Piɵi 11 - Ɗû na sɗik na wiini Alaw

Aliɗi Izrayel war Tabera

¹ Mefeŋ ktai ɗa aliɗi Izrayel e ɵi marava, e miɗi seŋ na meefeŋ sini EPIƊ-ƊAI, won hlai n'EPIƊ-ƊAI a ɵina hanɗa a za hiy ta, a hinasi afu midiɗi a ya mini kaŋ n'edi par edi.

² Ɗai e tûwi sini Musus, Musus a siiwa EPIƊ-ƊAI buriɗi, afu a mra su.

³ E sini yiki wiini hlai ni ɓa: Tabera, a dara a muɗa: afu n'a ɵa pini hlai, buri ɓa afu na wiini EPIƊ-ƊAI a tika pini kaŋɗi ta.

Aliɗi Izrayel e firiyi neŋ

⁴ Mefeŋ zamai ɗa, ɗai zamai arbaɗi aliɗi Izrayel suuna na wiini neŋ zi limi a yimiɗi. Aliɗi Izrayel e wiyi e ɵi marava siɗi pra, e miɗi: n'aga a sumu neŋ zi limi mumu na ɗa asiya ki ɗa?

⁵ Hilif na mu ɗumu ka mu lumuŋmusi aha war Egipte par kadai na ɗa! gaini kurti, gaini abula, gaini sugoi, gaini albazar, gaini lay lai!

⁶ Amma tiyana ɗa wulani ɗif lai gaini hûûli nɵa kaŋ tini manna, wala zamai a guna mini ɗif kir kai sam!

⁷ Manna ɗa a sɗa maini seyemni luwuŋ Koriyandre nɵa, a sɗa muɗukwi sek maini siyemni luwuŋ Deliyom nɵa.

^8-9 Duvuk ɗa a yakasi namai par gaini maaɗai ɗa ktai, gorof par ɗai e ziri edi aŋ miliŋsi, asakal par e siriŋ war fuŋ zaw e gɵiŋ warni adiŋ. Asakal par e diŋ war burma, zaw e ziŋ aŋ gamla; gamla ɗa a luma maini makala n'e piŋ gaini emel ɵa.

¹⁰ Ɗai e simni piɗi humuniɗi humuniɗi, mini hlaiɗi hlaiɗi lai, e ɵi marava. Musus a ɵina marava na wiiɗi. Nɵa EPIƊ-ƊAI a za hiy siɗi abai gara; wala hanɗa a sini firiyi wiini Musus kai.

¹¹ Musus a miɗini wiini EPIƊ-ƊAI: ku zaŋa meefeŋ wiya ta na ɵeŋku buri maɗa? Ku dara ku za yum sa kir kai ɗa buri maɗa? Gumaɗi ɗai hanɗa paŋ ku tikaŋŋa mada ɵa buri maɗa?

¹² Ɗai hanɗa, mu rgiɗi mu ta ɗi? Mu wiiɗi mu ta ɗi? Na kapai ku muɗaŋa ɓa mu libiɗi amai ta haa aha midini afti na ku ha wala muku wiiɗi tamaiɗi buri ku siŋɗi maiɗi emini ahiyagwi na te lubaŋ amai tiɗi ɵa ɗa?

¹³ Ɗai n'e ɗa ɵi marava pa paŋ na ɗa, n'e firiyi ɓa mu siɗi neŋ zi limi miɗi na ɗa, neŋ ni mu navaŋsi ɵa paŋ na ɗa wata ɗa?

¹⁴ Ta kiya ktai ɗa mu kiɗa mu luba ɗai hanɗa kai, a guma n'abai gara.

¹⁵ Na ɓa ku zaŋa maini hanɗa nɵa ɗa, mariya ku fuɗaŋa, ku fuɗaŋa li ɗa ku za sa ɗa a pɗem, aga mu sɗa gir n'a na halasi mada gaini ara kai.

¹⁶ EPIƊ-ƊAI a wiyini seŋ wiini Musus: ku tipiɗiŋa abakai n'arbaɗi ɗai doogo doogo muguzak, e ɗi ɗai na ku sɗa fakat ɓa e ɗi abakai n'arbaɗi ɗai, e ɗi abakai n'e ɵi wuzaɗi ɗai lai, ku kiɗisi war gumu n'e nivi gaini EPIƊ-ƊAI warni, e ɗiyi gaiku ca.

¹⁷ Aga mu niyaɗi azumai woni mu muɗa seŋ gaiku, seze n'aŋ muduku ɗa aga mu yima edi pini agwi mu siŋɗi midiɗi lai kapai nagai lai e libi gumaɗi ɗai ɗa gaiku, ku lubaŋ kiiku ktai kir kai.

¹⁸ Ku miɗiɗi wiiɗi ɗai ɓa e zi siɗi edi hilu buri dawai, aga e limi neŋ, buri e ɵi marava wuza ta EPIƊ-ƊAI, mu ɵina marava na wiiɗi ɓa e miɗi ɓa: n'aga a siyi neŋ ɗa asiya ki ɗi ɗa, mi ɗisi ka wiyi gaini hangalyi aha warɗi Egipte ca lai ɗa. EPIƊ-ƊAI aga a siki neŋ, aga ki limi haa.

¹⁹ Aga ki limiŋ ɗa mefeŋ ktai gaini sulu kai, mefeŋ ɵim zaw, doogo zaw caaɓa kaalai,

²⁰ amma ki limiŋ haa tile ɗaw, haa a baza miki, a bunda a luguza merfeŋki meefeŋ, a za nɵa buri ɓa ki hini EPIƊ-ƊAI n'a na arbaki ɗa edi mak, buri ki ɵi marava wuzani ɓa: mi niyisi edi war Egipte par tiɓ buri maɗa?

²¹ Musus a wiyini seŋ wiini EPIƊ-ƊAI: ɗai n'e ɗi pa na ɗa e zi ɗai dubu miya ɵaara, tuku ku muɗa ɓa aga ku siɗi neŋ e limiŋ haa tile ɗaw ɗa!

²² koo ɓa e fiɗi haakaiɗi gaini adumaiɗi, gaini ɵaakaiɗi paŋ kafa tekeɗeɗi a kiɗiɗi ta ɗi! koo ɓa e yimiɗisi hilif n'agoɗom par paŋ kafa tekeɗeɗi ɗa, a kiɗiɗi ta ɗe!

²³ EPIƊ-ƊAI a wiyini seŋ wiini Musus: spakŋa a kiɗa kai ɗi? Baiya agwi aga ku tala na ɓa seŋ na mu muɗaŋ ɗa a va amai zaw a va kai ɗi ɗa!

EPIƊ-ƊAI a sa seze wiiɗi n'abakai n'arbaɗi ɗai na doogo doogo muguzak

²⁴ Musus a niyasi edi war gumu par, a kasi miɗi na wiini EPIƊ-ƊAI wiiɗi ɗai ɗa, asakal arbaɗi n'abakai n'arbaɗi ɗai na Izrayel ɗa, a tapa ɗai doogo doogo muguzak, a ɗiyiɗi ɵimani gumu n'e nivi gaini EPIƊ-ƊAI warni ca ca.

²⁵ EPIƊ-ƊAI a niyasi azumai arbani ɗugul a muɗa gaini, a tika pini seze na miɗini Musus ɗa agwi a tikaŋ midiɗi n'abakai n'arbaɗi ɗai na doogo doogo muguzak ɗa ta ta. Won hlai na seze a sumna midiɗi tar ɗa e tiki piɗi aŋ miɗi maiɗi ɗai na mini Alaw ɵa, amma e hili wuzaɗi gaini kai.

²⁶ Ɗai zamai sulu na ktai yikini Eldad, na ktai yikini Medad lai, e hini ka aha warni kaŋ ɗa ca, yikiɗi a na fu gaini ɗû arbaɗi na doogo doogo muguzak ɗa, e niyi anene mini gumu kai, amma seze a halasi a sumna midiɗi aha war kaŋ, e tiki piɗi e miɗi maiɗi ɗai na mini Alaw ɵa.

²⁷ Gawla ktai a lawa a zini zaida wiini Musus a muɗa: Eldad gaini Medad e ɗa miɗi maiɗi ɗai na mini Alaw ɵa aha war kaŋ.

²⁸ Yosva n'ahini Nun, ɗif n'a za sda pini Musus war agwiyeŋeni par a ɗuula a muɗa: Epin-geza Musus: sikiɗi ɗai hanɗa.

²⁹ Musus a wiyini seŋ: ku dara ku za sile war balamŋa ɗi, na ɓa ɗai na Izrayel paŋ EPIƊ-ƊAI a siɗifu seze maini hanɗa nɵa ɗa, na ɓa nagai paŋ e ɗi fu e ɗi ɗai na mini Alaw ɗa, gaini futini.

³⁰ Asakal Musus a wayasi aha war kaŋ gaiɗi n'abakai n'arbaɗi ɗai na Izrayel na doogo doogo muguzak ɗa.

Aliɗi Izrayel e limi aɓuri

³¹ EPIƊ-ƊAI a hinasi smer a kasi agoɗom war yem-ra n'abai ɗa par, smer hanɗa a tikasi aɓuri ɗa wuzani, a kaŋsi aha war kaŋ, edi ɵimani par lai, a fara midini marni haa wûlini n'amai sek ɗa gobi kil sulu, mogoni n'edi sek ɗa hili na yuvai dam.

³² Ɗai e yivi, e fini, dawaini e yivi pra aŋ dûgû aɓuri ɗa, ɗif n'a nava viya kai ɗa, a nava za kilo dubu dubu kadai gama ɗi; Aliɗi Izrayel e biriŋ ɵimani kaŋ ɗa par bar bar aŋ hûûli.

³³ Neŋ ɗa maa aŋ miɗi ɗik hai, sesiyeŋ maa a tika sini kai, EPIƊ-ƊAI a za hiy siɗi, a hinasi gir n'abai midiɗi.

³⁴ E sini yiki wiini hlai ni ɓa: Kibrot-Taaba, a dara a muɗa yeɵ na wiini suuna. Buri ɓa e piɗi ɗai na suunani neŋ zi limi a na fu warɗi abai gara ɗa warni hlai ni ɗa.

³⁵ A Kibrot-Taaba par aliɗi Izrayel e hili a Haserot e pi woni.