Romekai 6 - Ɗû na sɗik na wiini Alaw

Gaini mri sin tuwur, amma karni war Kristu

¹ Nɵa mu muɗumu zamai ɗa a ma ɗa? Mu sumnumu warni tuwur wiimu ca, kapai yum ɗa a za abai a suwa ɗi?

² Zaw kai zaŋ! Tumu mu ɗumu gaini mri sin tuwur ɗa, mu kuɗumu mu piyumu warni pra maɵa maɵa ɗa?

³ Ki siɗi ɓa, tumu paŋ na mu nuvumu baptisme na wiini Yesu Kristu ɗa, mu nuvumu na ɗa a baptisme na wiini mri, mu suɗumu ɵa kai ɗi?

⁴ Gaini baptisme na wiini mri hanɗa, tumu mu pumu azumai gaini, kapai maini na Kristu a ɵiyasi amai arbaɗi zi mri par warɗi abai na wiini Api, nɵa tumu lai aga mu piyumu payai na hehe.

⁵ Buri ɓa, na ɓa mu tupumu gaini war mri na maini na wiini nɵa ɗa, aga mu tupumu gaini war ɵiyi-n'amai na wiini nɵa lai.

⁶ Tumu mu suɗumu ɓa, ɗif na wel n'aŋ warmu a toko amai sin dagra gaini ni, kapai si na wiini tuwur ɗa a ɓilka edi, kapai mu hinumu aŋ bagakaini tuwur kir kaalai.

⁷ Buri ɓa ɗif n'a mra ya ɗa a pla edi ya, aŋ war tuwur kir kai.

⁸ Na ɓa mu mrumu gaini Kristu ɗa, mu yimumu lai ɓa aga mu sumnumu karmu gaini ni lai.

⁹ Mu suɗumu lai ɓa, Kristu n'a ɵiyasi amai arbaɗi zi mri par ɗa, aga a mra kir kai, buri ɓa mri a ŋa spakni midiɗi kir kai.

¹⁰ Na ɓa a mra ɗa, a mra ɗa burini tuwur, aga a mra pra kir kai, na ɓa aŋ karni ɗa, aŋ karni burini Alaw.

¹¹ Nɵa tiki lai, aga ki siɗi siki maini gaini mri sin tuwur, amma karki burini Alaw war Kristu Yesu.

¹² Nɵa ɗa ki hini tuwur a ŋa spak miɗini siki na mefeŋ ktai aga a mra ɗa kai, ki ɵini pin dirini na meefeŋ ɗa kaalai.

¹³ Ki hini ahi-tini-siki ktai kaw war ɵeŋ na wiini tuwur maini wala n'a va jre-ɗikat-kai amai gaini nɵa kai, amma ki si siki dama edi war ɵeŋ na wiini Alaw, maiɗi ɗai na karɗi n'e ɵiyisi amai arbaɗi zi mri par nɵa, ki si siki na gaini abaini paŋ, war ɵeŋ na wiini Alaw, maini wala n'a va jre-ɗikat amai gaini nɵa.

¹⁴ Buri ɓa tuwur aga a ŋa spak midiki kai, buri ɓa tiki ki ɗa pin seŋ zi gadai kai, amma ki ɗa pin yum.

War ɵeŋ na wiini jre-ɗikat

¹⁵ Maɵa ɗa? Aga mu zumu tuwur wiimu buri ɓa mu ɗumu pin seŋ zi gadai kai, amma pin yum ɗa ɗi? Duk kai zaŋ.

¹⁶ Tiki ki siɗi ɓa na ɓa ki ɗa war ɵeŋ na wiini ɗif maiɗi bagakai nɵa aŋ ɵini pini ɗa, ki ɗi bagakaini ni na ki ɗa ɵini pini ɗa. Ɵa kai ɗa, ki zi aŋ bagakai na wiini tuwur, ɵa kai ɗa na wiini ɵini gat n'a ka sini jre-ɗikat lai ki siɗi ɵa kai ɗi?

¹⁷ Amma pin barkani Alaw ɗa, won hlai na ki zisi bege pin tuwur yaaha ɗa, tiki ki yimi hitri na ki niviŋ ɗa gaiɗi agulki paŋ.

¹⁸ Nɵa ki plisi edi war tuwur par, ki bindi aŋ bagakai na wiini jre-ɗikat.

¹⁹ Mu muɗa na ɗa maini ɗif ɵa burini huruf na wiini neŋ-si ɗa: maini na ki hini siki gaini abaini paŋ maini bege war ɵeŋ na wiini hihir, gaini meefeŋ aŋ vidi edi war meefeŋ; nɵa tiyana ɗa, ki si siki gaini abaini paŋ aŋ bege war ɵeŋ na wiini jre-ɗikat, kapai ki dibi sin zi n'edi aŋ sɗik lai.

²⁰ Buri ɓa won hlai na ki ɗi ka aŋ bagakaini tuwur ɗa, jre-ɗikat ɗa spakni midiki kai.

²¹ Nɵa ali na ki wi ɗa a na wata ɗa? A wazagai na tiyana tiki mal maa siyer arki burini ta, buri ɓa vidini n'edi ɗa a mri.

²² Amma tiyana na ki plisi edi war tuwur par ya, ki bindi aŋ bagakai na wiini Alaw lai ɗa, ali na ki wiŋ ɗa, a zi n'edi aŋ jre-ɗikat, vidini n'edi ɗa a suŋfa n'a vada kai.

²³ Buri vrakni tuwur ɗa a mri, amma like zi yum, like n'Alaw a saŋ ɗa, a suŋfa n'a vada kai, war Yesu Kristu, Epiɗ-ɗai na wiimu.