Romekai 4 - Ɗû na sɗik na wiini AlawAbraham a wala n'e tili sini par 1 Nɵa aga mu muɗumu burini Abraham na tiymu na war neŋ-si ɗa a ma ɗa? A nava ɗa a ma ɗa? 2 A nafa ɓa Abraham a za edi aŋ jre-ɗikat pin sɗa ɗa, a wala n'a kiɗa a kola sini burini, amma wuzani arni Alaw ɗa a na maini hanɗa ɵa kai. 3 Kadai tiɓ ɗa, ɗû a muɗa maɵa ɗa? Abraham a tika yimini midini Alaw, hanɗa a pɵa burini aŋ jre-ɗikat. 4 Ɗif n'a za sda ɗa, vrakni a pɵa aŋ zinai kai, amma a wala zi dewele n'a siɗa aŋ sa sini. 5 Amma ni n'a za wala ktai kai, amma a yima pin ni n'a bunda ɗif na tuwur edi aŋ jre-ɗikat ɗa, yimi na wiini ɗa a pɵa aŋ jre-ɗikat. 6 Nɵa lai, David a na muɗa miɗini pɗem na wiini ɗif mirɗek n'Alaw a pɵaŋ aŋ jre-ɗikat burini sdani kai ɗa maini nɵa: 7 Ɵeɗ midiɗi nagai n'e nivi ni burini meefeŋɗi ya, na tuwurɗi a haza edi haz! 8 Ɵeɗ midini ni n'EPIƊ-ƊAI a pɵa tuwurni midini kai! 9 Pɗem hanɗa, a na buriɗi nagai n'e ɵi gurgle kiiɗi ɗi? Zaw a na buriɗi nagai n'e ɵi gurgle kai lai ɗi? Buri ɓa tumu mu muɗumu ɓa yimi na wiini Abraham ɗa a pɵa burini aŋ jre-ɗikat. 10 Won hlai n'a pɵa burini aŋ jre-ɗikat na ɗa a na fu maɵa maɵa ɗa? A na fu ɗa a ɵa gurgle ya zaw a ɵa gurgle kai hai ɗi? A na fu ɗa a ɵa gurgle ya kai, amma a ɵa gurgle kai hai. 11 A nava ɵini-gurgle aŋ wala zi siŋki, maini tampoŋ na wiini jre-ɗikat n'a navaŋ pin yimi, won hlai na ɵa gurgle kai hai, gaini hanɗa, a bunda aŋ epiɗi nagai n'e yimi n'e nivi ɵini gurgle kai hai, kapai jre-ɗikat a pɵa aŋ wiiɗi lai. 12 Ni ɗa a epiɗi nagai n'e ɵi gurgle ɗa lai, wiiɗi nagai n'e ɵi gurgle kadai kai, amma nagai n'e hili pin yimi na wiini Abraham n'apumu, won hlai n'a na ka a ɵa gurgle kai hai ɗa. Ɵinini ha na wiini Alaw a nava pin yimi 13 Buri ɓa, ɵinini ha na ɓa Abraham gaini pinzibani aga e nivi afti aŋ bulum ɗa, a za ɗa pin gadai kai, amma pin jre-ɗikat na wiini yimi. 14 Buri ɓa, na ɓa nagai n'e mili bulum ɗa, e ɗi nagai n'e ɗa pin gadai ɗa, yimi ɗa a nafa wala kir kai, ɵinini ha ɗa ɗe, a bunda aŋ wala kadai lai. 15 Buri ɓa seŋ zi gadai ɗa a kasi hiy, hlai na seŋ zi gadai aŋ woni kai ɗa, hi-n'amai midini gadai ɗe aŋ kaalai. 16 Nɵa ɗa, a za na ɗa pin yimi, kapai a siŋka edi ɓa a yum; kapai ɵinini ha ɗa a za aŋ wiini pinzibani paŋ, wiiɗi nagai n'e ɗa pin gadai ɗa kiiɗi kai, amma wiiɗi nagai n'e ɗa pin yimi na wiini Abraham ɗa lai. Ni ɗa a apumu paŋ maini n'a na gai ɗû nɵa: 17 Aga mu zuku aŋ epini pinziba viya, ni a na maini nɵa wuzani Alaw n'a yima pini, n'a bindiɗi zi mri karɗi, n'a za wazagi n'a na fu kai ɗa lai. 18 Abraham a baiya pin ɵeɗ haa mini gai tiki ta, amma a hinaŋ kai, a yima, nɵa a bunda aŋ epini pinziba viya, maini miɗi n'a muɗa ka ɓa: Pinzibaku aga a za maini hanɗa ɵa lai. 19 Yimini Abraham ɗa a ɗiya gdaŋ ɵa, a tala sini maini gaini mri su ɵa, Sara ɗe te kiɗa te wa kir kaalai, buzani a za gobi miya ɗaw. 20 Amma wuzani ɵinini ha na wiini Alaw ɗa, a ba yimi na wiini edi kai, amma a nava gdaŋ war yimini, a sa kol sini Alaw lai. 21 A yima fakat ɓa wala n'Alaw a za ha midini ɗa spakni a na buri a vaŋ amai lai. 22 Buri nɵa wala hanɗa a pɵa burini aŋ jre-ɗikat. 23 Amma wala n'aŋ gaini ɗû ɓa: “Hanɗa a pɵa burini ɗa”, a na burini ni kiini ktai kai. 24 Amma a na burimu tumu lai, aga a pɵa burimu lai, buri tumu mu yimumu ɓa ni n'a ɵiya Yesu Epiɗ-ɗai na wiimu amai arbaɗi zi mri par, 25 Ni n'a sa edi burini tuwurmu, n'a ɵiya amai kapai mu zumu edi aŋ jre-ɗikat lai. |
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
Bible Society of Cameroon