Romekai 5 - Ɗû na sɗik na wiini Alaw

Ɵeɗ na gaini Alaw

¹ Na ɓa mu zumu edi ya aŋ jre-ɗikat pin yimi ɗa, mu tuyumu li gaini Alaw war Yesu Kristu Epiɗ-ɗai na wiimu.

² Tumu mu niyumusi amlai war yum gaini Ni, pin yimi, mu kulumu sumu war biyi-na-pin-ɵeɗ na wiiɗi abai wiini Alaw na ɗa pin Ni lai.

³ A suwa hanɗa pra, mu kulumu sumu war gir lai, buri ɓa gir ɗa a sa ziyini-seŋ na gaini hangal,

⁴ ziyini-seŋ na gaini hangal ɗa a sa jre-ɗikat na gaini titimi tam, jre-ɗikat na gaini titimi tam ɗa a sa biyi-na-pin-ɵeɗ,

⁵ biyi-na-pin-ɵeɗ ɗa a hina ɗif gaini siyer kai, buri ɓa dirini Alaw a ma li war agulmu gaini Seze-sɗik n'a sa sumu.

⁶ Buri ɓa, won hlai na mu ɗumusi ka hurofai hai, Kristu won hlai n'Alaw a ɗiyaŋ ta ɗa, a mra buriɗi na maafanai.

⁷ Na ɓa a kiɗa a za ɗa, ɗif a kiɗa a sa sini edi min mri burini ɗif na jre-ɗikat, hanɗa maa gaini gir haw, zaw ɗif a kiɗa a yimaŋ sini aŋ mra ezini ɗif na pɗem ɗi!

⁸ Amma, tiyana ɗa, Alaw a siŋka dirini edi sumu gaglai maini nɵa, Kristu a mra burimu, won hlai na mu ɗumusi tuwarai hai.

⁹ A suwa hanɗa pra, tiyana na mu zumu edi ya aŋ jre kai gaini fel na wiini ɗa, aga mu kurɗumu edi min hiy ɗa par gaini Ni lai.

¹⁰ Buri ɓa won hlai na mu ɗumusi ka aŋ gawni Alaw ɗa, mu tuyumu gaini war mri na wiini Ahini, a suwa hanɗa pra, won hlai na mu tuyumu gaini ya ɗa, Alaw aga a kurumu war suŋfa na wiini Ahini lai.

¹¹ Tiyana a suwa paŋ, mu firiyumu war Alaw, buri Yesu Kristu Epiɗ-ɗai na wiimu, war ni, tumu tiyana mu nuvumu tuyi na gaini Alaw.

Adam gaini Yesu Kristu

¹² Buri nɵa, maini na tuwur a halasi warɗi yai pin ɗif ktai nɵa, pin tuwur hanɗa mri a halasi lai, nɵa mri a ɵa tini edi piɗi ɗai paŋ, buri ɓa ɗai paŋ e zi tuwur.

¹³ Buri ɓa haa hlai na gadai a halasi ta ɗa, tuwur a na fu warɗi yai, amma won hlai na seŋ zi gadai a na fu kai ɗa, tuwur a ŋa kai.

¹⁴ Paŋktai, sin Adam par haa sini Musus ɗa mri a na ka a ŋa gaini spak midiɗi nagai na tuwur na wiiɗi a kata gaini hi-n'amai na wiini Adam ɗa kai ɗa lai paŋ, n'a siŋka miɗini ni n'aga a halasi.

¹⁵ Amma like na wiini yum, a na maini hi-n'amai ɗa nɵa kai. Buri ɓa pin meefeŋ na wiini ɗif ktai ɗa, ɗai viya e nivi mri, amma yum na wiini Alaw gaini like zi yum na wiini ɗif ktai, Yesu Kristu ɗa, siɗi ɗai na gaini abaiɗi ɗa, abai a suwa hanɗa pra.

¹⁶ Like hanɗa a na maini tuwur na wiini ɗif na ktai nɵa kai, buri ɓa sariya na wiini ɗif na ktai ɗa, te vada edi gaini kuɗi sariya na wiiɗi ɗai murɗakai paŋ, amma like zi yum na pin meefeŋ na wiya ɗa, a vada edi gaini zi n'edi aŋ jre-ɗikat ɗa lai.

¹⁷ Buri ɓa, pin meefeŋ na wiini ɗif ktai, mri a ŋa spak pin ɗif na ktai hanɗa, nagai n'e nivi yum na gaini abaini, gaini like na wiini jre-ɗikat lai ɗa, aga e ŋi war suŋfa gaini Yesu Kristu suwa azi gama ɗa?

¹⁸ Nɵa ɗa, maini na pin meefeŋ na ktai ɗa, kuɗi sariya a yima ɗai murɗakai paŋ, nɵa lai, pini vi n'amai na wiini jre-ɗikat na ktai, zi n'edi aŋ jre-ɗikat n'a sa suŋfa ɗa a wa tini edi midiɗi ɗai paŋ lai.

¹⁹ Buri ɓa pin ɵinini gat-kai na wiini ɗif ktai ɗa, ɗai na gaini abaiɗi e bindi tuwarai, nɵa lai pin ɵinini gat na wiini na ktai, ɗai na gaini abaiɗi aga e bindi jrekai lai.

²⁰ Seŋ zi gadai ɗa a halasi kapai meefeŋ a riya amai, amma hlai na tuwur a suwa li woni viya ɗa, yum na wiini Alaw a za abai a suwa pra.

²¹ Kapai ɗa maini na tuwur a ŋa spak war mri nɵa, yum ɗa lai a ŋa spak war jre-ɗikat haa sin suŋfa n'a vada kai gaini Epiɗ-ɗaimu Yesu Kristu.