Biblia Todo Logo
Bìoball air-loidhne

- Sanasan -

Romekai 16 - Ɗû na sɗik na wiini Alaw


Ɵiɓini wuti

1 Mu ɵinitikiɗi Fobe, tawalmu na muni, na t'aŋ war sda zi ɵeŋ na war tipi na war Kenkreya.

2 Ki yimiti siki gaini futini war Epiɗ-ɗai, maini n'a juva siɗi ɗai na wiini Alaw nɵa. Wala paŋ n'a sûwiti li, na te firiya zinai tiki par warni ɗa, ki zini piɗi warni, buri ɓa na te zina piɗi ɗai viya, ta lai paŋ.

3 Ki ɵiɓi wuti wiiɗi Priskila gaini Akwilas, mara zi sɗa na war Yesu Kristu,

4 nagai e firiyi ɓa suŋfaɗi a ba wiini, kapai na wiya a kora. Mu ziɗi tese na ɗa mu ta ktai kai, tipi n'arbaɗi pinziba na zamai ɗa e ɗa ziɗi tese lai.

5 Ki ɵiɓiɗi wuti wiiɗi tipi n'e ɗa aha war dalamɗi lai. Ki ɵiɓini wuti wiini Epainetus, marmaya zi diri gara, ni n'a merfeŋni seyem n'avut na wiini Kristu war Aziya.

6 Ki ɵiɓiɗi wuti wiiɗi Mariya, na te za sda buriki viya gara.

7 Ki ɵiɓini wuti wiini Andronikus, gaini Yuniyas, na zagalakaiya, mara na war daŋgai lai. Apostelai e diriɗi gara, e yimi war Kristu ɗa maa wuza ta par.

8 Mu ɵiɓini wuti wiini Ampliyatus, marmaya zi diri gara war Epiɗ-ɗai.

9 Ki ɵiɓini wuti wiini Urbanus gaini Stakus, marmaya zi diri gara lai.

10 Ki ɵiɓini wuti wiini Apeles, n'a siŋka edi arɗi ɗai ɓa ni a ɗifni Kristu fakat fakat. Ki ɵiɓiɗi wuti wiiɗi nagai n'e ɗa war dalamni Aristabulus.

11 Ki ɵiɓini wuti wiini Herodiyon, na zigela, ki ɵiɓiɗi wuti wiiɗi nagai n'ahani Narsis, n'e ɗa war Epiɗ-ɗai ɗa.

12 Ki ɵiɓini wuti wiini Trifene gaini Trifoze, e zi sɗa viya gara war Epiɗ-ɗai, ki ɵiɓiɗi wuti wiiɗi Perside, marmaya na muni zi diri gara, te za sda viya gara war Epiɗ-ɗai.

13 ki ɵiɓini wuti wiini Rufus, ni n'a zi viri na wiini Epiɗ-ɗai, gaiɗi emini na t'ama lai.

14 Ki ɵiɓini wuti wiini Asinkritus, Flegon, Hermes gaini Patrobas, gaini Hermas gaiɗi tawalakaiɗi n'e ɗa gaiɗi lai.

15 Ki ɵiɓini wuti wiini Filologus gaiɗi Juliya, Nere gaiɗi tawalni, Olimpas gaiɗi ɗai na wiini Alaw n'e ɗa gaiɗi lai.

16 Ki ɵiɓi wuti wiiɗi marki, ki gubi marki war hiini na sɗik, tipi na wiini Kristu ɗa paŋ e ɗa ɵiɓiki wuti.


Gadai n'asakal

17 Tawalakai, mu siiwiki, ki zi hangal gaiɗi nagai n'e kisi ɓraw, gaini kɵi n'azumai arbaɗi ɗai, n'a kata gaini hitri na ki niviŋ ɗa kai, ki yimi siki edi siɗi par.

18 Buri ɓa ɗai na mai hanɗa ɵa, e ɗi ɗaini Kristu, Epiɗ-ɗai na wiimu kai, amma e zi na ɗa a ɵeŋ na wiini warɗi, gaini seŋɗi na pɗamai, gaini miɗiɗi na jibet gara lai ɗa, e wûliɗi ɗai na gaini niyi kai ɗa edi.

19 Amma tiki ɗa, ɗai paŋ e siɗi ɓa ki ɗi ɗai na ki ɵini gat gara, nɵa mu firiya buriki gara, amma mu firiya ɓa ki zi aŋ ɗai na yalakai, war sɗa na pɗamai, hilu sini wazagai na maafanai nɵa.

20 Alaw na wiini ɵeɗ, a ŋa gobi aŋ kirpa satan azumai pin eziki. Yum na wiini Epiɗ-ɗaimu Yesu Kristu a sumna gaiki.

21 Timotewus, maya na war sɗa a na ɵiɓiki wuti, gaini Lusiyus, Yason, gaini Sosipater, na zagalakaiya lai e ɵiɓiki wuti.

22 Ta, Tertiyus, na mu ɗûti letre hanɗa, mu na ɵiɓiki wuti war Epiɗ-ɗai.

23 Gayus, na mu sumna aha gaini, n'a yimiɗi tipi paŋ aha gaini lai ɗa, a na ɵiɓiki wuti. Eraste, ɗif n'a giɗima farai na war fuŋ n'abai hanɗa paŋ a na ɵiɓiki wuti gaini Kartus na tawalni lai. [

24 ]


Kol sin Alaw zi yel na ktai

25 Sin ni na spak aŋ war tini, buri a bindiki gdaŋai pin labar na pɗem gaini ɓikini seŋ na wiya, na miɗini Yesu Kristu, aŋ kata gaini wala zi ŋoyai, n'a na ka gaini ŋûyi cok, haa war pi zi tiki par, n'a na siŋkasi sini edi na ɗa nɵa,

26 amma a siŋkasi edi gaglai tiyana war ɗû na wiiɗi ɗai na min Alaw, pin miɗi na wiini Alaw n'a vada kai, n'a siŋkasi edi arɗi ɗai paŋ, kapai ɗai paŋ e yimi, e gidi lai.

27 Kol sin Alaw na ktai, zi yel hanɗa, war Yesu Kristu haa hlai n'a vada kai. Amen.

La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964

Bible Society of Cameroon
Lean sinn:



Sanasan