Romekai 12 - Ɗû na sɗik na wiini Alaw

Payai na hehe

¹ Tawalakaya, mu siiwiki, pin pɗem na wiini Alaw, aŋ si siki edi maini ɓaka na karni, na sɗik, n'Alaw a firiyaŋ ɗa nɵa, hanɗa a sdaki na ki ziŋ, na kata pin ɗû ɗa.

² Aga ki zi siki maiɗi ɗai na warɗi yai hanɗa nɵa kai, amma aga ki bindi bindi na hehe, na wiini hiiniki, kapai ki siɗi dirini Alaw a na maɵa ɗa: Wala n'a na pɗem, n'a daraŋ, na gaini vi amai war pɗem lai.

³ Pin yum n'a sasi sa, mu dara mu muɗa sini asiya asiya ɗi paŋ arbaki, buri aga a tala sini ba a suwa ɗai paŋ kai, amma a paya gaini hangal, asiya asiya ɗi paŋ pin kiɗini yimi n'Alaw a saŋ sini.

⁴ Buri maini n'ali-tini-si na war si ktai a na viya nɵa, amma ali-tini-si paŋ ɗa sdani kal kal kai.

⁵ Nɵa lai, tumu na mu ɗumu viya hanɗa, mu ɗumu si ktai war Kristu, tumu paŋ mu ɗumu ali-tini-siɗi marmu.

⁶ Amma like zi yum a na kiini kiini, pin yum n'a sa sumu ɗa, na ɓa a like zi miɗi seŋ na wuze edi ɗa, a juva ɓa a kata pin yimi ɗa;

⁷ na ɓa a zi ɵeŋ ɗa, a za ɵeŋ ni ɗa, ni n'a hitra ɗa, a ɗiya min hitraini ɗa;

⁸ n'a sa arai zi pi ɗa, a sa arai zi pi na wiini ɗa, ni n'a sa tini edi ɗa, a zaŋ gaiɗi agul zi melke, ni n'a ɵa wuze ɗa, a zaŋ kokolai tar tar, ni n'a za yum ɗa, a zaŋ gaini firiyi lai.

⁹ A juva ɓa diri ɗa a za gaini rhai kai, yimi meefeŋ ɗa aŋ wala na hihir, ki rgi siki amai sini wazagai na pɗamai.

¹⁰ Burini diri zi tawal ɗa, diri marki arbaɗi marki, ɗif paŋ a baiya kai aŋ kola miɗini maini amai.

¹¹ Ki zi faali war sdani Epiɗ-ɗai kai, amma ki ziŋ kokolai, kokolai, ki siiki war seze, ki zi ɵeŋni Epiɗ-ɗai maiɗi bagakai nɵa.

¹² War biyi na pin-ɵeɗ ɗa, ki simni gaini firiyi, war gir ɗa, yimiŋ siki, war siiwa ɗa, ki hini hlai a ba edi kai.

¹³ Ki zini piɗi ɗaini Kristu, na suwai te sûwiɗi ɗa, ɗai n'e hiliɗi li ahaki paŋ ki yimiɗi siki pɗem.

¹⁴ Ki ɓikiɗi nagai n'e ziki gir, ki ɓiki, ki tûûsi kai.

¹⁵ firiyi gaiɗi nagai n'e firiyi ɗa, ki tuwi gaiɗi nagai n'e tuwi ɗa lai.

¹⁶ Ki hini hiiniki a tapa ktai, ki hini kûlûni-si a niya warki kai, ki tiɓi pin wazagai zi zi n'abakai ɗa kai, ki zi siki aŋ ɗai na yalakai gara kai.

¹⁷ Ki wiyi meefeŋ miɗini meefeŋ sin ɗif kai, ki zi wazagai na pɗamai arɗi ɗai paŋ.

¹⁸ Na ɓa hanɗa a sɗa aŋ za, sini kiɗiki tiki par lai, aga ki simni ɵeɗ gaiɗi ɗai paŋ.

¹⁹ Tiki zi diri gara, ki wiyi meefeŋ na ɗif a zaŋ siki gaini midiki dama kai, amma ki hini hiy na wiini Alaw a za hanɗa, buri aŋ gaini ɗû main nɵa: Aga mu waya meefeŋ n'e ziŋ ɗa mu ta, mu siɗi vrak na pin sdaɗi mu ta lai. A muɗaŋ a Epiɗ-ɗai.

²⁰ Amma na ɓa gawku aŋ gaiɗi wiyamai ɗa, sini wala zi simi, na ɓa sai te na zaŋ ɗa sini wala zi ci lai. Buri ɓa, na ɓa ku na zaŋ ɵa ɗa, ku tipini midini na ɗa a morjoni afu.

²¹ Ku hina meefeŋ a rɗa amai muduku kai, amma gaini pɗem, rɗa amai midini na meefeŋ.