Rut 1 - Ɗû na sɗik na wiini Alaw

Gir na gizi miɗini dalamni Abimelek

¹ Wiyamai te za war mefeŋ na paakai zi sariya e ŋi midini aftiɗi Izrayel. Won hlai hanɗa, ɗif ktai na Betlehem, war afti na Yuda, a jogo midini afti na Mowab gaiɗi munini, alini na maɵagai sulu lai.

² Ɗif hanɗa e yikiŋ ɓa Abimelek, munini e yikiti ɓa Nuumi, aliɗi na sulu yikiɗi ɓa Malon gaini Kilyon. E ɗi pinziba na Öfrata, na Betlehem war Yuda. E cûsi midini afti na Mowab, e simni woni.

³ Abimelek, na mofoɗi Nuumi a mra su, Nuumi te hina gaiɗi aliɗi na sulu.

⁴ Nagai e miliɗi aŋ falakai e ɗi aliɗi ɗi na Mowab; na ktai e yikiti ɓa Orpa, na zamai e yikiti ɓa Rut lai. E simni war hlai ni haa gobi buza doogo.

⁵ Asakal mrini epiɗi par, Malon gaini Kilyon e mri lai, Nuumi te hina kiiɗi, mofoɗi aŋ kai, aliɗi na sulu kaalai.

Nuumi gaiɗi Rut e hili aha war Betlehem

⁶ Nɵa Nuumi te zizina siɗi gaiɗi falakaiɗi aliɗi aŋ hini afti na Mowab, buri te nava labar ɓa EPIƊ-ƊAI a hiina midiɗi ɗaini a siɗi simi.

⁷ Pin hanɗa, te hina hlai na te nasi ka woni, na gaiɗi falakaiɗi aliɗi na sulu paŋ. E tikitisi futi na te hala a Yuda sek.

⁸ Nɵa Nuumi te miɗiɗi wiiɗi falakaiɗi aliɗi: Hili, asiya ɗi paŋ a waya aha war dalamɗi emini. EPIƊ-ƊAI a za pɗem siki, maini na tiki ki ziŋ siɗi nagai n'e mri, sa ta dama lai na ɗa nɵa.

⁹ A juva ɓa EPIƊ-ƊAI a siki hlai zi simni na ɵeɗ, asiya ɗi paŋ ahani mofoni mofoni. Asakal par te gûbûɗi. Nɵa, nagai e tuwi gaini gdaŋɗi.

¹⁰ E miɗiɗi: Zaw kai, tiyi aga mi hili gaiku arbaɗi ɗaiku.

¹¹ Amma Nuumi te muɗa: Wiyi, aliya, ki hilisi gaya buri ma ɗa? Ali zamai e hini wara aŋ wii, kapai e bindi aŋ maɵagaiki ɗi?

¹² Wiyi aliya, hili! Buri mu za wuli gara ta, mu kiɗa aŋ tika wus na zamai kir kai. Koo ɓa mu muɗa fu ɓa aga mu tika wus tekeɗeɗi, koo ɓa mu tika wus duvuk na tar, mi fini gaiɗi maryi lai, mu wa ali lai tekeɗe ɗi,

¹³ kapai siki ca aŋ biyi haa e zi abakaiɗi? Kapai siki ɵa ca ki mili maɵagai kai ɗi? Zaw kai aliya! Gir na wiya, abai a suwa na ɗa pra, Tini EPIƊ-ƊAI te fana mada guma waŋ.

¹⁴ E tuwi pra. Asakal par, Orpa te gubuti suwulɗi buri te ɓurwa gaiɗi, amma Rut te dara te ɓurwa gaiɗi suwulɗi kai.

¹⁵ Nɵa Nuumi te miɗiɗi wiiɗi Rut: Tala muɗaku te na waya siɗi ɗaiɗi, sin alawai na wiiɗi lai, tuku lai, waya maiɗi muɗaku nɵa lai.

¹⁶ Rut te wiyiɗi seŋ: Ku hogaŋa aŋ hinuku edi, aŋ yima sa edi suku par lai buri ma ɗa? Hlai na ku hala woni ɗa, aga mu hala woni lai, hlai na ku fana woni ɗa, aga mu fana woni lai, ɗaiku aga e bindi aŋ ɗaiŋa, Alaw na wiiku aga a bunda aŋ Alaw na wiya lai.

¹⁷ Hlai na ku mra woni ɗa, mu mra woni, aga e piŋa woni lai. Na ɓa a ɓurwaŋa gaiku a mri kai ɗa, EPIƊ-ƊAI a zaŋa nɵa lai, nɵa lai.

¹⁸ Won hlai na Nuumi te tala siiki na wiiɗi, buri te hala gaiɗi ɗa, te muɗa kir kai.

¹⁹ E hili piɗi marɗi ktai haa war Betlehem. Won hlai n'e cû aha war Betlehem, fuŋ n'abai ɗa paŋ a muguza. Falakai e miɗi: Hanɗa te Nuumi tiɓ ɗi?

²⁰ Te miɗiɗi: Ki yikiŋa Nuumi, muni na war muluk ɗa kir kai, ki yikiŋ ɗa ɓa Mara, muni na war gir, buri Alaw zi spak paŋ a tikaŋa gir n'abai li mada.

²¹ Mu hala sek ɗa mu kiɗa, EPIƊ-ƊAI a wayaŋasi gaini ta pa ca. Ki yikiŋa Nuumi ɗa buri ma ɗa? Asakal n'EPIƊ-ƊAI a faka amai sa, Alaw zi spak paŋ a zaŋa meefeŋ mai hanɗa ɵa ɗa!

²² Nuumi te wayasi edi midini afti na Mowab par gaiɗi Rut na Mowab par, na munini ahiɗi mai hanɗa ɵa. E cûsi war Betlehem, won hlai na ɗai e ɗa hiɗi seyem na yikini ɓa orge ɗa.