Piɵi 22 - Ɗû na sɗik na wiini Alaw

Aliɗi Izrayel edi war hlai na plas na Mowab 22—36 Balak pai na Mowab a yikasi Balaam

¹ Aliɗi Izrayel e fiki e hili wuzaɗi. E pi war hlai na plas na Mowab, anene duɓani ra Yurdan par, wuzaɗi Yeriko tar.

^2-4 War sarti ni ɗa, Balak n'ahini Sippor pai na Mowab, a ɵina labarni wala n'aliɗi Izrayel e ziŋ siɗi Amoritekai. Pai gaiɗi ɗai na pini won hlai n'e tili vokɗi Izrayel n'e hilisi viya ɗa, hunai a yimiɗi, e tiki piɗi e ziriyi. Nɵa ɗai na Mowab e miɗiɗi wiiɗi abakai n'arbaɗi ɗai na Madiyan maini nɵa: Vokɗi ɗai hanɗa aga a vada wala zi simi n'aŋ sumu na ɗa kafa, maini ɵaakai n'a vuga li ɗaw ɗa kuzum a hina pini kai ɗa nɵa.

⁵ Balak a ɵina ɗai sini Balaam n'ahini Beyor n'a na war Petor wulani ra Öfrata, midini afti na wiiɗi Ammavitekai, a miɗini maini nɵa: Ɗai zamai e hilisi aha war Egipte par, e ɗi ahayi na, e tiki hlaiyi ɗaw, e ɗi na ca.

⁶ Tiyana ɗa, za barka halasi tûûsiɗiŋa ɗai hanɗa buri gdaŋɗi ɗa a sûwiyi suwai. A blaŋtaŋkai na mi kiɗi mi rɗi amai midiɗi, mi birgiɗi edi ɗi ɗa. Buri mu sɗa ɓa: Ɗif na ku ɓakaŋ li ɗa, a nava ɓiki, na ku tuusaŋ li ɗa, tuusa a yimaŋ lai.

⁷ Abakai n'arbaɗi ɗai na Mowab gaiɗi abakai n'arbaɗi ɗai na Madiyan e hili piɗi marɗi, e piyi like tiɗi wiini ɗif zi tili wazagai na wuze ɗa. E cû sini Balaam, e miɗini seŋ na Balak a miɗiŋɗisi ɗa.

⁸ Balaam a wiyiɗi seŋ: Fini won na, dawai aga mu wiyiki seŋ pini wala n'EPIƊ-ƊAI aga a muɗaŋa ɗa. Abakaiɗi ɗa na Mowab par e fini ahani Balaam.

⁹ Alaw a halasi sini Balaam, a zilbaŋ a muɗa:

¹⁰ Balaam a wiyini seŋ wiini Alaw a muɗa: Balak n'ahini Sippor, pai na Mowab ɗa a ɵiniɗisi sa aŋ miɗiŋa ɓa:

¹¹ Ɗai n'e hilisi warɗi Egipte par e tiki afti na wiyi ɗaw, tiyana ɗa, za barka, halasi ku tûûsiɗiŋa, ablaŋtaŋkai na mu kiɗa mu hitimiɗi, mu birgiɗi kai ɗi?

¹² Alaw a miɗini wiini Balaam: Aga ku hala gaiɗi kai, ku tûûsiɗi ɗai hanɗa kaalai, buri ɓa e ɗi ɗai na ɓiki aŋ midiɗi.

¹³ Balaam a faka amai gorof, a miɗiɗi wiiɗi abakaiɗi ɗai na Balak a ɵiniɗisi ɗa: Wiyi wiki aha midini aftiki, EPIƊ-ƊAI a firiya ɓa mu hala gaiki kai.

¹⁴ Abakai na wiiɗi ɗai na Mowab e wiyisi sini Balak e miɗini: Balaam a firiya a hala gaiyi kai.

¹⁵ Balak a ɵina abakaiɗi ɗai zamai pra, viya a sûwiɗi n'avut ɗa, e sûwiɗi gaini hormo lai.

¹⁶ E hili sini Balaam e miɗini: Balak n'ahini Sippor ɓa: Ku za barka, halasi sa, a juva ɓa wala ktai a ɗuulukusi kai.

¹⁷ Aga mu zuku aŋ ɗif n'abai, wala paŋ na ku zilbaŋ li ta ɗa aga mu suŋku. Za barka halasi, ku tûûsiɗiŋa ɗai hanɗa.

¹⁸ Balaam a wiyiɗi seŋ wiiɗi ɗai na wiini balak: Koo ɓa, a saŋa arzaŋ gaini or n'ahani paŋ tekeɗeɗi, mu kiɗa aŋ ha amai midini gadai na wiini EPIƊ-ƊAI Alaw na wiya kai.

¹⁹ Tiyana ɗa, tiki lai fini won na, kapai mu sɗa wala n'EPIƊ-ƊAI aga a muɗaŋa zamai ɗa.

²⁰ Duvuk ɗa, Alaw a halasi sini Balaam a miɗini: Na ɓa ɗai hanɗa e hilisi ya aŋ yikuku ɗa, ku hala gaiɗi, amma aga ku za ɗa a wala na mu muɗuku gaini ɗa.

Ablehoi na wiini Balaam

²¹ Dawaini gorof, Balaam a faka amai, a ziziniti ablehoini, a hala piɗi abakaiɗi ɗai na Mowab par ɗa.

²² Won hlai n'Alaw a tala Balaam a na hala ɗa, a za hiy ta. Balaam a hala na ɗa midiɗi ablehoini dam, ɗaini zi sda pini sulu lai. Ɵeŋ na wiini EPIƊ-ƊAI a hala a ɗiya warɗi futi arba zaw.

²³ Ablehoi te tala ɵeŋ na wiini EPIƊ-ƊAI warɗi futi gaini ɗiyi zaw, kaɵkarni gaini sûti edi sot lai, ablehoi te hiniti futi ɗa mak, te vuga edi. Balaam a faka a ɵiɓiti kapai te wayasi warɗi futi.

²⁴ Ɵeŋ na wiini EPIƊ-ƊAI a hala a ɗiya warɗi futi na lölö arbani zardeŋ zi vin ɗa zaw, ɵaga na par su lai, na par su lai.

²⁵ Won hlai na ablehoi te tala ɵeŋ na wiini EPIƊ-ƊAI ɗa te ɵapa amai sini ɵaga ktai ɵap, ezini Balaam te baza amai sini hlai baz, te yaɓaŋ tiɓ; A faka aŋ ɵiɓiti pra.

²⁶ Ɵeŋ na wiini EPIƊ-ƊAI A jogo edi wuzaɗi, a ɗiya warni hlai na gaini hiɵi haɵ, ɗif a kiɗa a vuga na zaw kaalai, na zaw kaalai.

²⁷ Won hlai na ablehoi te tala ɵeŋ na wiini EPIƊ-ƊAI ɗa e hurga azumai gaini Balaam, Balaam a sawa kaŋ, a ɵiɓiti gaini amaraŋa.

²⁸ Nɵa EPIƊ-ƊAI a miliɗi miɗi ablehoi ɗa amai, te miɗini wiini Balaam: Na mu zuku ɗa a maɗa, na kapai ku ɵiɓaŋa ɵa haa azi hu paŋ ɗa?

²⁹ Balaam a wiyiɗi seŋ: Ku ɵaɗa warku li gaya girna, kaɵkar a na fu ta maa mu fuɗuku gaini fiɗi.

³⁰ Ablehoi te miɗini: Ta mu ablehoiku kai ɗi, haa aɗipar na ɗa, ku hala na ɗa gaya ɵa kai ɗi? Mu na zuku wala na maini hanɗa ɵa ɗi? Balaam a wiyiɗi seŋ: Zaw kai.

³¹ Nɵa EPIƊ-ƊAI a milini arni Balaam edi, a tala ɵeŋ na wiini EPIƊ-ƊAI gaini ɗiyi warɗi futi zaw, kaɵkar gaini sûti edi tini kaai. A goɓo azumai, a pa arni azumai midini afti tiɓ.

³² Ɵeŋ na wiini EPIƊ-ƊAI a miɗini: Ku ɵiɓiti ablehoi ɗa haa azi hu paŋ buri ma ɗa? Mu halasi aŋ cikiti morkoiku ɗa, buri ɓa te tala aŋ morkoi na pɗemi kai

³³ Ablehoi te talaŋa ba, azi hu paŋ te kiɗasi amai sa kai, te kiɗasi a kiɗi amai sa ɗa, mu fuɗuku fu na ɗa ku tuku mal, na mu hiniti fu karɗi.

³⁴ Balaam a miɗini wiini ɵeŋ na wiini EPIƊ-ƊAI ɓa: Mu za tuwur, mu sɗa ɓa ku na wuza zaw kai. Na ɓa tiyana morkoiŋa hanɗa te suku firiyi kai ɗa, mu waya wiya aha.

³⁵ Ɵeŋ na wiini EPIƊ-ƊAI a wayini seŋ: Hala wiiku gaiɗi ɗai ɗa, amma ku co li ɗa, ku muɗa a seŋ n'aga mu muɗuŋku ɗa. Balaam a hala gaiɗi abakaiɗi ɗai na wiini Balak.

Balaam gaini Balak e nivi gaiɗi marɗi

³⁶ Won hlai na Balak a ɵina ɓa Balaam aŋsi warɗi futi ɗa, a hala mini haa war fuŋ n'abai na war Mowab n'a na ɵimani hagani afti, wulai ra Arnon.

³⁷ Balak a miɗini: Mu ɵinaɗi puku ɓa ku halasi, ku halasi kai ɗa, buri maɗa? Ku hiina ɓa aga mu nufuku kai zaw?

³⁸ Balaam a miɗini wiini Balak, tiyana mu halasi ya, amma mu kiɗa mu muɗuku wala gaini mada dama kai, mu muɗuku fu na ɗa a seŋ n'EPIƊ-ƊAI a saŋa war ma aŋ muɗuŋku kai ɗi?

³⁹ Balaam a hala gaini Balak a Kiryat-Husot.

⁴⁰ Balak a fuɗa ɵaakai gaini haakai gaini adumai lai aŋ ɓaka. A sini wiini Balaam gaiɗi abakaiɗi ɗai n'e ɗa gaini lai.

⁴¹ Gorof par Balak a yima Balaam pini, a kaŋ war fuŋ n'abai na Bamot-Baal, woni par Balaam a tala ɗai zamai piɗi ɗai na Izrayel ɗa.