Piɵi 12 - Ɗû na sɗik na wiini Alaw

Aaron gaiɗi Miriyam e miɗi meefeŋ sini Musus

¹ Musus a tikiti muni na Kusite na war pinzibani Kusan, nɵa Aaron gaiɗi Miriyam e miɗi meefeŋ sini burini tiki hanɗa.

² E miɗi: EPIƊ-ƊAI ɗa a muɗa gaini Musus kiini ɵa ktai ɗi, a muɗa gaiyi tiyi lai kai ɗi; EPIƊ-ƊAI a ɵina seŋ hanɗa.

³ Musus ɗa a ɗif na kûlûni-si warni kai, ɗif na maini ɵa midiɗi yai kai.

⁴ Tizaw EPIƊ-ƊAI a miɗini wiini Musus gaini Aaron gaiɗi Miriyam lai, tiki hu paŋ hilisi amlai war gumu n'e nivi gaini EPIƊ-ƊAI warni ɗa. E hili woni gaini hogoiɗi.

⁵ EPIƊ-ƊAI a niyasi azumai arbani ɗugul, a ɗiya mini gumu n'e nivi gaini EPIƊ-ƊAI warni ɗa, a yika Aaron gaiɗi Miriyam, e hilisi wuzani gaini sulogoiɗi.

⁶ A miɗiɗi: Ɵini seŋ na mu dara mu miɗiŋki pɗem, na ɓa ɗif na mini Alaw a na arbaki ɗa, mu siŋka sa arni ɗa war wala zi siŋki, mu muɗa gaini ɗa war weseŋ zi pɵi lai.

⁷ Amma gaini Musus ɵeŋ na wiya ɗa a za ɵa kai, ni a manaŋa, a ɗif n'a tika hangalni siɗi ɗaiŋa na Izrayel.

⁸ Mu miɗi miɗi maryi tar tar, war miɗi na gaglai, a talaŋa gaini arni lai. Tiki ɗa wala n'a kiki haa ki miɗi seŋ na meefeŋ sini Musus na ɵeŋŋa ɗa a maɗa?

⁹ EPIƊ-ƊAI a za hiy siɗi abai gara, a hala wiini.

¹⁰ Won hlai na ɗugul ɗa a yima sini edi miɗini gumu par, dugum a yimiti Miriyam ɗa, siɗi a puhura, a bla ɓlok ɓlok. Hlai n'Aaron a tiliti ɗa, a tala ɗa dugum aŋ siɗi.

¹¹ Nɵa Aaron a miɗini wiini Musus: za barka epin-geza, mu siiwuku, meefeŋ na mi ziŋ pini dûûli na wiyi ɗa ku pɵa hanɗa midiyi kai!

¹² Mu siiwuku ku hiniti Miriyam te bunda maini ahi n'e wiiŋsi gaini mri su, sini gaini ɵûɗi edi ɵoɗ ɵoɗ ɗa nɵa kai.

¹³ Musus a tuwa sini EPIƊ-ƊAI a muɗa: Alaw, ku zûûliti zuwal kai ɗi.

¹⁴ EPIƊ-ƊAI a wiyini seŋ wiini Musus: na ɓa a pirfiɗi fu teenek arɗi na ɗa a epiɗi aŋ tûûsiti ɗa, aga te sumna war siyer haa kosko ɗaw kai ɗi? Nɵa ɗa, birgiti edi war kaŋ par buri kosko ɗaw, kapai asakal par te kiɗa te wayasi aha arbaki.

¹⁵ E birgiti edi war kaŋ par burini kosko ɗaw, aliɗi Izrayel e hili wuzaɗi kai haa te wayasi arbaɗi.

¹⁶ Asakal hanɗa par e fikiɗi a Haserot par e hili e pi war basga na kaɗataŋ na Paraŋ.