Sakariyas 4 - Ɗû na sɗik na wiini Alaw

Wala zi siŋki n'ag'aŋ ɵim: wala zi tiki lampa gaini luwuŋ olive

¹ Ɗif zi ɵeŋ na war fuŋ-n'Alaw n'a muɗa seŋ gaya a waisi sa a ɵiya hiiniŋa, maini ɗif na ɵiyasi weseŋ par nɵa.

² A zilbaŋa, arku a tala ɗa a maɗa? Mu wiyini seŋ ɓa, wala a siŋka sini ara, a wala na sini paŋ a or sal, hlai n'e mi emel warni amai par miɗini ta. Lampa miɗini muguzak gaini mes warni paŋ lai.

³ Luwuŋ olive sulu ɵimani ca, gai ɓûrwi edi sini hlai zi mi emel warni ca, ktai war galni na wus par, na ktai war galni na muni lai par lai.

⁴ Mu zilba ɗif zi ɵeŋ na war fuŋ-n'Alaw na haɗa kalaŋ gaya pra: wala hanɗa a siŋka ɗa a maɗa Epin-geza?

⁵ Ɗif zi ɵeŋ n'a na haɗa kalaŋ gaya a wayaŋa seŋ: Wala hanɗa ku siɗaŋ kai? Ta mu wiyini ɓa mu sɗaŋ kai.

^6a Nɵa a wayaŋa seŋ:

^10b Lampa na muguzak hanɗa a arni EPIƊ-ƊAI, a tiliti duniya gaini hlaiɗi paŋ.

¹¹ Mu zilbaŋ pra: Luwaŋai olive na sulu n'a ɗiya war graŋ na wus gaini na muni na wiini wala zi tiki lampa a siŋka ɗa a maɗa?

¹² Ta mu zilbaŋ zamai pra: Ɵimani luwuŋ olive na sulu n'a na ɵimani tuyo zi or n'a na kasi emel zi or hanɗa a siŋka ɗa a ma ɗa?

¹³ A wayaŋa seŋ: Ku siɗaŋ kai? Ta mu wiyini seŋ ɓa mu sɗaŋ kai.

¹⁴ A wayaŋa seŋ ɓa: E ɗi ɗai na sulu n'e virisi edi gaini mini emel, buri e zi ɵeŋ na wiini Epiɗi duniya gaini hlaiɗi paŋ.

Miɗi na pɗem na burini Zorobabel

^6b Hanɗa a miɗi n'EPIƊ-ƊAI a miɗiŋni wiini Zorababel: A gdaŋ ɗa kai, a spak ɗa kaalai, amma a seze na wiya, a muɗaŋ a EPIƊ-ƊAI zi spak paŋ.

⁷ Huwuŋi n'amai hanɗa tiɓ te ɗala tin Zorobabel ɗa a maɗa? Aga te yima azumai wuzani kal-kal, ni aga a tikitisi huwuŋi n'emini hlai tar na warni tempel ɗa edi, ɗai paŋ aga e sûûri ɓa yawwa, yawwa.

⁸ Seŋ na wiini EPIƊ-ƊAI a muɗa sa maini nɵa:

⁹ Dilimi hanɗa a tora eziɗi azumai ɗa a Zorobabel, aga a viditi ɗa a ni lai.

^10a Nɵa tiki aga a yima midiki ɓa a ɵinaŋasi siki ɗa, a EPIƊ-ƊAI zi spak paŋ. Ku miisa sda n'a za avut ɗa ɓa a nafa kai nɵa kai, a pɗem ku firiya gai firyi pini won hlai na ku tala li Zorobabel, gaini wala zi sda tini ɗaw ɗa.