Romekai 13 - Ɗû na sɗik na wiini Alaw

N'abakai zi giɗimi hlai

¹ Hina asiya asiya ɗi paŋ a ɵina piɗi nagai n'e giɗimi hlai ɗa, buri ɓa abai na te halasi sini Alaw par kai t'aŋ kai, spak n'a na ta ta paŋ ɗa, a tikaŋ azumai ɗa a Alaw.

² Buri nɵa, asiya ɗi paŋ n'a faka amai siɗi n'abakai ɗa, a faka amai na ɗa sini gadai na wiini Alaw, nagai n'e fiki amai e kisi midiɗi ɗa a sariya.

³ Buri ɓa, n'abakai ɗa e ɗa buri e mili hunai pini ni n'a na za pɗem ɗa kai, amma pin ni n'a za meefeŋ ɗa, na ɓa ku firiya ku huna ɗif n'abai ɗa kai ɗa, za wala na pɗem, nɵa aga a muɗa zaida na pɗem edi muduku.

⁴ Amma na ɓa ku na za meefeŋ ɗa, huna, buri ɓa aŋ gaini kaɵkar tini ɗaw na ɗa kadai kai. Kaɵkar hanɗa aŋ war ɵeŋni Alaw ɗa aŋ muɗa jre, aŋ za hiy sin ni n'a za meefeŋ ɗa lai.

⁵ Buri nɵa, a pɗem buri ku ɵina pini, buri na ɓa aga a za hiy ɗa kai, amma maini na mu suɗuŋmu war hiinumu ɓa a za ɗa ɵa lai.

⁶ Buri nɵa tiki ki virgi lambu na ɗa buri hanɗa, n'abakai n'e ŋi midiki ɗa e ɗa war ɵeŋ n'Alaw na ɗa buri hanɗa lai.

⁷ Ki zi sini asiya asiya ɗi paŋ pin kiɗini kiɗini, si lambu wiini ɗif n'a yima lambu ɗa, tar sini ɗif n'a tara, hûni ɗif n'e hûniŋ ɗa, kûli ɗif n'e kûlûŋ lai.

Diri n'arbaɗi marki

⁸ Ki hini wala zamai arbaɗi marki kai, sai a diri n'arbaɗi marki tar. Buri ni n'a dara maini ɗa, a va amai ɗa a gadai.

⁹ Buri ɓa gadai na ɓa: Ku za maɵara kai, ku fuɗa ɗif kai, ku hala wala kai, ku za suuna kai, gaini gadai na zamai zamai paŋ ɗa a va amai war seŋ na ɓa: Aga ku dara maiku maini suku nɵa ɗa.

¹⁰ Ɗif n'a dara maini ɗa, a za wala na meefeŋ sini kai; Dir ɗa a vi n'amai na wiini seŋ zi gadai.

Simni na gaini zizini burini gizini Kristu

¹¹ Maini na ki ɗa tili mefeŋ na mu ɗumu warni na ɗa ɵa, a hlai na ki ɵiyi amai war weseŋ par. Buri ɓa, kûri aŋ mumu gobi a suwa na mu yumumu avut ɗa.

¹² Duvuk te vuga vug, dawai par te ŋasi gobi. Nɵa, pukumu sɗa na wiini gegeŋ ɗa edi sumu par, wumu wazagai zi gaw na wiini gaglai ɗa sumu.

¹³ Piyumu payai n'a juva girvudi ɗa, war simi zi gorom gaini ci ɗa kai, war payai na hihir gaini zi vilmi ɗa kai, war sispai gaini sile ɗa kaalai.

¹⁴ Amma ki wi Epiɗ-ɗai Yesu Kristu siki, ki tiki hiiniki midini dirini neŋ-si kai, kapai ki vini dirini amai kai.