Romekai 11 - Ɗû na sɗik na wiini Alaw

Alaw a hiniɗi pinzibaɗi Izrayel, na ɗaini, edi kai

¹ Nɵa mu zilba sa ɓa: Alaw a hiniɗi ɗaini ɗa edi mak ɗi? Zaw kai zaŋ. Buri ɓa ta mal, mu ɗif na Izrayel, Mu pinzibani Abraham, war vokni Benyamin lai.

² Alaw a hiniɗi ɗaini edi kai, pinziba n'a viriɗisi haa avut par ɗa. War ɗû hlai zamai a na, na woni Eliyas a ɗuula midiɗi aliɗi Izrayel? Ki siɗiŋ ɵa kai ɗi? A muɗa maini nɵa:

³ EPIƊ-ƊAI, nagai e fiɗiɗi ɗaiku na mini Alaw edi kafa, e hû gûwiŋ zi ɓaka na wiiku azumai, mu hina ɗa mu ta kiya pal, e firiyi e fiɗiŋa edi lai.

⁴ Alaw a wiyini seŋ ɓa maɵa ɗa? A muɗa: M'aŋ gaiɗi maɵagai dubu muguzak n'e hûrgû kurnaiɗi azumai wuzani Alaw Baal duk kai.

⁵ Nɵa lai, war mefeŋ na girna ɗa, piɗi n'a hina agwi, pin viri n'Alaw a viriɗi pin yumni ɗa.

⁶ Na ɓa a za pin yum ɗa, a na burini sɗa kir kai, ɵa kai ɗa, yum ɗa a yum kir kai.

⁷ Mu muɗumu maɵa ɗa? Wala na pinzibaɗi Izrayel e piyiŋ ɗa e niviŋ kai, e niviŋ e ɗi nagai n'Alaw a viriɗi edi ɗa, na zamai ɗa e bindi sirkiŋ.

⁸ Maini n'aŋ gai ɗû nɵa: Alaw a hinasi seze zi weseŋ n'abai midiɗi, a siɗi arai n'a tala wala kai, gaini ɵime n'a ɵina wala kaalai, haa girna.

⁹ David lai a muɗa: a juva ɓa simiɗi a bunda buriɗi aŋ azaw, aŋ agu, aŋ wala zi dibi ezi, aŋ gir na gai futini n'a kiɗa a za siɗi lai.

¹⁰ A juva ɓa arɗi a ŋulva, a tala kir kai, Ku hiniɗi e ɗiyi amai cir kir kai ɵa haa kureɗ.

Hiini na wiini Alaw na buriɗi Yudiyakai gaiɗi pinziba na zamai

¹¹ Nɵa mu muɗa ɗa ɓa: Yudiyakai eziɗi a turma ɓa kapai e kɵi azumai ɵa gamai ɗi? Zaw kai! Amma pin kɵi n'azumai na wiiɗi, kûri a co siɗi pinziba na zamai ɗa lai. Kapai a riya sile na warɗi ɗa amai.

¹² Na ɓa meefeŋ na wiiɗi, a bunda aŋ wala zi der na wiiɗi ɗai na midiɗi yai, na wiiɗi ɗai na midiɗi yai ɗa, na ɓa kɵi na wiiɗi ɗa a der na wiiɗi pinziba na zamai ɗa lai ɗa, wiyi n'aga e wiyisi sin kûri gai hlaiɗi ɗa, aga a za aŋ wla n'abai a suwa hanɗa azi gama ɗa?

¹³ Mu muɗa na ɗa siki tiki, na war pinziba na zamai ɗa, ta ɗa m'apostel na wiini piziba na zamai ɗa ɵa, mu kola sɗa n'aŋ ta ɗa lai.

¹⁴ Kapai na ɓa a sɗa aŋ za ɗa, mu ɵiya sile na warɗi ɗai na war pinzibaŋa ɗa amai, kapai mu kora na zamai arbaɗi par agwi lai.

¹⁵ Na ɓa hini n'Alaw a hiniɗi edi, a za aŋ tuyi na wiiɗi ɗai na yai gaini Alaw ɗa, yimi n'aga a yimiɗi sini pra ɗa, wala n'aga a za pini ɗa a ma lai ɗa? Zi mri mal maa aga e bindi karɗi kai ɗi?

¹⁶ Nɵa na ɓa merfeŋni seyem ɗa a na sɗik, n'aga e hiɗiŋ asakal zaw ɗa aga a za sɗik lai, na ɓa sirdaini luwuŋ a na sɗik ɗa, tin luwuŋ ɗa a na ɵa lai.

Luwuŋ olive n'a diya edi buza, gaini zi pi

¹⁷ Aliɗi Izrayel e ɗa maini luwuŋ olive n'e pin gai pi, n'e ɗûkûli tini zamai edi yaw nɵa, amma tuku ɗa, ku na maini tin luwuŋ olive n'edi buza, e duɓukuku sini tin luwuŋ gai diɓiki, na ɓa ku na za sda gaini sirdai, ku na nava siyem sini luwuŋ olive par lai ɗa,

¹⁸ nɵa ku kola suku miɗini tin luwuŋ kai, na ɓa ku na kola suku ɗa, aga ku wula muduku kai ɓa sirdai n'aŋ puku ɗa a wiiku tuku kai, ku ɗiya na ɗa miɗini sirdai hanɗa.

¹⁹ Nɵa aga ku muɗa kai ɓa: E ɗûûli tin luwuŋ edi ɓa kapai e diɓikiŋa ta war balamni.

²⁰ A futini, tini luwuŋ hanɗa, a ɗukla edi burini yimi kai na wiiɗi, tuku ɗe ku duɓuka woni ɗa burini yimi na wiiku lai. Ku kola suku buri hanɗa kai, amma ku huna.

²¹ Buri ɓa, na ɓa Alaw a hina tin luwuŋ na daaba ɗa kai, a ɗuklaŋ edi ɗa, ku za hangal, ɵa kai ɗa, aga a hinuku kai, a ɗukluku edi ɵa lai.

²² Nɵa ɗa, ku tika hangalku sini pɗem gaini suwar na wiini Alaw, suwar siɗi nagai n'e kɵi azumai, pɗem na wiini Alaw suku tuku lai, na ɓa ku hina li war pɗem hanɗa, ɵa kai ɗa, tuku lai aga e ɗukluku edi.

²³ Nagai nɵa lai, na ɓa e hini war yimi kai na wiiɗi ɵa ca kai ɗa, aga e diɓiki amai lai, buri Alaw spakni a na aŋ wiyiɗisi amai katawai pra.

²⁴ Buri ɓa, na ɓa tuku na kadai tiɓ e ɗuklukusi tin luwuŋ olive na buza par, e duɓukuku amai tin luwuŋ olive zi pi na ɗa gai diɓiki gdaŋ gdaŋ, kadai tiɓ a za ɵa kai, azi gama ɗa na ɓa a waya li aŋ ɗiɓikiɗi nagai mal, amai tin luwuŋ olive, n'a ɗûklûɗisi edi tini par ɗa, a siɗa aŋ za kai ɗi?

Kûri na wiiɗi aliɗi Izrayel

²⁵ Buri nɵa, tawalakaya, mu firiya ɓa aga ki simni war siɗi kai ɗa kai burini wala zi ŋoyai, buri ki tili siki aŋ ɗai a yalakai gara kai, galɗi aliɗi Izrayel zamai e bindi sirkiŋ ɗa ɓa kapai abaiɗi pinziba na zamai ɗa a niyasi amlai.

²⁶ Asakal hanɗa par, Izrayel gaini abaiɗi paŋ aga e kûri, maini n'aŋ gaini ɗû nɵa: n'a bla baŋa aga a halasi edi war Siyon par, aga a tika meefeŋ na wiiɗi pinzibani Yakob ɗa edi.

²⁷ Hanɗa a bonu n'aga mu zaŋ gaiɗi, won hlai na mu haza tuwurɗi li edi.

²⁸ War gal na wiini labar na pɗem ɗa, nagai e ɗi gaw na wiini Alaw buriki tiki, amma war gal na wiini viri na wiini Alaw ɗa, nagai e ɗi zi diri gara buriɗi tiyakaiɗi.

²⁹ Buri ɓa like zi yum, gaini yiki na wiini Alaw ɗa a kiɗa aŋ bunda kai.

³⁰ Buri ɓa tiki ki ɗi ka nɵa lai, a ɗipar ɗa, ki diri ki yimi pin Alaw kai, amma tiyana ɗa, pin yimi kai na wiiɗi ɗa, tiki ki nivi yum.

³¹ Tiyana ɗa, nagai lai e diri e yimi kai, burini yum na tiki ki ɗa warni, kapai nagai e kiɗi e nivi yum tiyana.

³² Buri Alaw a tipiɗi ɗai murɗakai paŋ amai war yimi kai na wiiɗi, kapai a za yum siɗi paŋ.

³³ Alaw ɗa abai gara, yelni gaini siɗini ɗa hulum gara lai, sariyani ɗa, ɗif a kiɗa a sɗa futini kai, wala n'a firiya a zaŋ ɗa, ɗif a sɗa ezini kai.

³⁴ Maini na ɗû a muɗaŋ ɗa nɵa: N'a sɗa hiini na wiini Epiɗ-ɗai ɗa asiya ɗa? Zaw, ɗif n'a siŋkini ka yel ɗa asiya ɗa?

³⁵ Zaw ɗif n'a sini ka wala avut ta, kapai ni a virgiŋni asakal par ɗa asiya ɗa?

³⁶ Wazagai paŋ a za sini ni par, gaini ni, a wiini ni lai. Kol a wiini haa hlai n'a vada kai. Amen.