Paakai zi sariya 5 - Ɗû na sɗik na wiini Alaw

Yama na wiiɗi Debura

¹ War mefeŋ ni ɗa, Debora gaini Barak n'ahini Abinowam e zini yama maini nɵa:

² Aha warɗi Izrayel ɗa, won hlai na ɗai e bidi midiɗi li amai ɗa, Won hlai na ɗai e si siɗi li pini diriɗi won hlai n'e hili mini hatam ɗa, ki si kol sini EPIƊ-ƊAI.

³ Tiki Paakai, ɵini pɗem. Tiki n'abakai, zigi ɵimaki, Ta, burini EPIƊ-ƊAI ɗa, Nkam ta ɗa, aga mu zina yama, Aga mu zina yama burini EPIƊ-ƊAI Alaw na wiiɗi Izrayel.

⁴ EPIƊ-ƊAI, won hlai na ku niyasi edi war Seyir par ɗa, Won hlai na ku fakasi midini afti na Edom par aŋ halasi ɗa, Afti a ziriya, faŋ n'abai a ɵasi won hlai n'amai par, ɗugul zi faŋ ɗa a hinasi yem na warni a kasi azumai.

⁵ Huwaŋai a hiliya wuzani EPIƊ-ƊAI, Sinaï hanɗa, wuzani EPIƊ-ƊAI, Alaw na wiiɗi Izrayel,

⁶ War sarti na wiini Sangar n'ahini Anat, war sarti na wiiɗi Yael, futi ɗa, ɗai e hili warɗi kir kai, ɗai n'e hili yaw yaw warɗi futi ɗa, e bindi e gûni edi ɗaw.

⁷ Fuŋ na gaini ɵaga amai sini kai ɗa a hina warɗi Izrayel kir kai, a vada edi kafa. Haa tuku Debura ku fakasi, ku fakasi amai maiɗi ami nɵa war Izrayel.

⁸ Ɗai e tiki piɗi aŋ piyi alawai na hahakai, paŋktai gaw ɗa a na fu aha min hlai gobi; Amma aha warɗi Izrayel ɗa, askarai e zi kadai dubu doogo doogo puɗu ɗi, ku nava gamar tiɗi ktai na woɗi ktai na woɗi, kawai ktai na woɗi, ktai na woɗi lai.

⁹ Agula t'aŋ gaiɗi komandaŋai na wiiɗi Izrayel, t'aŋ gaiɗi ɗai n'e si siɗi pini diriɗi aŋ hili edi mini hatam, ki si tese sini EPIƊ-ƊAI.

¹⁰ Tiki na ki ɗa hili gaini ablehökai na falakai, na ki simni war tapi, na ki ɗa hili warɗi futi lai, ki hiini pɗem.

¹¹ A juva ɓa ɵimani hlai na farai a ca yem woni ɗa, nagai n'e bili yem ɗa, e si kol sini EPIƊ-ƊAI gaini wulaɗi amai burini sda n'EPIƊ-ƊAI a zaŋ burini jre ɗikat. Burini wala n'a zaŋ burini jre ɗikat siɗi n'abakai na wiiɗi Izrayel, won hlai na ɗai na wiini EPIƊ-ƊAI, e niyisi azumai, e zizini siɗi mini hatam mini magalani fuŋ n'abakai.

¹² Fakasi amai, fakasi amai tuku Debura, fakasi amai, fakasi amai, tikasi yama amai, Fakasi amai, fakasi amai tuku Barak, hala gaiɗi ɗaiku na ku miliɗisi mini gaw par ɗa, ahini Abinowam.

¹³ Nɵa nagai n'e hini karɗi ɗa, e niyisi azumai siɗi nagai na agulɗi a huna kai ɗa, ɗai na wiini EPIƊ-ƊAI, e niyisi azumai sini aŋ nivi gaiɗi gaŋgalaŋai ɗa,

¹⁴ Nagai n'e rɗi amai midiɗi pinzibani Amalek ɗa, e ɗi na war pinzibani Efrayim par, pinzibani Benyamin a tika futi piɗi lai, e tipi gaiɗi war vokɗi askaraiɗi lai. Abakaini vokɗi askarai ɗa, e ɗi na war piɗi humuni na wiini Makir ɗa par. Abakai na wiiɗi lawaŋai ɗa a na war pinzibani Zabulon par.

¹⁵ N'abakai na war pinzibani Isakar ɗa, e tipi gaiɗi Debura, pinzibani Isakar ɗa e firiyi e ɓûrwi gaini Barak kai. E tiki futi pini witaw tar war hlai na plas. Amma war pinzibani Ruben ɗa, kitini-mi a za viya, amma a ɗiya kai.

¹⁶ Ki hili ki simni arbani hlai na farani farai a fana woni aŋ zuɓura wulaɗi ɗai zi giɗimi n'e ɗa yiki fara ɗi ɗa, buri maɗa? Amma war pinzibani Ruben ɗa, sispai a za viya, amma a ɗiya kai.

¹⁷ Pinzibani Galaad ɗa siɗisi anene kata duɓani Yurdan piɗi futi na dawai par ca, e tikisi eziɗi kai, Pinzibani Dan ɗa, siɗi si warni hulumɗi ca buri maɗa? Pinzibani Aser ɗa, siɗisi agoɗom wulani yem-ra n'abai ɗa ca, mini hlai na hulum n'abakai a yima woni ca ɗa buri maɗa?

¹⁸ Pinzibani Zabulon ɗa, e ɗi ɗai n'e si siɗi edi mini mri ta. Pinzibani Neftali nɵa lai, won hlai na gaw a sawa gdaŋ gara ɗa.

¹⁹ Paakai na gawɗi e hilisi e hitimiɗi, paakai na Kanaan e hitimiɗi lai. E hitimi marɗi war Taanak; war hlai zi liiwi yem na Megido, amma e nivi wala ktai tiɗi kai, arzaŋ kaalai.

²⁰ Amai warni hlai n'amai par, meeɵek a hitimasi lai, war futini par, a hitimasi Sisera.

²¹ Yem zi ki na Kison ɗa a dûgûɗi duk, yem n'a na ka haa gamai par, yem na Kison. A juva ɓa mu kirpiɗi gaini gdaŋŋa.

²² Nɵa, plasaiɗi zi rûvi ɗa a lawa gaini gdaŋni, tetrekni n'ezini ɗa a vurga afti amai.

²³ Ɵeŋ na wiini EPIƊ-ƊAI a muɗa: Tûûsi fuŋ n'abai na Meroz, Tûûsiŋ, ki tûûsiɗi ɗai na warni lai. Buri ɓa e lûwini ɗuwal wiini EPIƊ-ƊAI kai, e lûwini ɗuwal wiini EPIƊ-ƊAI arbaɗi gaŋgalaŋai kai.

²⁴ Arbaɗi falakai ɗa, kol siɗi Yael, Munini Heber na Kenit. Arbaɗi falakai n'e simni war gumu paŋ, kol siɗi.

²⁵ Sisera a paya yem, na te sini ɗa a fiyaw. Te sini fiyaw kiŋtirɓi warɗi kup na jûvi na te sa siɗi ɗai na agulɗi a huna kai ɗa.

²⁶ Te yima kawai n'e ɓili gumu azumai gaini ɗa war tiɗi ktai kaai, kawai n'e tûkûŋ azumai gaini na wiiɗi ɗai zi sda ɗa, war tiɗi na wus ɗa kai lai. Te fuɗa Sisera, te liɓini miɗini, te haɗa keɵke na pini ɵimani, te tûkûni midini azumai arni afti.

²⁷ A hurgaɗi amai par azumai eziɗi, a kɵa azumai, a fana azumai. A hurga azumai eziɗi a kɵa azumai, Hlai n'a hurga azumai woni ɗa, a kɵa war hlai ni ɗa, suŋfa warni kai.

²⁸ Arni fenetre par, emini Sisera te wasi midiɗi anene, te tala arɗi, te zilba siɗi maini nɵa: Saret zi gaw na wiini ɗa, haa tiyana a wayasi kai ɗa buri maɗa? Saretai zi gaw na wiini ɗa, a lawa kokolai kai ɗa buri maɗa?

²⁹ Mairamai na yalakai gara ɗa e wiyiɗi seŋ: na dama, te muɗa gaini warɗi ɓa:

³⁰ E nivi der a na jek, e ɗi si na ɗa aŋ ɓûrwiŋ ba ɗi. Ɗif zi hatam paŋ ɗa, ɓulmi miɗini ktai ktai, ɵa kai sulu sulu ɗi, der ɗa, a sapa n'a juva gara wiini Sisera, der ɗa, a sapa n'a juva gara na wulani gaini tikiri, sapa n'a juva gara ktai, wiiɗi falakai n'e yimiɗisi mini gaw ɗa.

³¹ EPIƊ-ƊAI, a juva ɓa gawku paŋ e mri edi maini Sisera nɵa, nagai n'e diriku ɗa, e ŋili maini futi, n'a yima gaini gdaŋni kaŋ ɗa nɵa. Afti a sumna ɵeɗ haa buza doogo doogo puɗu.