Piɵi 35 - Ɗû na sɗik na wiini Alaw

Fuŋ n'abakai na wiiɗi Levitekai

¹ EPIƊ-ƊAI a miɗini wiini Musus war hlai na plas na Mowab ɵimani ra na Yurdan wuzaɗi Yeriko tar, a miɗini:

² ku miɗiɗi wiiɗi aliɗi Izrayel buri e si fuŋ n'abakai wiiɗi Levitekai war bulumɗi par kapai e simni woni. Ki siɗi basga na ɵimani fuŋ n'abakai hanɗa lai kapai faraiɗi a suma woni.

³ Levitekai ɗa e simni aha warni fuŋ n'abakai paŋ, basga na ɵimani a wiini farani faraiɗi, gaini wazagai zamai zamai gaini wazagai n'ezini puɗu puɗu n'aŋ tiɗi lai

^4-5 Basga n'edi par sini fuŋ n'abai ɗa, siɗi ɵagai par haa edi ta ɗa, mogoni a za metir miya ɵim. Haa fuŋ n'abai ɗa paŋ gaini gûni azumai gun, piɗi futi na dawai par sek ɵa, amai sek ɵa, piɗi futi na koskoi sek ɵa, azumai sek ɵa lai. Mogoni galni fuŋ n'abai ktai a za metir dubu ɗaw, fuŋ n'abai ɗa a hina amlai arba.

⁶ Fuŋ n'abakai n'aga ki siŋɗi wiiɗi Levitekai ɗa, ɵaara arbani par a fuŋ n'abakai zi ŋoyai na ɗif n'a ɵiɓa belek pini dirini kai ɗa a kiɗa a ŋoya woni. Ki siɗi fuŋ n'abakai zamai doogo doogo puɗu pi sulu lai.

⁷ Fuŋ n'abakai n'aga ki siŋɗi wiiɗi Levitekai paŋ ɗa a za doogo doogo puɗu pi mitwis gaini basga na ɵimani lai.

⁸ Pinziba paŋ ɗa a sa fuŋ n'abai siɗi Levitekai ɗa sini hlai n'a sini ta ɗa, ni na wiini abai ɗa a sa viya, ni na wiini agwi ɗa a sa agwi lai.

Fuŋ n'abakai zi ŋoyai

⁹ EPIƊ-ƊAI a miɗini wiini Musus:

¹⁰ Miɗiɗi wiiɗi aliɗi Izrayel, ku miɗiɗi ɓa: Won hlai na ki vigi ra Yurdan ɗa li aŋ niyi aha war Kanaan ɗa,

¹¹ ki viri fuŋ n'abakai na kapai ki ziŋ aŋ fuŋ n'abakai zi ŋoyai, kapai ɗif n'a fuɗa ɗif li pini dirini kai ɗa a kiɗa aŋ ŋoya woni.

¹² Fuŋ n'abakai ni ɗa aga a za aŋ hlai zi ŋoyai kapai ɗif n'a ɵiɓa belek li ɗa a kiɗa a lawa woni, kapai ni n'a vurga felni ɗif n'e fiɗiŋ ɗa a kiɗa a navaŋ kai, haa ɗai na doogo paŋ e zini sariya haw.

¹³ Fuŋ n'abakai n'aga ki siŋɗi wiiɗi Levitekai ɗa, ɵaara arbani a fuŋ n'abakai zi ŋoyai.

¹⁴ Ki si hu war anene duɓani ra Yurdan par, hu aha midini afti na Kanaan lai.

¹⁵ Ɗif paŋ, koo ɓa a ɗif na Izrayel, zaw ɗif zi jak, zaw morkoi na gaini ezini blaŋ n'a fuɗa ɗif li pini dirini kai ɗa a lawa a ŋoya war ktai arbani fuŋ n'abakai hanɗa.

¹⁶ Na ɓa ɗif ɗa a fuɗa maini gaini kawai, a ɗif zi ɵiɓi belek, e fiɗiŋ edi.

¹⁷ Na ɓa a fuɗaŋ gaini ahi-fuŋ n'a kiɗa a fuɗa ɗif, a ɗif zi ɵiɓi belek, e fiɗiŋ edi.

¹⁸ Na ɓa a fuɗaŋ gaini a maraŋa n'a kiɗa a fuɗa ɗif ɗa, a ɗif zi ɵiɓi belek, e fiɗiŋ edi.

¹⁹ Ɗif n'a vurga fel ɗa a fuɗa ɗif zi ɵiɓi belek ɗa edi a ni, hlai n'a navaŋ woni paŋ.

²⁰ Na ɓa ɗif a dara maini kai, a hogoŋ war hiini zi zini meefeŋ zaw a bulaŋ gaini wala n'a kiɗa zini meefeŋ ɗa na ɓa ɗif hanɗa a mra li ɗa,

²¹ zaw a ɵiɓaŋ gaini tini gaini hiini na meefeŋ ɗa, na ɓa ɗif hanɗa a mra li ɗa, ɗif n'a fuɗaŋ ɗa, a ɗif zi ɵiɓi belek, ɗif n'a vurga fel ɗa a navaŋ li ɗa a fuɗaŋ edi.

²² Na ɓa ɗif a hogo maini gaini hiini na meefeŋ kai, zaw na ɓa a bla wala miɗini gaini hiini na meefeŋ kai,

²³ zaw na ɓa war siɗi kai a bla ahi-fuŋ n'a kiɗa a fuɗaŋ miɗini, ɗif a mra li, na ɓa a ɗif na gaw arbaɗi kaalai, meefeŋ kaalai, a na paya aŋ zini meefeŋ kaalai ɗa,

²⁴ ɗai na doogo ɗa aga e ziti sariya arbani ɗif n'a fuɗa maini gaini ɗif n'a vurga fel ɗa pini gadai n'aŋ gaini ɗiyi zaw zaw ɗa.

²⁵ Ɗai na doogo ɗa e ɵi ɗif n'a fuɗa maini tini ɗif n'a vurga fel par su, e wiyiŋ aha war fuŋ n'abai zi ŋoyai n'a ŋoya warni ɗa, a hina woni ɵa haa sini mri na wiini pai zi ɓa ka n'abai n'a nava mini emel n'e tiki ɗai war sda gaini.

²⁶ Na ɓa ɗif n'a fuɗa maini ɗa a niyasi li edi war fuŋ n'abai zi ŋoyai ɗa par,

²⁷ na ɓa ɗif n'a vurga fel ɗa a navaŋ li edi war baŋa a na aha war fuŋ n'abai zi ŋoyai ɗa kai ɗa, a fuɗaŋ li ɗa, a pɵa miɗini aŋ belek.

²⁸ Buri ɓa kadai tiɓ ɗa, ɗif n'a ɵiɓa belek a sumna aha war fuŋ n'abai zi ŋoyai ɗa haa sini mri na wiini pai zi ɓaka n'abai ɗa, asakalni mrini par ɗa, ɗif hanɗa a kiɗa a wayasi aha midini aftini ɗa.

²⁹ Hanɗa a gadai zi ɗiyi n'aga ki zi pini haa kureɗ, tiki gaiɗi aliki haa sini pinzibaki na wuzaki sek, woɗi paŋ n'aga ki simni.

³⁰ Na ɓa belek a za li ɗa, e fiɗi ɗif zi ɵiɓi belek edi sai na ɓa zaidakai e ɗa viya haw, e kiɗi e fiɗiŋ edi pini zaida na wiini ɗif ktai kai.

³¹ Ɗif zi ɵiɓi belek na burini e fiɗi n'edi ɗa, e siki farai li aŋ bindiŋ ɗa ki yimiŋ kai.

³² Na ɓa ɗif zi ɵiɓi belek a siki farai na kapai ki hiniŋ a lawa aha war fuŋ n'abai zi ŋoyai ɗa, ki yimiŋ kai, na ɓa aha war fuŋ n'abai zi ŋoyai ɗa par, pai n'abai zi ɓaka ɗa a mra kai, a siki farai ɓa a wayasifu aha midini aftini ɗa, ki yimiŋ kaalai.

³³ Aga ki bindi afti na ki simni warni ɗa hihir kai, na ɓa ɗif a fuɗa maini li ɗa, afti a bunda hihir, afti hanɗa a bunda hilu ɗa gaini fiɗini ɗif n'a fuɗa maini ɗa.

³⁴ Afti na ki simni midini, na Ta aŋ warni lai ɗa, ki bindiŋ hihir kai. Buri EPIƊ-ƊAI mu ta, mu sumna arbaɗi aliɗi Izrayel.