Piɵi 18 - Ɗû na sɗik na wiini Alaw

Sdaɗi paakai zi ɓaka gaiɗi Levitekai

¹ Nɵa EPIƊ-ƊAI a miɗini wiini Aaron: Tiyana par ɗa, tuku lai, aliku lai, zagalakaiku na war pinzibani Levi ɗa lai, wala na meefeŋ n'a za li war hlai na sɗik ɗa, a zilba war tiki. Amma wala n'a za li meefeŋ war sdaki zi paakai zi ɓaka ɗa, a zilba war tuku tuku gaiɗi aliku.

² Zagalakaiku na war pinzibani Levi, ziiba na wiini apuku ɗa, aga e hilisi gaiku lai, kapai e tipi gaiku, e zini puku lai. Amma tuku gaiɗi aliku, ki ɗiyi ɗa wuzani gumu n'ali-fuŋ na babɗamai na wiini bonu a na amlai warni ɗa.

³ Aga e zi sda na wiiku gaini sda n'amlai warni gumu lai. Amma aga e ɗiyi sini wazagai na sɗik n'e zi sda gaini amlai war hlai na sɗik kai, e ɗiyi sini gûwiŋ zi ɓaka gobi kaalai, kapai ki ki ɗif min mri kai, tiki kaalai, nagai kaalai.

⁴ Aga e tipi gaiku, e zini puku war sda, n'a za amlai war gumu n'e nivi gaini EPIƊ-ƊAI warni paŋ, ɗif zamai nɵa a gunasi siki kai.

⁵ Sda n'amlai war hlai na sdik gaini na miɗini gûwiŋ zi ɓaka ɗa, ki ziŋ ki ɗi tiki. Kapai hiy na wiini EPIƊ-ƊAI a kɵasi midiɗi aliɗi Izrayel kir kai.

⁶ Tili, ta mu viriɗi zagalakaiki na Levitekai arbaɗi aliɗi Izrayel par, nagai e ɗi wiya, amma mu siɗiki aŋ zi sda n'amlai war gumu n'e nivi gaini EPIƊ-ƊAI warni.

⁷ Amma tuku Aaron gaiɗi aliku ɗa, aga ki zi sda zi paakai zi ɓaka na miɗini gûwiŋ zi ɓaka n'amlai war hlai na sɗik gara, n'amlai par duɓani rido ɗa, hanɗa a sda na wiiki. Sda zi pai zi ɓaka ɗa a like na mu saŋ siki, ɗif zamai na za hanɗa li ɗa a nava fiɗi n'edi.

Bri n'a sa siɗi paakai zi ɓaka

⁸ EPIƊ-ƊAI a miɗini wiini Aaron: Ɵina pɗem, gal n'a tika edi aŋ wiya war ɓaka paŋ n'aliɗi Izrayel e siŋɗa, mu suŋku aŋ wiiku, a wiiku gaiɗi aliku ɵa haa kureɗ, a gadai n'a sɗa aŋ bunda kai.

⁹ Arbani wazagai na sɗik gara n'a sa aŋ wiya ta kiiya, na afu aga a yaŋ edi kai, n'aga a hina aŋ wiiku ɗa a hanɗa: Ɓaka zi avudi paŋ, ɓaka na burini hinini tuwur paŋ, na burini zizinini seŋ ɗa paŋ, n'aliɗi Izrayel aga e kiŋsi ɗa lai. Ɓaka n'a sa aŋ wiya kiiya hanɗa, a wiiku gaiɗi aliku gaiɗi tiyakaiku lai.

¹⁰ Tiki aga ki simiŋ maini wala na sɗik ɵa, ahi na wus paŋ a kiɗa a suma ɓaka hanɗa, a wala na sɗik gara buriki.

¹¹ N'aga a sa suku zamai ɗa a hanɗa: Gal n'a tika edi aŋ wiya war like n'aliɗi Izrayel e siŋ ɗa par gaini n'a sa pini de na wiini si ɗa lai mu suŋku wiiku gaiɗi aliku na maɵagai gaiɗi na falakai lai haa kureɗ, hanɗa a gadai n'a sɗa aŋ bunda kai. Ɗai n'ahaku paŋ n'e ɗa hilu e kiɗi e simi simi hanɗa.

¹² Merfeŋni seyem n'e siŋ li wiini EPIƊ-ƊAI paŋ aga mu suŋku, emel na gaini futini, vin na gaini futini gaini algama na gaini futini lai, aga mu siŋki.

¹³ Ali seyem n'afti a waŋ avut paŋ n'aga e kiŋsi wiini EPIƊ-ƊAI paŋ ɗa, a wiiku. Ɗif n'ahaku paŋ n'a na hilu ɗa a sumaŋ.

¹⁴ Wala paŋ n'a tuusa li war Izrayel ɗa a wiiku.

¹⁵ Wala n'a wa piɗi emini avut paŋ, koo ɓa a na wiini ɗif, koo ɓa a na wiini wala n'e zini puɗu n'e kiŋsi li wii EPIƊ-ƊAI paŋ ɗa a wiiku. Amma ahi n'a wa avut na wiini ɗif gaini na wiini wala n'ezini puɗu na hihir ɗa, aga e bindiŋ.

¹⁶ Ahi na wus n'a za li tile ɗaw ɗa, e bindiŋ, ki si farai na wiini bindi ɗa. Sulai zi arzaŋ ɵim, na kiloni gram doogo doogo, a sulai n'ezi sda gaini ɗa amlai war hlai na sɗik.

¹⁷ Amma ahi ɵe n'a wa avut gaini ahini adime gaini ahi hek n'a wa avut ɗa, a wiini EPIƊ-ƊAI, ki bindiŋ kai. Felni ɗa ki yiimiŋ amai sini gûwiŋ zi ɓaka ɗa, hlai zi emel n'aŋ sini ta ta ɗa, ki yiŋ aŋ ɓaka n'e yiŋ edi gaini afu wiini EPIƊ-ƊAI, na lugosni a ɵiɗitiŋa agula azumai.

¹⁸ Neŋni ɗa a wiiku, didikni n'e zi de na wiini si gaini lai, ɓulni na wus ɗa lai a wiiku.

¹⁹ Gal n'a tika edi aŋ wiya war ɓaka n'aliɗi Izrayel e siŋ sa war ɓaka na sɗik paŋ par ɗa, mu suŋku wiiku tuku gaiɗi aliku na maɵagai gaiɗi na falakai lai haa kureɗ. Hanɗa a gadai n'a bunda kai, hanɗa a bonu n'a vada edi kai n'a hina ɵa gamai buriku tuku gaiɗi aliku, gaiɗi tiyakaiku lai.

²⁰ EPIƊ-ƊAI a miɗini wiini Aaron: Aga ku nava bulum midini afti ɗa kai, bri na wiiku aga a za arbaɗi kaalai, bri na wiiku ɗa mu ta, bulum na wiiku arbaɗi aliɗi Izrayel ɗa mu ta lai.

Bri n'a sa siɗi Levitekai

²¹ Wiiɗi pinzibani Levi ɗa, mu siɗi doogoni wazagai n'aliɗi Izrayel e siŋ paŋ ɗa, mu siŋɗi aŋ vrak burini sdaɗi n'e ziŋ ɗa, sda na e ziŋ amlai war gumu n'e nivi gaini EPIƊ-ƊAI woni ɗa.

²² Amma aliɗi Izrayel na zamai ɗa e gûnisi sini gumu na e nivi gaini EPIƊ-ƊAI woni kai, kapai e ki siɗi war tuwur aŋ fiɗi siɗi edi kai.

²³ E zi sda n'amlai war gumu na e nivi gaini EPIƊ-ƊAI warni ɗa e ɗi Levitekai. Meefeŋ n'e ziŋ li war hlai ni ɗa a pɵa midiɗi, a gadai n'a sɗa aŋ bunda kai, a na ɵa haa kureɗ, haa sini pinzibaki na wuzaki sek, nagai aga e nivi bulum arbaɗi aliɗi Izrayel na zamai kai.

²⁴ Amma mu siɗi ɗa a doogoni wazagai n'aliɗi Izrayel e siŋ sa ɗa, mu muɗa buriɗi ɓa aga e nivi bulum arbaɗi aliɗi Izrayel kai na ɗa burini hanɗa.

^25-26 EPIƊ-ƊAI a miɗini wiini Musus: Ku miɗiɗi wiiɗi Levitekai ɓa: Won hlai n'aliɗi Izrayel e kikiɗi doogoni wazagaiɗi li aŋ bulum na wiiki ɗa, ki mili doogoni wazagai ɗa, ki siŋ sini EPIƊ-ƊAI.

²⁷ Aga a pɵa buriki aŋ doogoni wala kal kal maini ɗif n'a kasi doogoni algama na war lulufni par, zaw doogoni viŋni na war hlai n'e ziŋsi warni par ɵa lai.

²⁸ Tiki aga ki si sini EPIƊ-ƊAI war doogoni wazagai n'aliɗi Izrayel e siŋ siki paŋ par ɗa maini hanɗa ɵa. Gal na ki tikiŋ edi aŋ wiya war hanɗa par ɗa, ki siŋni wiini pai zi ɓaka Aaron.

²⁹ War wazagai n'aga a sa siki aŋ like paŋ par ɗa, ki yimi gal na wiya ɗa edi, war like na pɗamai par ɗa, ki yimi gal na wiya ɗa edi lai

³⁰ Ku miɗiɗi ɓa: Won hlai na e yimi li gal na pɗem edi burini EPIƊ-ƊAI kaai ɗa, doogoni wazagai hanɗa a pɵa buriɗi Levitekai, maini ɗif n'a sasi doogoni algamani war lulufni par, zaw n'a sasi doogoni viŋni na war hlai n'e ziŋsi woni par nɵa.

³¹ Na a hina tiki ɗa, ki simiŋ gaiɗi ɗai n'ahaki ɗa woɗi paŋ, hanɗa a vrak na wiiki na burini sda na ki ziŋ amlai war gumu na e nivi gaini EPIƊ-ƊAI woni ɗa.

³² Nɵa aga ki kisi tuwur ktai midiki kai, na ɓa ki yimi gal na pɗem na burini EPIƊ-ƊAI li edi kaai ɗa, aga ki kisi miisi sini ɓaka na sɗik na wiiɗi Izrayel ɗa kai, aga ki mri kaalai.