Sakariyas 9 - Ɗû na sɗik na wiini Alaw

IZRAYEL GAIƊI PINZIBA NA ZAMAI Sariya gaini pli n'edi na wiiɗi pinziba na ɵimaɗi Izrayel

¹ Zaida na wiini EPIƊ-ƊAI Seŋ na wiini EPIƊ-ƊAI a cosi ya war afti na wiini Hadrak, hlai n'a cosi war Damaskus ta ɗa a ɗiya zaw, buri EPIƊ-ƊAI a mula arni midiɗi ɗai paŋ, maini n'a na mula arni midiɗi Izrayel ɗa nɵa lai.

² Seŋ hanɗa a na buriɗi Hamat, na te na ɵimaɗi, gaiɗi Tirus gaiɗi Sidon, na yelɗi abai gara.

³ Tirus te rga ɵaga amai siɗi ya, te tapa dala amai viya maini kaikai nɵa, or ɗa maini alogodo na warɗi futi nɵa,

⁴ amma, tili EPIƊ-ƊAI aga a mulaŋ tiɗi par, ɵagaɗi a hoŋ azumai arni yem-ra n'abai, na gaini midiɗi dama, afu aga a yiti edi lai.

⁵ Hlai na ɗai na war Askalon e tili wala hanɗa li ɗa, aga e bindi muhunakai, Gaza aga te ziriya gaini hunai n'abai Ekron aga te nava zinai kai. Pai na war Gaza aga a yima edi ɗif aga a hina war Askalon kir kai.

⁶ Ɗai na gamawai, aga e simni war Asdod. Nɵa aga mu ɗiya kûlûni-si na wiiɗi Filistrekai. A miɗi na sini EPIƊ-ƊAI par.

⁷ Aga mu hultasi neŋ na gaini fel ɗa edi war miɗi par, neŋ na haharai na wiiɗi alawai na zamai ɗa. Piɗi n'a hina, aga mu bunda aŋ n'Alaw na wiini aga a bunda maini pai ktai nɵa war Yuda. Ɗai na Ekron aga e niyi arbaɗi ɗaiŋa maini na Yebuzitekai e ziŋ ɗa nɵa.

⁸ Aga mu pa kaŋ ɵimani aftiŋa aŋ giɗimaŋ buriɗi askarai n'e ɗa piyi arbani hlai yaw yaw ɗa, ɗif aga a halasi aŋ ziɗi gir wiiɗi ɗaiŋa kir kai, buri ɓa tiyana ɗa, ara a tala ba.

Pai n'aga a kasi ɵeɗ

⁹ Firiya abai gara, fuŋ n'abai na Siyon. Ɗuula gaini firiyi Yeruzalem na juvi. Tala, paiku a na halasi suku, a jre, gai rɗi amai lai, a hangal, miɗini ablehö dam, a hini ablehö n'agwi.

¹⁰ War Efrayim, aga a vada saret zi gaw ɗa edi, war Yeruzalem, a vada plasai edi lai, aga a kirpa ɓaraw zi gaw ɗa edi. Aga a kasi ɵeɗ arbaɗi pinzibaɗi ɗai na zamai, aga a ŋa sini yem-ra n'abai ktai par haa sini na zamai sini ra Öfrata par haa edi war koŋɗi yai na puɗu paŋ.

Ɗai zi daŋgai e nivi pli n'edi

¹¹ Buriku tuku, buri bonu zi fel na mu zaŋ gaiku, mu miliɗisi ɗaiku zi daŋgai edi warni huduk na hulum na yem warni kai ɗa par.

¹² Tiki ɗai zi daŋgai na ki ɗa biyi pin ɵeɗ, wiyi aha war fuŋki, na gaini ɵaga sini! Girna mu muɗa seŋ hanɗa pra ɓa: gir na ki siɗiŋ ɗa aga mu wiyikisi wazagaiki azi sulu.

¹³ Ɗai na war Yuda aga mu bindiɗi maini taŋ zi gaw nɵa, Ɗai na war Efrayim e ɗi ɓaraw na warni ɗa. Siyon, aga mu ziɗi piɗi aliku, kapai e hitimiɗi aliku ɗa, afti na Grek, aga ku bunda buriya maini kaɵkar na tini gaŋgalaŋ ɗa nɵa.

¹⁴ EPIƊ-ƊAI aga a ɵa wuzaɗi ɗaini, ɓarawni aga te lawa maini wilɗi nɵa. Epiɗ-ɗai ALAW aga a yiba faana, aga a halasi arbani barawai n'a halasi war gal n'amai par nɵa.

¹⁵ EPIƊ-ƊAI zi spak paŋ aga a giɗimiɗi ɗaini, aga e tûûri kriyitai na war viliyu edi, e siriŋ edi lai, aga e biivi maini suul nɵa, e mi felɗi edi lai, aga e vi maiɗi wulai zi ɓaka na te va gaini fel ɗa nɵa, gai vi amai ɗep, maini koŋni gûwiŋ zi ɓaka nɵa.

¹⁶ EPIƊ-DAI Alaw na wiiɗi, aga kûrɗiɗi war mefeŋ ni ɗa, maini ɗif zi giɗimi n'a kurɗa farani faraini nɵa. Nagai aga e ŋili warɗi yai, kal-kal maini ali-fuŋ na juva gara n'e diɓikiŋ siɗi bogorai nɵa.

¹⁷ Yo! tiyana ɗa, nagai e ɗa war ɵeɗ, e jûvi gara lai, nɵa algama aga a siɗi gdaŋ wiiɗi gawlakai, vin na hehe a siɗi gdaŋ wiiɗi ɓulamakai lai.