Romekai 1 - Ɗû na sɗik na wiini Alaw

Labar na pɗem na Pawlus a ɓakaŋ

¹ Pawlus, bege na wiini Yesu Kristu, apostel pin yiki, n'a vara edi ɗaw burini labar na pɗem na wiini Alaw.

² - Labar na pɗem hanɗa, Alaw a za ha midini avut par, war miɗi ɗai na min Alaw, war ɗû na sɗik;

³ a labar na miɗini Ahini n'a wa war neŋ-si a wa war pinziba na wiini David.

⁴ Ni na war Seze sɗik Alaw a zaŋ aŋ ahini na gaini spak, won hlai n'a ɵiyaŋsi amai arbaɗi zi mri par, Yesu Kristu, Epiɗ-ɗai na wiimu.

⁵ Gaini ni, Alaw a za yum sa aŋ bundaŋa aŋ apostel, kapai war yikini, mu sɗa aŋ ɵiya hiiniɗi pinzibaɗi ɗai paŋ amai, aŋ zi pin yimi burini yikini.

⁶ Ɗai hanɗa tiki ki pɵi arbaɗi lai, tiki na Yesu Kristu a yikisi ɗa.

⁷ -Siɗi nagai paŋ n'e ɗa war Rome, zi diri gara na wiini Alaw paŋ, n'e ɗa sɗik pin yiki lai, Alaw Apumu gaini Epiɗ-ɗaimu Yesu Kristu e siki yum gaini ɵeɗ.

Pawlus a dara a hala a tiliɗi ɗaini Kristu na war Rome

⁸ Mu sa tese avut sin Alaw na wiya, buriki paŋ war Yesu Kristu, buri ɓa ɗai e ɗa miɗi gaini yimi na wiiki pɗem midiɗi duniya paŋ.

⁹ Alaw na mu na siiwaŋ war sezeŋa, na mu na ɓaka labar na pɗem na wiini Ahini lai ɗa, ni a zaidaŋa buri a siɗa ɓa mada a na wula gaiki duk kai zaŋ war siiwiŋa.

¹⁰ Mu zilba kureɗ war siiwiŋa ɓa na ɓa Alaw a dara, a saŋa futi buri mu halaɗi aŋ tiliki.

¹¹ Mu firiya ɓa sai mu halaɗi mu tiliki, kapai mi siki like zi yum gaini like zi seze, kapai gaini hanɗa ki bindi gdaŋai a suwa pra.

¹² Nɵa, kapai mu coɗi li ahaki ɗa, tumu paŋ aga mu nuvumu arai zi pi pin yimi na wiiɗi marmu, ta burini yimi na wiiki lai, tiki burini na wiya lai.

¹³ Tawalakaya, mu firiya ɓa tiki aga ki hini malvanai kai. Mu kataɗi morkoi buri mu halaɗi arbaki azi viya, aŋ wa ali arbaki, maini na mu wiiɗi arbaɗi ɗai zamai ɗa nɵa lai. Amma haa girna mu niviti futi hanɗa kai.

¹⁴ Hanɗa a tumuŋ n'aŋ mada siɗi Grekkai, siɗi Barbarai lai, siɗi na yalakai, siɗi na yalakai kai ɗa lai.

¹⁵ Hanɗa a wala n'a na ya amlai wara, buri mu halaɗi mu ɓaka labar na pɗem siki tiki na war Rome ɗa lai.

Spakni labar na pɗem

¹⁶ Buri ɓa aga mu za siyer burini labar na pɗem kai, buri ɓa a spak na wiini Alaw, buri a kora asiya asiya paŋ n'a yima, burini ɗif na Yudiya avut, amma burini Grek ɗa lai.

¹⁷ Buri war hanɗa, jre-ɗikat na wiini Alaw a siŋka edi pin yimi, burini yimi lai, maini n'a ɗosi nɵa: ɗif n'a na jre-ɗikat pin yimi ɗa aga a sumna karni.

Tuwur na wiiɗi ɗai

¹⁸ Buri nɵa, hiy na wiini Alaw a siŋkasi edi war hlai n'amai par, burini meefeŋ gaini jre-ɗikat-kai na wiiɗi ɗai n'e pi jre azumai pin jre-ɗikat-kai ɗa.

¹⁹ Buri wala na ɗif a kiɗa a sɗaŋ burini Alaw a na edi arɗi gaglai, buri Alaw a siŋka hanɗa edi arɗi.

²⁰ Buri ɓa wala n'aŋ sini n'a sɗa edi kai, -spakni n'a vada kai, gaini wala n'a siŋkaŋ edi ɓa a Alaw ɗa a na edi gaglai war piɗi yai zi tiki avut par, won hlai na ɗif a talaŋ li sini wazagaini n'a zaŋ ɗa paŋ ɗa. Gai hanɗa nagai e siɗi aŋ kûti siɗi mini seŋ par kai.

²¹ Buri ɓa gaini siɗi n'e siɗi Alaw paŋ tekeɗeɗi, e sini kol maini Alaw nɵa kai, e sini tese kaalai, amma e wili edi war hiiniɗi zi digai, agulɗi na gaini yel kai a bunda gegeŋ lai.

²² E yiki siɗi ɓa e ɗi na yalakai, amma e bindi aŋ ɗai na duulakai.

²³ Abai na wiini Alaw na te vada edi kai ɗa, e bindi e kitititi gaini wazagai zi rgi n'a ziŋga ɗif mirɗek n'a kiɗa a vada edi, zaw wala zi ɗufli, zaw wazagai n'ezini puɗu puɗu, zaw wazagai zi hidili.

²⁴ Buri hanɗa Alaw a hiniɗi edi war hihir pin melew na wiini agulɗi, haa e zi wala zi siyer sini siɗi dama.

²⁵ Nagai n'e bindi jre na wiini Alaw edi aŋ eles, n'e hûrgû azumai wuzani wazagai zi rgi, e siiwi tini lai, e hini ni n'a rga wazagai paŋ na kol a wiini haa hlai n'a vada kai. Amen.

²⁶ Pin hanɗa, Alaw a hiniɗi edi war diri zi siyer. Buri nɵa falakaiɗi lai e bindi feŋ na gaiɗi maɵagai ɗa e firiyiŋ kai, e bindi e zi ɗa warɗi futi na zamai.

²⁷ Maɵagai nɵa lai, e hini feŋ na tiɓ na gaiɗi falakaiɗi edi, e rki piɗi marɗi, e fini gaiɗi marɗi arbaɗi marɗi, e zi wazagai zi siyer, nagai e nivi vrak na wiini wûliɗi n'edi midiɗi dama.

²⁸ Won hlai n'a tala arɗi pɗem buri e siɗi Alaw kai ɗa, Alaw a hiniɗi war hiiniɗi na meefeŋ, haa e zi wazagai n'a sɗa aŋ juva kai.

²⁹ E vi gaini pinzibani wazagai na maafanai paŋ: Gaini meefeŋ, gaini gorom, gaini zini meefeŋ, gaini suuna, gaini fiɗini humok, gaini sispai gaini yel na meefeŋ gaini hiini na meefeŋ, e tiki meefeŋ siɗi marɗi,

³⁰ e miɗi meefeŋ midiɗi marɗi, e bili gaw sin Alaw, tese warɗi kai, e kûli siɗi amai, e bindi yalakai war zini meefeŋ, e ɵini piɗi tamaiɗi kai,

³¹ yel midiɗi kai, e zi pini gadai kai, wala n'fiɗiɗi siɗi aŋ kai, hiinini haw warɗi kaalai.

³² Nagai e siɗiti sariya na jre na wiini Alaw na te muɗa ɓa: nagai n'e zi mai hanɗa ɵa ɗa, buriɗi a fiɗi n'edi amma e zi hanɗa lai. A ni ktai kai, miɗi ktai gaiɗi nagai n'e zi sɗa hanɗa lai.