Sakariyas 7 - Ɗû na sɗik na wiini Alaw

Tikini sai miɗini tûrû n'edi na wiiɗi Yeruzalem

¹ War buza n'ag'aŋ puɗu na wiini Dariyus warɗi pai, seŋ na wiini EPIƊ-ƊAI a muɗa sini Sakariyas, hanɗa a za war mefeŋ n'ag'aŋ ɵeeŋe na wiini tile n'e yikiŋ ɓa Kiɵew.

² Ɗai na war Betel e ɵini Sareser gaini Regum-Melek gaiɗi ɗai zamai lai buri e piyi zinai tini EPIƊ-ƊAI par,

³ buri e zilbiɗi paakai zi ɓaka na warni tempel na wiini EPIƊ-ƊAI zi spak paŋ gaiɗi ɗai na min Alaw lai ɓa: Mu kiɗa aŋ tuwa ɗaiɗi war tile n'ag'aŋ ɵim won hlai n'aga mu tika sai maini n'avut par n'a mu zaŋ li war buza n'a vuga li nɵa ɗi?

⁴ Nɵa seŋ na wiini EPIƊ-ƊAI zi spak paŋ, a muɗaŋa maini nɵa:

⁵ ku miɗiɗi wiiɗi ɗai na midini afti gaiɗi paakai zi ɓaka ɓa: won hlai na ki tiki sai gaini ɵini hama, war tile n'ag'aŋ ɵim, tiyana a za na buza doogo doogo muguzak, ki tikiŋa sai hanɗa wiya ɗi?

⁶ Won hlai na ki ɗi ka ki simi, ki si, ki zi hanɗa buriki tiki dama kai ɗi?

⁷ Hanɗa a seŋ n'EPIƊ-ƊAI a muɗaŋ war miɗi ɗai na min Alaw n'avut par, won hlai na Yeruzalem te na ka war ɵeɗ, huwyi siɗi kai, gaini gûni amlai cup tin fuŋ n'abai na ɵimaɗi, won hlai na hlai n'amai sek gaini hlai na huduk a na gaini fuŋ warni hai kai ɗi?

⁸ Seŋ na wiini EPIƊ-ƊAI a muɗa sini Sakariyas maini nɵa:

⁹ EPIƊ-ƊAI zi spak paŋ a na muɗa ɓa: ki ziti sariya war jre, ɗif paŋ a za pɗem gaini diri sini tawalni.

¹⁰ Muni na war greŋ, ɗif na huyuk, ɗif na morkoi gaini ɗif na murga ki kiiriɗi kai, ɗif a hiina meefeŋ sini tawalni kaalai.

¹¹ Amma e diri e ɵini kai, e bindi arɗi edi, e tûsi ɵimaɗi kapai e ɵini kai.

¹² Agulɗi a bunda gdaŋ maini kawai nɵa, kapai e ɵini hitri gaini miɗi n'EPIƊ-ƊAI zi spak paŋ a miɗiŋɗi war sezeni war miɗi ɗai na min Alaw n'avut par kai. Seŋ hanɗa a tuura agulni EPIƊ-ƊAI zi spak paŋ gara.

¹³ Burini wala hanɗa EPIƊ-ƊAI zi spak paŋ a muɗa: Ta mu yikiɗi, nagai e ɵini kai, tiyana ta kaw, aga mu ɵiniɗi kaalai.

¹⁴ Ta mu ɵiriɗi edi arbaɗi pinzibaɗi ɗai paŋ na nagai e siɗiɗi kai. Yai te hina asakalɗi kadai su, ɗif a kiɗa aŋ halasi warɗi a waya lai kai. Yaiɗi te na ka aŋ firiya agulɗi, te bunda li aŋ basga.