Piɵi 1 - Ɗû na sɗik na wiini Alaw

Aliɗi Izrayel edi war basga na kaɗataŋ na Sinaï 1.1—10.10 Pɵi n'avut na wiiɗi aliɗi Izrayel

¹ Edi war basga na kaɗataŋ na Sinaï, amlai war gumu n'e nivi gaini EPIƊ-ƊAI, EPIƊ-ƊAI a muɗa gaini Musus, hanɗa a za war mefeŋ n'avut na wiini tile n'ag'aŋ sulu na wiini buza n'ag'aŋ sulu askalni niyiɗi n'edi war Egipte par, a miɗiɗi maini nɵa:

² Tuku gaini Aaron, hili ki pɵiɗi vokɗi aliɗi Izrayel piɗi humuni humuni, piɗi pakatai pakatai, ki ɗû yikiɗi maɵagai ɗa paŋ, ɗif a hina kai.

³ Ki pɵiɗi nagai paŋ n'e zi buza caaɓa ta amai sek n'e kiɗi e niyi edi aŋ hatam

⁴ War pinziba paŋ par, ki piyi abaiɗi pakatai ktai ta, n'a tapa gaiki kapai a zina piki.

⁵ Ɗai n'aga e zini piki ɗa yikiɗi maini nɵa: war pinzibani Ruben ɗa a: Elisur n'ahini Sedewur.

⁶ War pinzibani Simeyon ɗa a Selumiyel n'ahini Surisadai,

⁷ war pinzibani Yuda ɗa a Nahson n'ahini Amminadab,

⁸ war pinzibani Isakar ɗa a Nataniyel n'ahini Suwar,

⁹ war pinzibani Zabulon ɗa a Eliyab n'ahini Helon,

¹⁰ war pinzibani Efrayim n'ahini Yosef ɗa, a Elisama n'ahini Ammihud, war pinzibani Manase ɗa a Gamaliyel n'ahini Pedasur,

¹¹ War pinzibani Benyamin ɗa a Abida n'ahini Gidoni,

¹² war pinzibani Dan ɗa a Ahiyezer n'ahini Ammisaddai,

¹³ war pinzibani Aser ɗa a Pagiyel n'ahini Okran,

¹⁴ war pinzibani Gad ɗa a Eliyasaf n'ahini Dewuwel,

¹⁵ war pinzibani Neftali ɗa a Ahira n'ahini Einan ɗa lai.

¹⁶ Hanɗa e ɗi ɗai n'e viriɗi arbani vokɗi aliɗi Izrayel par, e ɗi abakai na war pinzibaɗi tamaiɗi tar tar, e ɗi abakaiɗi vokɗi askarai na Izrayel ɗa lai,

¹⁷ Musus gaini Aaron e miliɗi ɗai na doogo pi sulu n'e viriɗi aŋ zini piɗi ɗa gaiɗi.

¹⁸ E tipiɗi vokɗi aliɗi Izrayel ɗa paŋ war mefeŋ n'avut na wiini tile n'ag'aŋ sulu, e ɗû yikiɗi aliɗi Izrayel na sini buza caaɓa par amai sek, e ɗûɗi piɗi humuniɗi humuniɗi, piɗi pakataiɗi pakataiɗi lai, e ɗû yikiɗi maɵagai ɗa paŋ, ɗif a hina kai.

¹⁹ Musus a pɵiɗi aliɗi Izrayel ɗa paŋ edi war basga na kaɗataŋ na Sinaï maini n'EPIƊ-ƊAI a miɗiŋni nɵa.

^20-43 War pinziba na Izrayel ɗa paŋ, e pɵiɗi ɗai piɗi humuni humuni, piɗi pakatai pakatai, ɗai na sini buza caaɓa par ta amai sek ɗa, n'e kiɗi e simi askar war Izrayel ta ɗa, e ɗû yikiɗi ktai ktai paŋ. E tiki piɗi gaini pinziba na wiini Ruben, ahini Yakob n'abai ɗa, pɵaɗi a na maini nɵa: pinziba n a wiini Ruben ɗai 46.500 pinziba na wiini Simeyon ɗai 59.300 pinziba na wiini Gad ɗai 45.650 pinziba na wiini Yuda ɗai 74.600 pinziba na wiini Isakar ɗai 54.400 pinziba na wiini Zabulon ɗai 57.400 pinziba na wiini Efrayim n'ahini Yosef ɗai 40.500 pinziba na wiini Manase n'ahini Yosef ɗai 32.200 pinziba na wiini Benyamin ɗai 35.400 pini na wiini Dan ɗai 62.700 pinziba na wiini Aser ɗai 41.500 pinziba na wiini Neftali ɗai 53.400

⁴⁴ Hanɗa a pɵaɗi aliɗi Izrayel na Musus gaini Aaron gaiɗi abakaiɗi pakatai na doogo pi sulu na war pinziba na doogo pi sulu na wiini pinzibaɗi Izrayel e niviŋsi ɗa,

⁴⁵ pɵaɗi aliɗi Izrayel n'e zi buza caaɓa ta amai sek, n'e kiɗi e simi askar war Izrayel, n'e niviŋsi war pakatai pakatai par,

⁴⁶ a na paŋ ɗai: 603.550

⁴⁷ Pinziba na wiini Levi ɗa, e piɵiɗi arbaɗi pinziba na hanɗa kai.

Sda n'a sa tiɗi pinzibani Levi

⁴⁸ EPIƊ-ƊAI a miɗini wiini Musus:

⁴⁹ Pinziba na wiini Levi ɗa ku piɵiɗi kai, ku piɵiɗi gaiɗi pinziba na wiiɗi aliɗi Izrayel na zamai ɗa kai.

⁵⁰ Ku siɗi sdani gumu na sɗik na alini fuŋ na babɗamai na wiini gadai a na amlai warni gaini wazagai n'e zi sda gaini, gaini wazagai zamai n'amlai warni paŋ tiɗi Levitekai, e libiŋ ɗa e ɗi nagai gaini wazagai n'e zi sda gaini amlai warni paŋ. E zi sda amlai warni e ɗi nagai lai, e simni ɵimani gumu gobi lai.

⁵¹ Won hlai na ki fiki li aŋ hili ɗa, Levitekai e rɗi gumu na sɗik ɗa amai, hlai na ki pi kanki li ɗa, e piŋ azumai; ɗif na war pinzibani Levi kai a torosi li sini ɗa, a nava fiɗi n'edi.

⁵² Aliɗi Izrayel e simni pini vokɗi vokɗi, ɗif paŋ war vok na wiiɗi askarai na gaini, ɵimani drapo na wiiɗi.

⁵³ Amma Levitekai e simni ɵimani gumu n'ali-fuŋ na babɗamai na wiini bonu aŋ warni ɗa e giɗimiŋ, e zi sdaɗi amlai warni lai, kapai hiy na wiini EPIƊ-ƊAI a halasi miɗini vok na wiiɗi aliɗi Izrayel ɗa kai.

⁵⁴ Aliɗi Izrayel e zi maini nɵa. E zi paŋ kal kal maini n'EPIƊ-ƊAI a miɗiŋni wiini Musus nɵa.