Paakai zi sariya 19 - Ɗû na sɗik na wiini Alaw

Sda na meefeŋ na pinzibani Benyamin na war Gibeya e ziŋ

¹ War sarti ni ɗa, pai a na fu war Izrayel kai. Ɗif na Levite ktai a na fu aŋ jak edi ezini hlai zi huwuŋ na wiini Efrayim, a tikiti muni na war Betlehem na war Yuda aŋ munini amma a kitisi aha kai.

² Muni na ɗa te za hiy sini, asakal par te hinaŋ te waya ahani epiɗi war Betlehem na war Yuda, te sumna woni tile puɗu.

³ Mefeŋ ktai, mofaɗi a hala siɗi aŋ haɗa kalaŋ gaiɗi kapai a wiyitisi aha. A hala gaini ɗifni zi sda, ablehökai piɗi sulu lai. Munini te kaŋ amlai ahani epiɗi, won hlai na epiɗi muni a talaŋ a yimaŋ gaini firiyi.

⁴ Suwulni na epiɗi munini a sini futi aŋ hala kai, a sumna ahani haa mefeŋ hu, e simi, e ci, e fini woni.

⁵ War mefeŋ n'ag'aŋ puɗu ɗa, ɗif na Levite gaini ɗifni zi sda ɗa e fiki amai gorof. Won hlai n'a na zizina sini buri a hala, epiɗi muni ɗa a miɗini wiini suwulni: Ku suma wala agwi kapai ku nava gdaŋ, asakal par ki hili wiiki.

⁶ E simni azumai gaini sulogoiɗi, e simi, e ci lai. Asakal par epiɗi muni a miɗini wiini mofaɗi muni: Fana ka won na waŋ pra, za barka yimaŋ suku, a juva ɓa agulku a tuura kai!

⁷ Mafaɗi muni a faka amai aŋ hili, amma suwulni a siika mini haa a fana ka woni waŋ pra.

⁸ War mefeŋ n'ag'aŋ ɵim a faka amai gorof buri a hala, amma epiɗi muni a miɗini: Za barka, suku a tika agwi haw, biyi haa siɗi futi ta, gaini suliɗi e simi.

⁹ Mafaɗi muni a faka amai buri a hala gaiɗi munini, gaini ɗifni zi sda lai. Amma suwulni n'epiɗi munini a miɗini: Futi te za koskoi ta, hlai a vuga vug, mu siiwiki, fini ca. Futi te hala ɗaw, fini won na ca. A juva ɓa agulku a tuura kai! Dawai ɗa aga ki ɵi siki gorof aŋ hili, aŋ waya aha sini dalamku.

¹⁰ Amma mofaɗi muni ɗa a firiya a fana kir kai, a faka a hala, a co haa gobi aha miɗi Yebus, a dara a muɗa: Yeruzalem, gaini ablehökai na sulu na kursi gaini zizini duɓani ɗa.

¹¹ Won hlai n'e cûsi gobi aha miɗi Yebus ɗa hlai a za koskoi gara ta, ɗif zi sda a miɗini wiini epin gezani: Niyumu aha war fuŋ n'abai na wiiɗi Yebuzitekai hanɗa, hulumu, mu funumu woni.

¹² Epin gezani a wiyini seŋ a muɗa: Zaw kai, aga mu niyumu aha war fuŋ n'abai na wiiɗi pinziba na zamai na ɗif na Izraiel ktai maa woni kai ɗa kai, mu funumu ɗa a Gibeya sek.

¹³ A miɗini wiini ɗif zi sda na wiini: Hulumu, fuɗumu was aŋ cumu war Gibeya zaw Rama, mu funumu war ktai arbani fuŋ n'abakai hanɗa.

¹⁴ E hili wuzaɗi, won hlai n'e cû gobi aha miɗi Gibeya na wiiɗi alini Benyamin ɗa, futi te nawa lai.

¹⁵ E niyi aha war Gibeya aŋ fini woni Ɗif na Levite gaiɗi ɗai na pini ɗa, e niyi aha e simni azumai warni hlai zi faada, amma ɗif ktai n'a yimiɗi sini aŋ fini ahani aŋ kai.

¹⁶ Koskoi ni ɗa, ɗif ktai na wel a wayasi edi warni vowaini par, aŋsi fu aŋ za sda, ni a ɗif na midini hlai zi huwuŋ na wiini Efrayim par, a na fu war Gibeya ɗa aŋ ɗif zi jak, amma ɗai na warni hlai ni mal ɗa e ɗi pinzibani Benyamin.

¹⁷ Won hlai n'a ɵa arni ɗa, a tala ɗif na morkoi ɗa edi warni faada dam, ɗif na wel ɗa a zilbaŋ a muɗa: Ku halasi wata par ɗa? Ku hala na wa zaw ɗa?

¹⁸ A wiyini seŋ a muɗa: Mi hilisi a Betlehem na war Yuda par, edi ezini hlai zi huwuŋ na wiini Efrayim ɗa par, mu na woni par. Mu hala war Betlehem na war Yuda; mu hala na ɗa amlai war dalam na wiini EPIƊ-ƊAI, amma ɗif n'a yimaŋa sini aŋ kai.

¹⁹ Mi ɗi na ɗa gaini evekyi gaini kuzumyi na mi siŋni wiini ablehökaiyi tiyi, mi ɗa gaini wazagaiyi zi simi tiyi, gaini wala zi ci na buri ya ta gaiɗi muniya, gaini ɗif zi sda n'aŋ piyi ɗa tiyi lai. Mi zilba wala tini ɗif par kai.

²⁰ Ɗif na wel a muɗa: Ku huwya suku kai, wala n'a suwuku paŋ ɗa aga mu piyuŋku, aga ku fana edi warni faada hanɗa kai.

²¹ A kiɗi ahani, a sini kuzum mini ablehökaini lai, ɗai na morkokai e mi eziɗi, asakal par e simi, e ci lai.

²² Won hlai na hangalɗi a tika pini a wayasi siɗi ɗa, ɗai na war fuŋ n'abai hanɗa par, na hangalɗi meefeŋ e gûni dalam ɗa azumai gun, e tiki piɗi aŋ ɵiɓi mini magalani ɗif na wel ɗa, e miɗini maini nɵa: Ɗif n'a niyaɗi ahaku ɗa, ɵaŋsi anene kapai mi fini gaini.

²³ Epingezani dalam ɗa a niyasi anene miɗi a miɗiɗi: Zaw kai tawalakaya, mu siiwiki, ki zi wala na meefeŋ na maini hanɗa ɵa kai. Ɗif hanɗa a niyasi ahaya dak, ki zi wala na hihir maini hanɗa nɵa sini kai.

²⁴ Ahiya na ɓulmi te na, munini ɗif hanɗa te na lai, zi barka, hiniŋa mu siɗikisi anene, yimiɗi, zi gaiɗi maini na ki diri nɵa, amma ki zi wala na hihir maini hanɗa nɵa sini ɗif hanɗa kai.

²⁵ E firiyi e ɵini mini kai, nɵa ɗif na Levite ɗa, a yimitisi munini a kitiɗisi anene. E fini gaiɗi, e fini gaiɗi gaini gdaŋ ɵa haa gorof. Won hlai na hlai a sɗasi rum rum ɗa e hinitisi.

²⁶ Gorof par, muni hanɗa te halasi te kɵa mini magalani ɗif na wel na mofaɗi a sumna aha woni ɗa, te hina woni waŋ ɵa haa hlai a sɗasi edi.

²⁷ Gorof par, mofaɗi muni ɗa a fakasi amai, a mala mini magala edi, a niyasi anene buri a kiti morkoini na wuzani sek ɗa. Amma a nivitisi munini ɗa gaini kɵi azumai mini hlai su, tiɗi mini hlai gaini yimi kaai.

²⁸ A miɗiɗi: Faka amai, hulumu. Amma te kiɗa te wiyini seŋ kai. Nɵa mofaɗi a tikiti amai duɓani ablehöni, a hala gaiɗi aha.

²⁹ A niya amlai warni dalamni, a tikasi muguɗ, a ɗûkûliti munini azumai daf daf haa doogo pi sulu. A ɵina neŋɗi midini aftiɗi pinzibani Izrayel paŋ.

³⁰ Ɗai n'e tili wala hanɗa paŋ ɗa e miɗi: Wala na maini hanɗa ɵa ɗif a talaŋ ka kai, a za ka duk kaalai, haa sini mefeŋ na aliɗi Izrayel e niyisi edi war Egipte par haa girna. Hiini pɗem, yiki diŋgi ka, miɗi seŋ ktai.