŋuyumu ezini hlai cok mu fuɗumu ɗai edi, cukuɗumu ɗai n'e zi wala na meefeŋ kai war ŋoyai aŋ blaŋ,

¹² mu rɓuɗumu karɗi maini hlaiɗi ɗai zi mri n'a rɓa ɗai nɵa, mu rɓuɗumu gaini siɗi paŋ maiɗi ɗai n'e niyi azumai war waŋ ɗa nɵa.

¹³ Aga mu nuvumu der na gaini futini pini nafarni kiini kiini, aga mu vumu dalammu gaini der hanɗa.

¹⁴ Halasi, aga ku nafa geɗel na wiiku gaiyi, buri ɓa godaimu te za fu na ktai ta.

¹⁵ Ahiya, ku hala gaiɗi kai, ku tika futi piɗi kai,

¹⁶ Buri ɓa e rûvi na pini zini meefeŋ, e pirmi aŋ fiɗi ɗai lai.

¹⁷ Ɗif n'a na gana azaw, na ɓa wala zi ɗufli a talaŋ wuzani hlai ba ɗa, a guna war hlai ni kir kai.

¹⁸ Amma nagai ɗa e gini azaw na ɗa wuzaɗi nagai dama, e yimi gaini na ɗa a siɗi dama lai.

¹⁹ Nagai n'e hili wazagaiɗi marɗi ɗa, aga e vidi edi maini nɵa, hil ɗa aga a ba suŋfani ni n'a na hala ɗa lai.

Yel a na sa miɗi edi siɗi ɗai

²⁰ Yel a na ɗuula anene war futi na agogoi paŋ, a na ɓaka war hlai na ɗai e tipi woni ta ta ɗa paŋ.

²¹ War dagrani futi na ɗai e tipi warni viya gara ɗa, yel a na yika ɗai, War faada na war fuŋ n'abai a na sa miɗi edi maini nɵa:

²² Tiki na gaini niyi war seŋ kai ɗa, aga ki simni ɵa haa kaswata ɗa? Tiki zi zi anya ɗa, aga ki zi anya sa ɵa haa kaswa ta ɗa? Tiki na tatalakai, aga ki piyi siɗi kai ɵa haa kaswata ɗa?

²³ ɵini seŋ na mu na miɗiŋki ɗa, nɵa aga mu maɗi sezeŋa midiki, mu sikiniki ezini seŋŋa zi miɗi ɗa lai.

²⁴ Buri ɓa mu yikiki haa, amma ki diri sa kai, mu waɗi ta miki haa, amma jaani ɗif gaiɗi kai.

²⁵ Gadai na mu siŋki paŋ ki pûkûŋ edi puk puk, arai zi pi na mu siŋki paŋ, ki yimiŋ maini wala kadai nɵa lai.

²⁶ Hlai na gir aga a cosi midiki ɗa, ta aga mu riya piki gaini riyi, hlai n'aga ki ziriyi tiɗi hunai ɗa, ta aga mu ziki yewere lai.

²⁷ Buri ɓa, mefeŋ ktai hunai aga te luɓasi midiki maini berber na gdaŋ nɵa, gir aga a cosi midiki maini smer na gdaŋ nɵa, hunai gaini gir aga a tikiki miki lai.

²⁸ Nɵa tiki aga ki yikiŋa, amma aga mu ɗiya siki kai, aga ki piyiŋa, amma ki niviŋa kai.

²⁹ Buri ɓa ki ɗiyi sini siɗi kai, ki viri aŋ zini hormo wiini EPIƊ-ƊAI ɗa kaalai.

³⁰ Buri ɓa ɗiyi sini gadaiŋa kai, ɗiyi sini arai zi pi na wiya kaalai.

³¹ Tiyana ɗa aga ki nivi gir pini payai zi vilimi na wiiki ɗa, aga ki vi warki gaini wazagai na ki hiiniŋ warki aŋ ziŋ ɗa lai.

³² A fiɗiɗi ɗai na gaini niiyi war seŋ kai ɗa a humokɗi na gdaŋ ɗa, a biɗi na tatalakai edi ɗa a hiini n'aŋ kai ɗa.

³³ Amma asiya ɗi paŋ n'a ɵina seŋŋa a sumna ɵeɗ, gaini hangalni, a huna wuzani gir kai.