Sakariyas 6 - Ɗû na sɗik na wiini Alaw

Wala zi siŋki n'ag'aŋ mitwis: saretai na puɗu

¹ Mu yima ara amai zamai pra, wala a siŋka sini ara: saretai puɗu a halasi arbani huwaŋai na sulu ɗaw, huwaŋai hanɗa a huwuŋ zi kiya.

² Saret n'avut ɗa, plasaini a na makalakai rum-rum, n'ag'aŋ sulu ɗa, plasaini murɗakai.

³ N'ag'aŋ hu ɗa, plasaini muɗukokai, n'ag'aŋ puɗu ɗa plasaini sini mekele ɓlok ɓlok.

⁴ Mu zilba ɗif zi ɵeŋ na war fuŋ n'Alaw n'a na haɗa kalaŋ gaya, wala hanɗa a siŋka ɗa a maɗa, Epin-geza?

⁵ Ɗif zi ɵeŋ na war fuŋ-n'Alaw a wayaŋa seŋ: Hanɗa a smer na puɗu n'a nasi ka wuzani ni n'a ŋiti duniya paŋ ɗa.

⁶ Saret na gaini plasai na murɗakai a hala war galni hlai n'azumai sek. Plasai na muɗukokai a halaɗi pini asakal par, na sini mekele ɓlok ɓlok a hala war gal n'amai sek.

⁷ Plasai na makalakai a halasi a firiya a gûniti duniya paŋ azumai. EPIƊ-ƊAI a siɗi futi a muɗa: Hili gûniti azumai. Saretai a gûniti duniya azumai lai.

⁸ A yikaŋasi a muɗaŋa: Tala nagai n'e hili war gal n'azumai sek ɗa aga e ki sezeŋa war hlai hanɗa.

Miɗi na wiini EPIƊ-ƊAI na burini Yosva

⁹ Seŋ na wiini EPIƊ-ƊAI a muɗa sa maini nɵa:

¹⁰ Yima like na wiiɗi nagai n'e yimiɗi min gaw, n'e siŋsi tini Heldai, Tobiya gaini Yedaya.

¹¹ Aga ku mula arzaŋ gaini or kapai ku ziti bogorai gaini, ku piti miɗini pai zi ɓaka, Yosva n'ahini Yehosadak.

¹² Aga ku miɗini maini nɵa: EPIƊ-ƊAI zi spak paŋ a na muɗa maini nɵa: tala, ɗif ktai a na, e yikiŋ ɓa: “walni”, hlai n'a ɗiya li warni ɗa, suŋfa aga a ɓurfa woni, aga a rga tempel na wiini EPIƊ-ƊAI amai.

¹³ Ni aga a rga tempel na wiini EPIƊ-ƊAI amai. Pai aga te wa sini, aga a sumna midiɗi paini buri a ŋa. Pai zi ɓaka ktai lai aga a sumna gaini dam, ɗai na sulu hanɗa aga e ɵini piɗi marɗi abai gara.

¹⁴ Bogorai hanɗa aga te hina maini wala zi ɵi humok burini Heldai, Tobiya gaini Yedaya, pra burini pɗem n'alini Sofoniyas e ziŋ ɗa.

¹⁵ Ɗai viya aga e hilisi gaigai par buri e rgi tempel na wiini EPIƊ-ƊAI amai. Tiki aga ki siɗi ɓa a ɵinaŋasi siki ɗa a EPIƊ-ƊAI zi spak. Wala aga a za, na ɓa tiki ki gidili pin miɗi na wiini EPIƊ-ƊAI Alaw gaini jre.