Piɵi 28 - Ɗû na sɗik na wiini Alaw

Gadai na burini zini ɓaka Ɓaka na war yivai

^1-2 EPIƊ-ƊAI a miɗini wiini Musus: Siɗi gadai hanɗa wiiɗi aliɗi Izrayel. Ku miɗiɗi ɓa e zi hangal gaini ɓakaŋa n'e siŋŋa ɗa. Won hlai n'e diri e siŋa simi na wiya, zaw e ziŋa ɓaka n'e yiŋ edi gaini afu, zaw e yi wala na lugosni a ɵiɗiti agula azumai, e ziŋ ɗa war sartini n'aŋ gai ɗiyi ta ta ɗa, pin gadaini lai.

³ Ɓaka n'e yiŋ edi gaini afu burini EPIƊ-ƊAI, aga a za ɗa mai hanɗa nɵa: Yivai paŋ, ki kiŋasi alini adumai na maɵagai sulu, na buza ɗaw ɗaw, na tirki sini kai, ki ziŋa ɓaka zi yi gaini. Ɓaka hanɗa, ki ziŋ yivai paŋ ɵa haa kûreɗ.

⁴ Ahini adime na ktai ɗa ku za ɓaka gaini gorof par, n'ag'aŋ sulu koskoi sek lai.

⁵ Ɓaka na gaini ali-seyem ɗa, ki kisi avudi kilo hu gaini gal n'e hiɗiŋ gaini emel na gaini futini litir ɗaw gaini gal.

⁶ Hanɗa a ɓaka zi yi n'a za mefeŋ mefeŋ paŋ, maini n'a zasi amai midiɗi huwuŋ Sinaï ɗa ɵa. A ɓaka na lugosni a sini firyi wiini EPIƊ-ƊAI gara, n'e yiŋ edi gaini afu burini EPIƊ-ƊAI lai.

⁷ Ahini adime paŋ ɗa e kisi vin pini litir ɗaw gaini gal, e miŋ azumai aŋ ɓaka war Hlai na Sɗik na wiini EPIƊ-ƊAI lai.

⁸ Ahini adime n'ag'aŋ sulu ɗa, ku za ɓaka gaini koskoi sek. Ku kasi ali seyem gaini vin na pini ɗa maini na gorof par nɵa lai. Hanɗa a ɓaka n'e yiŋ edi gaini afu burini EPIƊ-ƊAI na lugosni a sini firyi wiini EPIƊ-ƊAI gara.

Ɓaka na war yivai na wiini Sabbat

⁹ Yivai na wiini Sabbat ɗa, ki kiŋasi alini adumai sulu na buza ɗaw ɗaw, na tirki sini kai, aŋ ɓaka na gaini ali seyem ɗa, ki kisi avdi kilo ɵaara, n'e hiɗɗiŋ gaini emel na gai futini gaini ɓaka zi vin na pini ɗa lai.

¹⁰ Hanɗa a ɓaka zi yi na wiini yivai na wiini Sabbat ɗa. Sabbat paŋ a za mai hanɗa ɵa. A tika sini na war yivai ta lai, gaini ɓaka zi vin na pini ɗa lai.

Ɓaka na wiini merfeŋni tile

¹¹ War mefeŋ n'avut na wiini tile paŋ ɗa, ki zi ɓaka zi yi wiini EPIƊ-ƊAI gaini garakai sulu, adime ktai, alini adumai na buza ɗaw ɗaw muguzak lai. Wazagai hanɗa paŋ tirki sini kai,

¹² avdi n'e hiɗɗiŋ gaini emel na gai futini aŋ ɓaka na gaini alini-seyem kilo ɵeeŋe miɗini gari paŋ, kilo ɵaara miɗini adime paŋ,

¹³ kilo hu miɗini ahini-adime paŋ lai. Hanɗa a ɓaka zi yi, a wala n'EPIƊ-ƊAI a firya lugosni gara, a ɓaka n'e yiŋ edi gaini afu burini EPIƊ-ƊAI lai.

¹⁴ Ki si vin pini aŋ ɓaka lai. Gari paŋ ɗa, ki si litir hu, adime paŋ ɗa ki si litir sulu, ahini adime paŋ ɗa litir ɗaw gai gal lai, hanɗa a ɓaka zi yi n'a sa war tile ɗa. A za tile tile paŋ haa buza te vada ɵa.

¹⁵ Ki zi ɓaka zi yi gaini yek ktai wiini EPIƊ-ƊAI, buri hinini tuwur, a tika sin ɓaka na mefeŋ mefeŋ paŋ gaini ɓaka zi vin na pin ɗa lai.

Ɓaka na miɗi fet na wiiɗi Paska

¹⁶ War mefeŋ n'ag'aŋ doogo pi puɗu na wiini tile n'avut ɗa, te fet na wiiɗi Paska.

¹⁷ War mefeŋ n'ag'aŋ doogo pi ɵim ɗa te fet na te za kasku ɗa. War mefeŋ na muguzak hanɗa, ɗif a luma peŋ na gaini is arni ɗa kai.

¹⁸ War mefeŋ n'avut ɗa, aga ki zi diŋgi na sɗik, ki zi sda zi kayai warni kai.

¹⁹ Aga ki zi ɓaka zi yi wiini EPIƊ-ƊAI gaini garakai sulu, adime ktai, alini-adumai na buza ɗaw ɗaw muguzak lai. Wazagai hanɗa paŋ a wazagai zi ɓaka na tirki sini kai.

²⁰ Ɓaka na gaini ali-seyem na midini ɗa, a na maini nɵa: Avudi n'e hiɗiŋ gaini emel na gai futini kilo ɵeeŋe midini gari paŋ, kilo ɵaara midini adime paŋ,

²¹ kilo hu midini ahini adime paŋ lai.

²² Ki zi ɓaka zi yi gaini yek ktai wiini EPIƊ-ƊAI buri hinini tuwur na wiiki.

²³ Ɓaka hanɗa paŋ ɗa, a tika sini ɓaka zi yi n'e ziŋ gorof par gorof par mefeŋ paŋ ɗa.

²⁴ Aga ki ziŋ mai hanɗa ɵa mefeŋ mefeŋ paŋ, haa mefeŋ muguzak aŋ ɓaka n'e yiŋ edi gaini afu, aŋ wala n'EPIƊ-ƊAI a firya lugosni gara. A tika sini ɓaka na mefeŋ mefeŋ paŋ, gaini ɓaka zi vin na pin ɗa lai.

²⁵ Mefeŋ n'ag'aŋ muguzak ɗa, diŋgi na sɗik a za pra, ki zi sda zi gir warni kai.

Ɓaka na war mefeŋ zi hiɗi

²⁶ mefeŋ na wiini hiɗini seyem n'avut, won hlai n'aga ki zi ɓaka wiini EPIƊ-ƊAI gaini seyem na hehe, war fet na wiini hiɗi na wiiki ɗa, aga ki zi diŋgi na sɗik. Aga ki zi sda ktai zi gir war mefeŋ hanɗa kai.

²⁷ Aga ki ziŋa ɓaka zi yi gaini garakai sulu, adime ktai, alini adumai na buza ɗaw ɗaw muguzak lai, aŋ ɓaka n'e yiŋ edi gaini afu, na lugosni a sini firyi wiini EPIƊ-ƊAI gara.

²⁸ Ɓaka na gaini alini-seyem na miɗini ɗa aga a za maini nɵa: avdi n'e hiɗɗiŋ gaini emel na gai futini kilo ɵeeŋe miɗini gari paŋ, kilo ɵaara miɗini adime paŋ,

²⁹ kilo hu miɗini ahini adime paŋ lai.

³⁰ Ki zi ɓaka gani yek ktai wiini EPIƊ-ƊAI burini hinini tuwur na wiiki lai.

³¹ Ɓaka hanɗa a tika sini ɓaka zi yi n'e ziŋ mefeŋ mefeŋ paŋ gaini ɓaka na gaini ali-seyem na miɗini lai. Ki zi ɓaka ɗa gaini wazagai na tirki sini kai gaini ɓaka zi vin na pini ɗa lai;