Piɵi 29 - Ɗû na sɗik na wiini Alaw

Ɓaka na war yivai na wiini suura zi firyi

¹ War mefeŋ n'avut na wiini tile n'ag'aŋ muguzak, aga ki yiki diŋgi na sɗik. Ki zi sda zi kayai war mefeŋ hanɗa kai. Mefeŋ hanɗa, a mefeŋ na wiini suura zi firyi buriki.

² Mefeŋ ni ɗa, ki zi ɓaka zi yi wiini EPIƊ-ƊAI, gaini garakai sulu, adime ktai alini adumai na buza ɗaw ɗaw muguzak lai, na tirki sini kai.

³ Ɓaka na gaini alini-seyem na miɗini ɗa a na maini nɵa: Avdi n'e hiɗɗiŋ gaini emel na gai futini kilo ɵeeŋe miɗini gari paŋ, kilo ɵaara miɗini adime paŋ,

⁴ kilo hu miɗini ahini adime paŋ lai.

⁵ Ki zi ɓaka zi yi gaini yek ktai wiini EPIƊ-ƊAI burini hinini tuwur.

⁶ Ɓaka hanɗa a tika sini ɓaka zi yi na tile tile paŋ gaini ɓaka na gaini alini seyem na miɗini gaini ɓaka zi yi na mefeŋ mefeŋ paŋ gaini ɓaka na gaini alini seyem na miɗini gaini ɓaka zi vin na pini paŋ lai, n'a za pin gadai n'a ɗiyasi ɗa. Aŋ wala n'EPIƊ-ƊAI a firya lugosni gara, a ɓaka n'e yiŋ edi gaini afu burini EPIƊ-ƊAI.

Ɓaka na war mefeŋ na wiini hinini tuwur

⁷ War mefeŋ n'ag'aŋ doogo na wiini tile n'ag'aŋ muguzak, ki yiki diŋgi na sɗik, ki tiki sai, ki zi sda zi kayai war mefeŋ hanɗa kai.

⁸ Ki zi ɓaka zi yi wiini EPIƊ-ƊAI, gaini gari ktai, adime ktai, alini adumai na buza ɗaw ɗaw muguzak lai, paŋ tirki sini kai, aŋ wala n'EPIƊ-ƊAI a firya lugosni gara.

⁹ Ɓaka na gaini alini seyem na miɗini ɗa, aga a za maini nɵa: avdi n'e hiɗɗiŋ gaini emel na gai futini kilo ɵeeŋe, miɗini gari paŋ, kilo ɵaara miɗini adime paŋ,

¹⁰ kilo hu miɗini ahini adime paŋ lai.

¹¹ Ki zi ɓaka gaini yek ktai wiini EPIƊ-ƊAI buri hinini tuwur. A tika sini ɓaka n'e ziŋ buri hinini tuwur gaini ɓaka zi yi na mefeŋ mefeŋ paŋ, gaini ɓaka na gaini alini seyem gaini ɓaka zi vin na pini ɗa lai.

Ɓaka na miɗi fet na wiini gumu

¹² War mefeŋ n'ag'aŋ doogo pi ɵim na wiini tile n'ag'aŋ muguzak ɗa, ki yiki diŋgi na sɗik. Ki zi sda zi kayai war mefeŋ hanɗa kai. Ki ziti fet burini EPIƊ-ƊAI haa mefeŋ muguzak.

¹³ War mefeŋ n'avut ɗa, ki zi ɓaka wiini EPIƊ-ƊAI gaini garakai doogo pi hu, adumai na maɵagai sulu, alini adumai doogo pi puɗu, na buza ɗaw ɗaw, na tirki sini kai, aŋ ɓaka zi yi, aŋ ɓaka n'e yiŋ edi gaini afu burini EPIƊ-ƊAI, aŋ wala n'EPIƊ-ƊAI a firya lugosni gara.

¹⁴ Ɓaka na gaini alini seyem na miɗini ɗa, a na maini nɵa: Avdi n'e hiɗɗiŋ gaini emel na gai futini kilo ɵeeŋe miɗini gari paŋ, kilo ɵaara miɗini adime paŋ,

¹⁵ kilo hu miɗini ahini adime paŋ lai.

¹⁶ Ki zi ɓaka gaini yek ktai wiini EPIƊ-ƊAI buri hinini tuwur na wiiki. Ɓaka hanɗa a tika sini ɓaka zi yi na mefeŋ mefeŋ paŋ gaini ɓaka na gaini alini seyem na miɗini gaini ɓaka zi vin na pini ɗa lai.

^17-34 Sini mefeŋ n'ag'aŋ sulu par haa sin n'ag'aŋ muguzak ta ɗa, ki zi ɓaka zi yi na mefeŋ mefeŋ paŋ ɗa ta, asakal par ki zi ɓaka zamai gaini wazagai na tirki sini kai gaini ɓaka na gaini alini seyem, na miɗini gaini ɓaka zi vin na pini ɗa lai. A za ɗa maini nɵa: -Mefeŋ n'ag'aŋ sulu: garakai doogo pi sulu, adumai na maɵagai sulu, alini adumai na buza ɗaw ɗaw doogo pi puɗu, yek ktai lai. -Mefeŋ n'ag'aŋ hu: garakai doogo pi ktai, adumai na maɵagai sulu, alini adumai na buza ɗaw ɗaw doogo pi puɗu, yek ktai lai. -Mefeŋ n'ag'aŋ puɗu ɗa: garakai doogo, adumai na maɵagai sulu, alini adumai na buza ɗaw ɗaw doogo pi puɗu, yek ktai lai. -Mefeŋ n'ag'aŋ ɵim: garakai ɵeeŋe, adumai na maɵagai sulu, alini adumai na buza ɗaw ɗaw doogo pi puɗu, yek ktai lai. -Mefeŋ n'ag'aŋ ɵaara: garakai mitwis, adumai na maɵagai sulu, alini adumai na buza ɗaw ɗaw doogo pi puɗu, yek ktai lai. -Mefeŋ n'ag'aŋ muguzak: garakai muguzak, adumai na maɵagai sulu, alini adumai na buza ɗaw ɗaw doogo pi puɗu, yek ktai lai.

³⁵ War mefeŋ n'ag'aŋ mitwis ɗa, ki yiki diŋgi n'abai. Ki zi sda zi kayai war mefeŋ ni ɗa kaalai.

³⁶ War mefeŋ ni ɗa ki zi ɓaka zi yi wiini EPIƊ-ƊAI gaini gari ktai, adime ktai, alini adumai na buza ɗaw ɗaw muguzak, na tirki sini kai, aŋ ɓaka n'e yiŋ edi gaini afu burini EPIƊ-ƊAI aŋ wala n'EPIƊ-ƊAI a firya lugosni gara.

³⁷ Ɓaka paŋ ɗa a za gaini ɓaka na gaini alini seyem na miɗini gaini ɓaka zi vin na pini ɗa lai maini na gadaini a ɗiyaŋ ɗa nɵa.

³⁸ Ki zi ɓaka na gaini yek ktai burini hinini tuwur ɗa lai. Ɓaka hanɗa paŋ a tika ɗa sini ɓaka zi yi na mefeŋ mefeŋ paŋ, gaini ɓaka na gaini ali seyem na miɗini gaini ɓaka zi vin na pini ɗa lai.

³⁹ Hanɗa a ɓaka n'aga ki ziŋ wiini EPIƊ-ƊAI war mefeŋ zi fet na wiiki ɗa. A tika sini ɓaka na ki ziŋ tizaw pin ɵinini ha ɗa, zaw na ki ziŋ pin diriki, zaw sini ɓaka zi yi na wiiki, zaw ɓaka na gaini alini seyem na wiki zaw ɓaka zi vin na wiiki gaini ɓaka zi ɵeɗ na wiiki lai.