Romekai 3 - Ɗû na sɗik na wiini Alaw

Ɵinini gat-kai na wiiɗi ɗai

¹ Nɵa ɗif na Yudiya ɗa a sûwiɗi ɗai na zamai ɗa gaini a ma ɗa? Zaw ɵini-gurgle ɗa pɗemni tiɓ ɗa a ma ɗa?

² Burini suwai ɗa, e suwi ɵa: Seŋ na wiini Alaw a sasi avut ɗa siɗi nagai.

³ Na ɓa ɵa maɵa kiɗi? Nɵa na ba zamai e yimi kai ɗa, yimi kai na wiiɗi nagai ɗa, a kiɗa a bunda yimi na war Alaw aŋ wala kadai ɗi?

⁴ Duk kai zaŋ, hanɗa a siŋka edi ɓa: Alaw a jre, ɗif murɗek paŋ ɗa a z'eles, maini n'aŋ gaini ɗû nɵa: kapai ku siŋka edi aŋ ɗif na jre war seŋku zi miɗi ku nava rɗi n'amai lai, won hlai n'e kuku wuzaɗi sariya.

⁵ Na ɓa jre-ɗikat-kai na wiimu a siŋka jre-ɗikat na wiini Alaw edi ɗa, mu muɗumu zamai ɗa a ma ɗa? Alaw a jre-ɗikat-kai, won hlai n'a hinasi hiyni mudumu ɗi? Mu muɗaŋ maini na ɗai e miɗiŋ ɵa ɗa.

⁶ Duk kai zaŋ, na ɓa ɵa ɗa, Alaw a siɗa aŋ ɗûklûti sariya midiɗi ɗai na warɗi yai maɵa maɵa ɗa?

⁷ Na ɓa pin eles na wiya ɗa, jre na wiini Alaw a riya wuzani sek buriɗi abaini lai ɗa, ta ɗa e ɗûklûti sariya mada ɓa mu na tuwur katawai ɗa buri ma ɗa?

⁸ Zamai e miisiyi, ɗai nagai ɗa a juva ɓa sariya te ko midiɗi. E piyi seŋ midiyi ɓa mi miɗi ɓa: Zumo meefeŋ, kapai pɗem a halasi pin par. Na ɓa ɵa ɗa tiyi mi zi meefeŋ hanɗa kai buri ma maɗa?

⁹ Nɵa tumu mu suuɗumu na zamai ɗa ɗi? War wazagai paŋ kaalai. Buri ɓa seŋ hanɗa a na burimu paŋ, ɓa: Ɗai gai hlaiɗi, Yudiyakai gaiɗi Grekka paŋ, e ɗa azumai pin tuwur.

¹⁰ Maini n'aŋ gai ɗû nɵa: Ɗif na jre aŋ kai, ktai maa aŋ kai;

¹¹ ɗif zi yel aŋ kai, ktai n'a paya Alaw aŋ kaalai.

¹² Nagai paŋ e wûli edi, e sili edi piɗi marɗi kafa. Ktai n'a za pɗem aŋ kai, ktai maa aŋ kai.

¹³ Gurɗokɗi a waŋ na gaini mili mal, gaiɗi alsiɗi e zi rhai, masnaw na wiiɗi makai aŋ war miɗi.

¹⁴ Miɗi a va gaini tusa gaini seŋ na ɗewek lai.

¹⁵ Eziɗi kolek aŋ ma fel edi.

¹⁶ Hlai n'e vigi li woni ɗaw a na ɗa a ɓilki-n'edi gaini gir.

¹⁷ Futi zi ɵeɗ e siɗiti kai.

¹⁸ Hunai ktai na pin Alaw a na wuzani arɗi kaalai.

¹⁹ Tumu mu suɗumu ya ɓa, wala paŋ na seŋ zi gadai a muɗa midini ɗa, a muɗaŋ na ɗa buriɗi nagai n'e ɗa pini gadai ɗa, kapai miɗi ɗai paŋ a ba, ɗai na warɗi yai gaini abaiɗi paŋ, kapai e siɗi siɗi aŋ ɗai na maafanai wuzani arni Alaw.

²⁰ Buri ɓa wuzani arni ɗa, ktai n'aga a za sini edi aŋ jre pini sdani gadai ɗa aŋ kai, buri ɓa gaini seŋ zi gadai ɗa, ɗif a kiɗa aŋ sɗa tuwurni.

Zi n'edi aŋ jre-ɗikat gaini yimi

²¹ Amma tiyana gaini gadai kai ɗa, jre-ɗikat na wiini Alaw, na seŋ zi gadai gaiɗi ɗai na min Alaw e miɗi miɗini ɗa, a siŋkasi edi ya.

²² Hanɗa a jre-ɗikat na wiini Alaw pin yimi na war Yesu Kristu, n'a na buriɗi nagai paŋ n'e yimi, buri ɓraw a na arbaɗi ɗai kai.

²³ Buri ɓa ɗai paŋ e zi tuwur, e kiɗi e gi siɗi abai na wiini Alaw kai.

²⁴ Amma e zi edi aŋ jre ɗa kadai, pin yum na wiini kadai, buri pili-n'edi na war Yesu Kristu,

²⁵ Ni n'Alaw a varaŋ aŋ wala zi hizi tuwur edi, gaini felni gaini yimi, aŋ siŋka jreni edi, buri ɓa n'a vugasi a ɗipar ɗa, a za gir wiiɗi ɗai pini kai.

²⁶ Pin ziyini-seŋ na wiini na gaini hangal, Alaw a firiya a siŋka jreni edi war mefeŋ na tiyana, kapai a siŋkiɗi edi ɓa a na jre, a bunda ni n'a yima war Yesu ɗa aŋ jre- lai.

²⁷ Nɵa kûlûni-si na wiimu ɗa aŋ wata ɗa? Aŋ kir kai zaŋ. Pin gadai na wata ɗa? Pin na wiini sɗa ɗi? Zaw kai, amma pin gadai na wiini yimi.

²⁸ Buri tumu mu yimumu ɓa, ɗif a za edi aŋ jre-ɗikat ɗa pin yimi, pin sdani gadai kai.

²⁹ Zaw Alaw ɗa a Alaw na wiiɗi Yudiyakai kiiɗi ɗi? Ni a Alaw na wiiɗi pinzibaɗi ɗai na zamai ɗa lai kai ɗi? Nkam, a Alaw na wiiɗi pinziba na zamai ɗa lai.

³⁰ Na ɓa a jre ɓa Alaw a na ktai ɗa, aga a bindiɗi nagai n'e ɵi gurgle ɗa aŋ jre ɗa pin yimi, a bindiɗi nagai n'e ɵi gurgle kai ɗa pin yimi ɗa lai.

³¹ Nɵa gaini yimi ɗa, mu bundumu gadai ɗa na ɗa aŋ wala kadai ɗi? Duk kai zaŋ! Amma gaini yimi mu suŋkumu edi na ɗa a pɗemni gadai ɗa mal.