Piɵi 25 - Ɗû na sɗik na wiini Alaw

Aliɗi Izrayel e yimi alawai na zamai

¹ Aliɗi Izrayel e simni a Sittim, woni e tiki piɗi aŋ zi maɵara gaiɗi falakai na Mowab.

² E yikiɗisi aliɗi Izrayel mini ɓaka n'e ziŋ wiini alawai na wiiɗi. Aliɗi Izrayel e simi, e hûrgû azumai wuzani alawai na wiiɗi lai.

³ Aliɗi Izrayel e tiki futi pini alaw Baal na Peyor, nɵa EPIƊ-ƊAI a za hiy siɗi.

⁴ EPIƊ-ƊAI a miɗini wiini Musus: Yimiɗi abakaiɗi ɗai na Izrayel ɗa paŋ, ku higiɗi amai sini luwuŋ, arɗi piɗi futi sek sek, wuzani EPIƊ-ƊAI, kapai hiy n'abai na wiini EPIƊ-ƊAI a ɵaɗa azumai.

⁵ Musus a miɗiɗi wiiɗi n'abakai na wuzaɗi: Ɗif paŋ ɗa a fiɗiɗi ɗai n'e ɗa pini n'e hûrgû azumai wuzani Baal Peyor ɗa.

⁶ Won hlai na ɗai e ɗa tûwi mini gumu n'e nivi gaini EPIƊ-ƊAI woni ɗa, ɗif na Izrayel a cosi gaiɗi muni na Madiyan pini kaai, a siŋkitiɗi wiiɗi tawalakaini wuzani arni Musus.

⁷ Pai zi ɓaka Pinhas n'ahini Eliyazar na tiyni Aaron na pai zi ɓaka, won hlai n'a tala hanɗa, a faka arbaɗi ɗai par a tikiti kawai tini,

⁸ a tika futi pini ɗif na Izrayel ɗa amlai warni gumuni, a ɓulaŋ, a ɓiliti muni ɗa lai. A ɓiliti azumai pini digirɗi lai, a fiɗiɗi gaini suliɗi. Nɵa gir n'a na ka midiɗi aliɗi Izrayel a ɗiya ta,

⁹ amma a ba ɗai dubu caaɓa gaini miya puɗu.

^10-11 EPIƊ-ƊAI a miɗini wiini Musus: Pai zi ɓaka Pinhas n'ahini Eleyazar, na tiyni Aaron ɗa a ɵaɗa suwarŋa na siɗi aliɗi Izrayel ɗa azumai ɵeɗ. A za sda arbaɗi gaini sile na wiya ta mal. Mu firiya ɓa e yimi pini Alaw zamai kir kai, sai pa ta. Tiyana ɗa, pini sdani Pinhas ɗa, aga mu vidiɗi aliɗi Izrayel edi war hiyŋa kir kai.

¹² Buri nɵa, ku miɗiɗi ɓa: Mu dara mu za bonu zi ɵeɗ gaiɗi.

¹³ A bonu n'aga a hina buri ni, burini pinzibani n'asakal sek ɗa lai aŋ bonu zi pai zi ɓaka n'a vada edi kai, ɵa haa kureɗ, buri ɓa a siŋka sileni edi buriya ta Alaw na wiini, buri a haza tuwur na midiɗi aliɗi Izrayel edi haz lai.

¹⁴ Yikini ɗif na Izrayel n-e fiɗiŋ edi gaiɗi muni na Madiyan ɗa, a na ɓa: Zimri. A ahini Salu, a abaiɗi ɗai na war pinzibani Simeyon.

¹⁵ Muni n'e fiɗiti ɗa, yikiɗi ɓa: Kozbi, t'ahini Sur, a abai na wiini pinziba ktai na war Madiyan lai.

^16-17 EPIƊ-ƊAI a miɗini wiini Musus: Yimiɗi ɗai na Madiyan ɗa aŋ gawki, fiɗiɗi edi, vidiɗi edi.

¹⁸ Buri ɓa, sdaɗi n'e ziŋ a Peyor ɗa, gaini sdaɗi Kozbi na tawalɗi lai ɗa, nagai e piyi yel n'e niviki warni. Kozbi na t'ahini abai ktai na Madiyan. Te nava fiɗi n'edi war mefeŋ na gir a halasi pin wala n'a za a Peyor ɗa.

Musus a piɵiɗi aliɗi Izrayel azi n'ag'aŋ sulu

¹⁹ Asakalni gir hanɗa.