Rut 4 - Ɗû na sɗik na wiini Alaw

Bowas a mula bulum na wiini Alimelek

¹ Bowas a hala amai min magala, war faada, a sumna woni dam. Nɵa, ni n'a kiɗa a mula bulum, na Bowas a haɗa kalaŋ miɗini ɗa, a na vuga. Bowas a miɗini: Waisi haw! Sumna ka agwi haw. A wayasi, a sumna dam.

² Nɵa Bowas a yika ɗai doogo arbaɗi n'abakai na war fuŋ n'abai ɗa, a muɗa: Simnisi azumai ca haw, nagai e simni azumai lai.

³ Asakal par a muɗa wiini ni n'a kiɗa a mula bulum ɗa maini nɵa: Nuumi te wayasi edi midini afti na Mowab par ɗa, te firiya te wura vowai na wiini Elimelek na zigelmu ɗa edi.

⁴ Ta ɓa marya ku ɵina ba, mu muɗuku na ɗa ɓa marya ku wuraŋ wuzaɗi ɗai zi fuŋ gaiɗi n'abakai na wiimu, na ɓa ku firiya ku wuraŋ ɗa wuraŋ wiiku. Amma na ɓa ku firiya kai ɗa, ku muɗaŋa. Buri ɗif zamai na mula bulum hanɗa wuzaku tuku par aŋ kai, mu ga puku mu ta lai. A wiyini seŋ: Aga mu wuraŋ.

⁵ Bowas a muɗa: Yivai na ku wura vowai hanɗa li tiɗi Nuumi par ɗa, aga wuraŋ war yikiɗi Rut na Mowab par, na munini ɗif n'a mra ɗa, kapai yikini ɗif n'a mra ɗa, a ba edi kai, a hina miɗini bulum na wiini su.

⁶ Nɵa, ni n'a mula bulum ɗa a waya seŋ: Mu kiɗa aŋ mula bulum ɗa kai, hunai pa ta, buri farai na wiya aga a tuura. Mula bulum hanɗa wiiku war balamŋa, buri mu kiɗa aŋ mulaŋ kai.

⁷ Aɗipar war Izrayel ɗa, buri seŋ na wiini bulum zaw wala zi bindi, kapai a za ɗa, ɗif ktai a rɗa harabak n'ezini, a siŋni wiini ni n'a futi te sa sini ɗa, a wala n'a siŋka edi arɗi ɗai ɓa, seŋ ɗa a ɗiya zaw.

⁸ Ɗif n'a mula bulum ɗa, a miɗini wiini Bowas: Wura bulum hanɗa wiiku, a wa harabak n'ezini edi, a siŋni ta.

⁹ Bowas a miɗiɗi wiiɗi n'abakai gaiɗi ɗai paŋ: Tiki ki ɗi zaidakai girna par, ɓa mu wura wazagai na wiini Elimelek, gaini na wiini Mahlon, gaini na wiini Kilyon ɗa lai tiɗi Nuumi par.

¹⁰ Mu yimiti Rut na Mowab par, na munini Mahlon ɗa sa lai, kapai yikini ni n'a mra a ba edi kai, a hina miɗini bulum na wiini su, kapai yikini a haza edi arbaɗi tawalakaini par, zaw min magalaini fuŋ n'abai ɗa kaalai. Tiki ki ɗi zaidakai girna.

¹¹ Ɗai n'e diŋgisi min magala war faada, gaiɗi n'abakai lai e miɗi: Tiyi mi ɗi zaidakai! A juva ɓa EPIƊ-ƊAI a binditi muni na te niya aha war dalamku hanɗa maiɗi Rakel gaiɗi Lea nɵa, nagai na sulu n'e wiiɗi pinzibaɗi Izrayel ɗa nɵa! Siŋka gdaŋku edi wiiɗi Öfrata, hina yikuku a wa war Betlehem lai!

¹² A juva ɓa ali n'EPIƊ-ƊAI aga a suɗuku gaiɗi drai hanɗa, e bindi pinzibaku viya maini na wiini Peres, na Tamar te wiŋni wiini Yuda ɗa nɵa.

Bowas a tikiti Rut; wii na wiini Obed

¹³ Bowas a yimiti Rut, te bunda aŋ munini, a tapa gaiɗi. EPIƊ-ƊAI a ɓikiti te tika fel, te wa ahi na wus.

¹⁴ Falakai e miɗiɗi wiiɗi Nuumi: Kol sin EPIƊ-ƊAI n'a hunuku edi duk kai, buri a suku ni n'aga a lubuku li girna, a juva ɓa yikini a wa edi war Izrayel paŋ.

¹⁵ Ahi hanɗa, aga a tukuku hangalku azumai, won hlai na ku za li wuli ɗa, aga a zina puku. Buri munini ahiku hanɗa, te duruku gara, te wuku tiyku hanɗa; buriku ɗa, na te suwa ali na maɵagai muguzak.

¹⁶ Nuumi te tika arwagwi, te fanaŋ didikɗi, te hina aŋ tika hangalɗi sini.

¹⁷ Marɗi falakai na ɵimaɗi e sini yiki e miɗi: Nuumi te wa ahi su, e sini yiki ɓa Obed. A epini Isai n'epini David.

Yikiɗi tamaini David

¹⁸ Pinziba na wiini Peres a na maini nɵa: Peres a wa Hesron,

¹⁹ Hesron a wa Ram, Ram a wa Aminadab.

²⁰ Aminadab a wa Nason, Nason a wa Salma,

²¹ Salma a wa Bowas, Bowas a wa Obed,

²² Obed a wa Isai, Isai a wa David.